ភ្នំពេញ៖ មន្ត្រីជាន់ខ្ពស់ក្រសួងព័ត៌មានបានប្រាប់ឲ្យដឹងនៅថ្ងៃនេះថា ក្រមប្រតិបត្តិសម្រាប់អ្នកសារព័ត៌មាន ដើម្បីជួយទប់ស្កាត់ការជំរុញហឹង្សាលើស្ត្រីនឹងចេញជាផ្លូវការនៅក្នុងអំឡុងខែឧសភា នេះ។ ប៉ុន្តែមិនទាន់មានកាលបរិច្ឆេទជាក់លាក់នោះទេ។
លោក អ៊ុក គឹមសេង អនុរដ្ឋលេខាធិការក្រសួងព័ត៌មានបានថ្លែងក្នុងសិក្ខាសាលាស្តីពីក្រមប្រតិបត្តិផ្សព្វផ្សាយអំពើហិង្សាលើស្ត្រី និងការប្រើប្រាស់អក្ខរាវិរុទ្ធថា ក្រោយពីក្រមប្រតិបត្តិនេះចេញជាផ្លូវការ អ្នករាយការណ៍ព័ត៌មានតាមវិទ្យុ ទូរទស្សន៍ និងសារព័ត៌មានបោះពុម្ពផ្សាយ នឹងរាយការណ៍ដោយវិជ្ជាជីវៈ និងជួយទប់ស្កាត់ហិង្សាលើស្ត្រី។ ក្រមប្រតិបត្តិនេះ នឹងលើកទឹកចិត្តឲ្យអ្នករាយការណ៍ព័ត៌មានបិទបាំងភាពលម្អិតមួយចំនួនក្នុងការធ្វើសេចក្តីរាយការណ៍ដោយហេតុថា ព័ត៌មានលម្អិតមួយចំនួនអាចផ្តល់ជារូបមន្តសម្រាប់ជនល្មើងដទៃប្រព្រឹត្តិហិង្សាលើស្ត្រី៕
