បញ្ហាគ្រាប់មីននៅតែជាក្តីកង្វល់របស់រាជរដ្ឋាភិបាលកម្ពុជា និង ស្ថាប័នពាក់ព័ន្ធផ្សេងទៀត ក្នុងការស្វែងរកជំនួយធ្វើយ៉ាង ណាបោសសំអាតគ្រាប់មីនដែលមិនទាន់ផ្ទុះឱ្យអស់ត្រឹមឆ្នំា ២០២៥ នៅតាមតំបន់មួយចំនួនក្នុងប្រទេសកម្ពុជា។ ការណ៍នេះ ថ្នាក់ដឹកនាំ CMAC ស្នើឱ្យដៃគូពាក់ព័ន្ធជាពិសេសអាមេរិក បន្តផ្តល់ជំនួយបន្តទៀតដល់ប្រទេសកម្ពុជា។

ការស្នើនេះ បន្ទាប់ពីឯកអគ្គរដ្ឋទូតអាមេរិកប្រចំាកម្ពុជាលោក William Heidt ថ្លែងថា អាមេរិកបានផ្តល់ជំនួយថវិកាប្រមាណ ៦ លានដុល្លារអាមេរិកក្នុងឆ្នំា ២០១៦ ដើម្បីបោសសំអាតមីនទៅដល់អង្គការសំអាតមីនទំាងអស់ក្នុងប្រទេសកម្ពុជា ហើយ ក្នុងចំនោមថវិកាប្រមាណ ៦ លានដុល្លារនេះ CMAC ទទួលបាន ២លានដុល្លារអាមេរិកផងដែរ។

ឆ្លើយតបនឹងការផ្តល់ថវិកា នេះអគ្គនាយកមជ្ឈមណ្ឌលសកម្មភាពកំចាត់មីនលោក ហេង រតនា ទទួលស្គាល់ថា អាមេរិកពិត ជាបានផ្តល់ជំនួយមកដល់កម្ពុជាពិតប្រាកដមែន តែលោកថា ការផ្តល់ជំនួយនេះនៅមានកម្រិតនៅទ្បើយ។

ការណ៍នេះលោក ហេង រតនា ស្នើឱ្យអាមេរិកបន្ត ផ្តល់ជំនួយបន្ថែមទៀតដល់កម្ពុជាដើម្បីបន្តបោសសំអាតគ្រាប់មីនទូទាំង ប្រទេសកម្ពុជា។ លោក ហេង រតនា ៖«មើលឃើញរដ្ឋាភិបាលសហរដ្ឋអាមេរិកដែលកន្លងមកទោះបីជាជំនួយនេះនៅក្នុង កម្រិតមិនទាន់ឆ្លើយតបតាមកម្រិតយើងត្រូវការក៏ដោយប៉ុន្តែបានជួយសម្រាលនូវការលំបាកយ៉ាងច្រើននូវកិច្ចសហប្រតិបត្តិការរបស់យើងមួយចំនួនដែរ សំណូមពរដល់ដៃគូទំាងអស់ជាពិសេសរដ្ឋាភិបាលអាមេរិកបន្តពិចារណាផ្តល់ការគំាទ្រ ព្រោះមានតែកិច្ចសហប្រតិបត្តិការល្អទេទើបយើងអាចធានាបាននូវការរីកចំរើនជាមួយគ្នា»។

ជុំវិញរឿងនេះឯកអគ្គរដ្ឋទូតអាមេរិកប្រចំាកម្ពុជាលោក William Heidt បានថ្លែងថា សហរដ្ឋអាមេរិកនៅតែដើរតួនាទីជួយ ដោះស្រាយបញ្ហាយុទ្ធភណ្ឌមិនទាន់ផ្ទុះ ដែលអាមេរិកធ្លាប់បានទម្លាក់គ្រាប់បែកមកលើប្រទេសកម្ពុជាក្នុងអំឡុងសម័យ សង្គ្រាមវៀតណាម។

លោក William Heidt បន្តថា លោកមានមោទនភាព និងកោតសរសើរប្រទេសកម្ពុជា ចំពោះកិច្ចខិតខំប្រឹងប្រែ និងបាននំា មុខគេក្នុងការរុករាវគ្រាប់មីនជាអន្តរជាតិនៅរយៈ ២០ ឆ្នំាចុងក្រោយនេះ។ យ៉ាងណា លោកឯកអគ្គរដ្ឋទូតសហរដ្ឋអាមេរិក មិនទាន់អាចបញ្ជាក់ពីកញ្ចប់ថវិកាដែលអាមេរិកនឹងផ្តល់ឱ្យកម្ពុជានៅឡើយទេសម្រាប់ឆ្នាំ ២០១៧។ លោក William Heidt ៖ «យើងនឹងដាក់ចិត្តដើម្បីគាំទ្រការសំអាតមីនក្នុងតំបន់ដែលមានយូអេសអូមកពីអាមេរិក។ អាមេរិកគាំទ្រយ៉ាងមុតមំា គោលដៅរបស់រដ្ឋាភិបាលកម្ពុជាដើម្បីសំអាតគ្រាប់មីនទំាងអស់នៅមុនឆ្នំា២០២៥ ដើម្បីសម្រេចគោលដៅនោះទាមទារ ឱ្យយើងមានសហប្រតិបត្តិការយ៉ាងជិតស្និទ្ធិរវាងរដ្ឋាភិបាលនិងដៃគូទំាងអស់»។

តាមការឱ្យដឹងពីអគ្គនាយក CMAC លោក ហេង រតនា ថា កម្ពុជាត្រូវការថវិកាប្រមាណជាង ៤០០ លានដុល្លារអាមេរិកដើម្បី បោសសំអាតគ្រាប់មីនឱ្យអស់នៅត្រឹមឆ្នំា ២០២៥។

សូមជំរាបថា ចាប់តំាងពីឆ្នំា ១៩៩៣ មកដល់ឆ្នំា២០១៦ រដ្ឋាភិបាលអាមេរិកបានចំណាយថវិកាអស់ជាង ១២០ លានដុល្លារ សម្រាប់កម្មវិធីបំផ្លាញអាវុធ និងយុទ្ធភណ្ឌមិនទាន់ផ្ទុះ ផ្តល់ការអប់រំស្តីពីគ្រោះថ្នាក់គ្រាប់មីន ជួយពង្រឹងសមត្ថភាពនៅថ្នាក់ ជាតិ៕