ជ្រៃធំ ៖ នាយករដ្ឋមន្រ្តីនៃប្រទេសកម្ពុជា និងវៀតណាម នៅវេលាព្រឹកថ្ងៃទី២៤ មេសា នេះបានរួមគ្នាសម្ពោធដាក់ឲ្យ ប្រើប្រាស់ផ្លូវ និងស្ពានឆ្លងកាត់ព្រំដែនកម្ពុជា-វៀតណាម (ជ្រៃធំ-ឡុងប៊ិញ) តម្លៃជាង ៣៦លានដុល្លារអាមេរិក ជាមួយ ការរំពឹងផ្តល់ប្រយោជន៍យ៉ាងច្រើន សម្រាប់ប្រជាពលរដ្ឋនៃប្រទេសទាំងពីរ ជាពិសេសប្រជាពលរដ្ឋនៅជាប់ព្រំដែននៃ ប្រទេសទាំងពីរ។
នាយករដ្ឋមន្រ្តីទាំងពីរមានប្រសាសន៍ថា ស្ពានមិត្តភាពកម្ពុជា វៀតណាម (ជ្រៃធំ-ឡុងប៊ិញ) មិនត្រឹមតែបង្កើនចំណងមិត្ត ភាពរវាងប្រទេសទាំងពីរនោះទេ ការដាក់ឱ្យប្រើប្រាស់ស្ពាននេះ ក៏នឹងជំរុញពង្រីកទំហំពាណិជ្ជកម្មប្រទេសទាំងពីរឱ្យកាន់ តែល្អប្រសើរ តាមរយៈការដឹកជញ្ជូនទំនិញចេញចូលក្នុងប្រទេសទាំងពីរ។ ស្ពានមិត្តភាពកម្ពុជា វៀតណាម (ជ្រៃធំ-ឡុងប៊ិញ) នេះមានបណ្តោយប្រវែង ៤២៧.៤៤ម៉ែត្រ។ ក្នុងនោះភាគីកម្ពុជា ទទួលបន្ទុកសាងសង់ប្រវែង ២១៣.៧២ ម៉ែត្រ និងភាគីវៀតណាម ទទួលបន្ទុកសាងសង់ប្រវែង ២១៣.៧២ម៉ែត្រ។ ស្ពាននេះមានទទឹង ១៣,៥០ម៉ែត្រ ចែកជាពីរគន្លងសម្រាប់ផ្លូវរថយន្ត ដែលគន្លងនីមួយៗ មានទទឹង ៣,៥០ម៉ែត្រ និង ផ្លូវសម្រាប់ថ្មើរជើង ដែលមានទទឹង ២,៥០ម៉ែត្រ អមដោយបង្កាន់ដៃទទឹង ០,២៥ ម៉ែត្រសងខាង។
