«ក្នុងមួយឆ្នាំៗ កម្ពុជាខាតបង់ថវិកាជិត ១រយលានដុល្លារ ដោយសារការជក់បារី។ មិនត្រឹមតែខាតបង់សេដ្ឋកិច្ចជាតិនោះទេ ការជក់បារីថែមទាំងធ្វើឱ្យប៉ះពាល់ដល់សុខភាព អ្នកជក់ និងអ្នកមិនជក់ថែមទៀតផង»។ នេះបើតាមការលើកឡើងរបស់លោកវេជ្ជបណ្ឌិត មុំ គង់ ដែលបានថ្លែងក្នុងសិក្ខាសាលាផ្សព្វផ្សាយច្បាប់ស្តីពី «ការត្រួតពិនិត្យថ្នាំជក់» ធ្វើឡើងនៅសាលារាជធានីភ្នំពេញ កាលពីថ្ងៃទី១៩ សីហា ២០១៥ ម្សិលមិញនេះ។
លោកវេជ្ជបណ្ឌិត មុំ គង់ បានថ្លែងថា ការចំណាយលើការព្យាបាលជំងឺដែលបង្កដោយការប្រើប្រាស់ថ្នាំជក់ មានទំហំធំជាងការចំណាយទៅលើការទិញបារីជក់ឆ្ងាយណាស់ ហើយបើតាមទិន្នន័យបឋមរបស់មន្ទីរពេទ្យមិត្តភាពខ្មែរ សូវៀត ការព្យាបាលជំងឺមហារីក១ករណី ត្រូវចំណាយជិត១ម៉ឺនដុល្លារ។ ការប្រើប្រាស់ផលិតផលថ្នាំជក់បានបង្កឱ្យប៉ះពាល់ដល់សុខភាពយ៉ាងធ្ងន់ធ្ងរ ដែលបង្កឱ្យកើតជំងឺដូចជា ទឹកនោមផ្អែម មហារីក ជំងឺផ្លូវដង្ហើមរ៉ាំរៃ ជំងឺផ្លូវចិត្ត ជំងឺបេះដូង និងសរសៃឈាមជាដើមដោយសារ នៅក្នុងផ្សែងបារីមានសារធាតុគីមីជាង៤០០០ប្រភេទ ហើយភាគច្រើននៃសារធាតុទាំងនោះ គឺជាជាតិពុល និងជាជាតិធ្វើឱ្យរលាកដល់កោសិកា ក្នុងនោះមានជាតិគីមីជាង ៤៣ប្រភេទ បណ្តាលឱ្យកើតជំងឺមហារីក។
លោកបន្ថែមឲ្យដឹងថា ក្នុងចំណោមសារធាតុពុលទាំងនោះ មានដូចជាសារធាតុ នីកូទីន ជ័រថា កាបូនម៉ូណូអុកស៊ីត អ៊ីដ្រូសែនស្យានីត អង្គធាតុវិទ្យុសកម្ម និងសារធាតុពុលមួយចំនួនទៀត ដែលធ្វើឱ្យប៉ះពាល់សុខភាពអ្នកជក់ និងអ្នកមិនជក់។ នាយកប្រតិបត្តិអង្គការចលនា ដើម្បីសុខភាពកម្ពុជារូបនេះអះអាងថា ជារៀងរាល់ឆ្នាំ មនុស្ស៦លាននាក់ នៅលើពិភពលោកបានស្លាប់ ដោយការប្រើប្រាស់ថ្នាំជក់។ ក្នុងនោះមានអ្នកមិនជក់បារីរួមទាំងកុមារ និងស្រី្ត៦សែននាក់ស្លាប់ដោយស្រូបផ្សែងបារី។ ចំណែកប្រជាជនកម្ពុជា ជិត១ម៉ឺននាក់ក្នុងមួយឆ្នាំ ឬ៣០នាក់ក្នុងមួយថ្ងៃបានបាត់បង់ជីវិតដែលបណ្តាលមកពីការជក់បារីនេះ។
ដោយមើលឃើញថា ការជក់បារីធ្វើឱ្យប៉ះពាល់សុខភាព បរិស្ថាន និងសេដ្ឋកិច្ច លោកប៊ុន សេរី អភិបាលរងនៃគណៈអភិបាលរាជធានីភ្នំពេញ បានឱ្យដឹងថា សាលារាជធានីភ្នំពេញ រួមជាមួយអង្គការចលនា ដើម្បីសុខភាពកម្ពុជា បានជំរុញសកម្មភាពការងារអនុវត្តបរិស្ថានគ្មានផ្សែងបារី នៅរាជធានីភ្នំពេញ ដើម្បីឱ្យរាជធានីភ្នំពេញ ក្លាយជាទីក្រុងគ្មានផ្សែងបារីនៅកន្លែងធ្វើការ និងនៅទីសាធារណៈ។ លោកបន្តថា សាលារាជធានីភ្នំពេញ ក៏បានសហការជាមួយសាលាខណ្ឌទាំង១២ និងក្រុមការងារទីក្រុងគ្មានផ្សែងបារីថ្នាក់ខណ្ឌ ជំរុញឱ្យមានការដាក់ស្លាកហាមជក់បារីនៅតាមកន្លែងរមណីយដ្ឋាន ភោជនីយដ្ឋាន និងសួនកំសាន្តនានា។
លោកបានរៀបរាប់ទៀតថា បច្ចុប្បន្ននេះ សាលារាជធានីភ្នំពេញនៅតែសង្កេតឃើញថា នៅកន្លែងមួយចំនួនដូចជា នៅផ្សារទំនើប ម៉ាត កន្លែងធ្វើអាជីវកម្មជាដើម នៅតែមានការដាក់លក់បារី ដោយបំពានទៅលើអនុក្រឹត្យ មិនតែប៉ុណ្ណោះនៅតែមានអ្នកធ្វើអាជីវកម្មមួយចំនួន បានលបលួចបង្កើតកម្មវិធីផ្សព្វផ្សាយផលិតផលបារីនៅតាមសណ្ឋាគារធំៗ ដោយប្រើយុវនារីស្អាតៗ។
សូមបញ្ជាក់ថា ព្រះរាជាណាចក្រកម្ពុជា បានប្រកាសដាក់ឱ្យប្រើប្រាស់ជាផ្លូវការនូវច្បាប់ស្តីពីការត្រួតពិនិត្យផលិតផលថ្នាំជក់ នៅថ្ងៃទី២១ ខែឧសភា ឆ្នាំ២០១៥។ ច្បាប់នេះមានគោលបំណងការពារសុខភាពសាធារណៈ និងកាត់បន្ថយផលប៉ះពាល់ដល់សុខភាព សេដ្ឋកិច្ច សង្គម និងបរិស្ថាន ដែលបណ្តាលមកពីថ្នាំជក់៕
