ភ្នំពេញ៖ សម្ដេច ហ៊ុន សែន នាយករដ្ឋមន្ដ្រីកម្ពុជា បានអំពាវនាវជាថ្មីម្ដងទៀតនៅថ្ងៃចន្ទ័នេះ ទៅកាន់អ្នកលក់ដូរទាំងអស់ កុំឱ្យលក់តម្លើងថ្លៃទំនិញក្នុងអំឡុងពេលពិធីបុណ្យចូលឆ្នាំប្រពៃណីខ្មែរ។
ការអំពាវនាវរបស់សម្ដេច ហ៊ុន សែន ដូចនេះធ្វើឡើងក្នុងពិធីសម្ពោធមហាវិថីសម្ដេចតេជោ ហ៊ុន សែន” ហៅផ្លូវ៦០ម៉ែត្រ ដែលជាផ្លូវធំដំបូងគេក្នុងរាជធានីភ្នំពេញ។
នេះមិនមែនជាលើកទី១ទេដែលសម្តេចនាយករដ្ឋមន្ត្រីហ៊ុន សែន បានអំពាវនាវមិនឲ្យទំនិញឡើងថ្លៃក្នុងឱកាសពិធីបុណ្យចូលឆ្នាំប្រពៃណីខ្មែរ។ប៉ុន្តែការអំពាវនាវកន្លងមកហាក់ដូចជាមិនបានទទួលផលច្រើននោះទេ។ ពិធីចូលឆ្នាំខ្មែរនឹងប្រព្រឹត្តិទៅនៅថ្ងៃទី១៤ ១៥ និងថ្ងៃទី១៦ខែមេសានេះ។
សម្ដេច ហ៊ុន សែន បានបន្ថែមថា ៖« អ្នក(លក់ដូរ)ដែលឆ្លាតលក់ចំណេញតិច តែលក់បានច្រើន រីឯអ្នក(លក់ដូរ)ដែលល្ងង់លក់ចំណេញច្រើន តែលក់បានតិច»។
នៅក្នុងពិធីដដែលនេះសម្ដេច ហ៊ុន សែន ក៏បានអំពាវនាវដល់តំបន់ទេសចរណ៍នានាប្រឹងប្រែងទាក់ទាញភ្ញៀវទេសចរ ជាពិសេសអាជ្ញាធរគ្រប់គ្រងតំបន់ទេសចរណ៍ ត្រូវរៀបចំសណ្តាប់ធ្នាប់ឲ្យបានល្អ ផងដែរ៕
