ភ្នំពេញ ៖ អង្គការ Human Rights Watch បានអំពាវនាវនៅថ្ងៃទី ២៧ មេសានេះ ឲ្យរដ្ឋាភិបាលកម្ពុជាដោះលែងមន្ត្រី សិទ្ធិមនុស្សចំនួនប្រាំរូបដែលកំពុងជាប់ឃុំឃាំ«ជាបន្ទាន់»។ ការអំពាវនាវធ្វើឡើងចំខួបគម្រប់មួយឆ្នាំគត់ នៃការឃុំខ្លួន មន្ត្រីសិទ្ធិមនុស្សទាំងប្រាំ។ តែយ៉ាងណា សាលាដំបូងរាជធានីភ្នំពេញនៅថ្ងៃនេះ បានសម្រេចពន្យារបន្តឃុំខ្លួនទាំង ៥ ចំនួនប្រាំមួយ ខែបន្តទៀត។
អង្គការ Human Rights Watch ដែលមានមូលដ្ឋាននៅក្រុងញូយ៉ក សហរដ្ឋអាមេរិក ទទូចនៅក្នុងសេចក្តីប្រកាសព័ត៌មានរបស់ខ្លួនថា ការចោទប្រកាន់មន្រ្តីសិទ្ធិមនុស្ស និងមន្រ្តី គ.ជ.ប នេះគឺជាការចោទប្រ កាន់ខុស និងមាន«ចរឹតនយោបាយ»។
បើទោះបីមានការអំពាវនាវ និងថ្កោលទោសជារឿយៗពីមជ្ឈដ្ឋានជាតិ និងអន្តរជាតិ ជុំវិញករណីឃុំខ្លួនមន្រ្តីសិទ្ធិមនុស្សនេះយ៉ាងណាក្តី តែមន្រ្តីរដ្ឋាភិបាលអះអាងថា ការឃុំខ្លួននេះធ្វើឡើងស្របតាមនិតីវិធីច្បាប់។
ទៀតសោតនៅថ្ងៃនេះ សាលាដំបូងរាជធានីភ្នំពេញ បានសម្រេចពន្យារពេលបន្តឃុំខ្លួនជាលើកទី ២ លើមន្រ្តីសិទ្ធិមនុស្ស និងមន្រ្តី គ.ជ.ប ទាំង ៥ រូបរយៈពេល ៦ខែបន្តទៀត ក្រោមហេតុផល រក្សាទុកជនជាប់ចោទ ទុកជូនតុលាការចាត់ការតាមនិតីវិធីរបស់តុលាការ និងរក្សាជនជាប់ចោទដើម្បីស៊ើបសួរឱ្យបានល្អិតល្អន់សព្វគ្រប់។នេះបើតាម លោកមេធាវី សុំសុគង់ ។
ដើរចេញពីបន្ទប់សវនាការ ក្នុងសំលៀកបំពាក់អ្នកទោសពណ៌ស្លាទុំ ដៃទាំង២ត្រូវជាប់ឃ្នោះ មន្រ្តីសិទ្ធិមនុស្សបានស្រែកប្រាប់អ្នកសារព័ត៌មានថា ការពន្យារពេលឃុំខ្លួននេះដោយគ្មានការជំនុំជម្រះគឺជារឿងអយុត្តិធម៌ខ្លាំងណាស់ ហើយពួកគាត់ស្នើឱ្យពលរដ្ឋចេញទៅបោះឆ្នោតទាំងអស់គ្នាដើម្បីផ្លាស់ប្តូរឱ្យមានយុត្តិធម៌សង្គម។
ក្រុមមេធាវីការពារក្តីឱ្យមន្រ្តីអាដហុក និងមន្រ្តីគ.ជ.ប លើកឡើងថា ការបន្តឃុំខ្លួនទាំង៥ នាក់ គឺមិនមានការចាំបាច់នោះទេ ព្រោះការស៊ើបសួររបស់ចៅក្រមស៊ើបមិនមានភាពជឿនលឿនដើម្បីជាប្រយោជន៍ក្នុងការស៊ើបនោះទេ។ មេធាវីលោក សំ សុគង់ និយាយថា ការឃុំខ្លួនកូនក្តីខ្លួនក្នុងរយៈពេលយូរដូច្នេះគឺជាការរំលោភសិទ្ធិ ដែលតាមច្បាប់ជនជាប់ចោទត្រូវតែទទួលការកាត់ក្តីឱ្យបានឆាប់រហ័ស។
មេធាវីលោក សំ សុគង់៖«ការឃុំខ្លួនជនត្រូវចោទគ្រាន់តែសម្រាប់សវនាការ ក៏វាមិនមែនជារឿងមួយល្អដែរ គឺវាប៉ះពាល់ទៅដល់សិទ្ធិជនជាប់ចោទ ដែលជនជាប់ចោទត្រូវទទួលការសាវនាការឱ្យបានឆាប់រហ័ស»។
ទាក់ទងការអំពាវនាវរបស់អង្គការ Human Rights Watch ឱ្យមានការដោះលែងមន្រ្តីសិទ្ធិមនុស្ស និងមន្រ្តី គ.ជ.ប នេះ លោក គឹម សន្តិភាព អ្នកនាំពាក្យក្រសួងយុត្តិធម៌និយាយថា លោកចង់ឱ្យអង្គការ Human Rights Watch ផ្តល់មេធាវីការពារមន្រ្តីសិទ្ធិទាំងនោះដើម្បិតតាំងតាមផ្លូវច្បាប់ ជាងជាការចេញសេចក្តីថ្លែងដែលមិនបានផ្តល់ផលប្រយោជន៍ជូនជនជាប់ចោទ។
មន្ត្រីការពារសិទ្ធិមនុស្សទាំងប្រាំរូបរួមមាន លោកណៃ វ៉ង់ដា លោក នី សុខា លោកយី សុខសាន លោកស្រី លឹម មុន្នី និងអតីតប្រធានផ្នែកស៊ើបអង្កេតរបស់សមាគមអាដហុក លោកនី ចរិយា ដែលក្រោយមកត្រូវជ្រើសតាំងជាអគ្គលេខាធិការរងគណកម្មាធិការជាតិរៀបចំការបោះឆ្នោត។
ក្រុមមន្រ្តីទាំងនេះត្រូវចាប់ខ្លួននៅថ្ងៃទី២៨មេសាឆ្នាំ២០១៦ក្រោមបទចោទប្រកាន់អំពីការសូកប៉ាន់សក្សីទាក់ទងនឹងសំណុំរឿងសំណុំរឿងនាងខុម ចាន់តារាទី ហៅស្រីមុំ ជាមួយលោកកឹម សុខា ប្រធានគណបក្សសង្គ្រោះជាតិ។
អង្គការ Human Rights Watch បានឲ្យដឹងថា មន្ត្រីទាំងប្រាំរូបនេះកំពុងស្ថិតជាបេក្ខ ជនក្នុងបញ្ជីឈ្មោះផ្តាច់ព្រ័ត្រ ដែលត្រូវទទួលពានរង្វាន់ម៉ាទីន អែនណល (Martin Ennals Award) ឆ្នាំ២០១៧។ គឺជាពានរង្វាន់ធំផ្នែកសិទ្ធិមនុស្ស ដែលមានតម្លៃដូចជាពានរង្វាន់ណូបែលដែរ៕
