ភ្នំពេញ៖ នាយកប្រតិបត្តិអង្គការកម្មវិធីអភិវឌ្ឍន៍ធនធានយុវជន (YRDP) លោក ជាង សុខា ថា បន្ទប់ ស្ថាន ការណ៍មួយស្តីពីការបោះឆ្នោតជ្រើសរើសក្រុមប្រឹក្សា ឃុំ សង្កាត់ ឆ្នាំ២០១៧ ដែល មាន សមាជិកជិត ៤០ អង្គការខ្វះថវិកាប្រមាណ១០ម៉ឺនដុល្លារទៀតដើម្បី ជ្រើសរើស អ្នកសង្កេត ការណ៍ការតាមដានការបោះឆ្នោតក្រុមប្រឹក្សាឃុំសង្កាត់។
លោក ជាង សុខា នាយកប្រតិបត្តិអង្គការកម្មវិធី អភិវឌ្ឍន៍ធនធានយុវជន គិតត្រឹមថ្ងៃទី ២៤ ខែមីនា ឆ្នាំ២០១៧នេះ បន្ទប់ស្ថានការណ៍ស្តីពីការបោះឆ្នោតជ្រើសរើសក្រុមប្រឹក្សា ឃុំ សង្កាត់ ឆ្នាំ២០១៧ នៅខ្វះថវិកា ១០ ម៉ឺន ដុល្លារ។ លោក សុខា អះអាងថា បន្ទប់ស្ថានការណ៍ប្រកាសប្រមូលថវិកាពីសប្បុរសជន ចាប់តាំងពីខែកុម្ភៈ ឆ្នាំ២០១៧ រហូតមកដល់បច្ចុប្បន្ននេះ ទទួលថវិកាបានប្រមាណ ១៩០០០ ដុល្លារអាមេរិក។
លោកបញ្ជាក់ថា ថវិកាដែលទទួលនឹងចំណាយសម្រាប់អ្នកសង្កេតការណ៍ជាង៨០០នាក់។ «ដោយសារតែយើងនៅខ្វះប្រហែលជា ១០ ម៉ឺនដុល្លារសម្រាប់អ្នកសង្កេតការណ៍ ៩ពាន់នាក់ជាង អញ្ចឹងក្នុងនាមបន្ទប់ស្ថានការណ៍យើងអំពាវនាវឱ្យប្រជាពលរដ្ឋហ្នឹងអាចចូលរួមចំណែក្នុងការគាំទ្រអ្នកសង្កេតការណ៍ដែលមានថវិកា២២ដុល្លារសម្រាប់អ្នកសង្កេតការណ៍ម្នាក់» ។
ការបោះឆ្នោតក្រុមប្រឹក្សាឃុំ សង្កាត់ នឹងប្រព្រឹត្តិទៅនៅថ្ងៃទី៤ ខែមិថុនា ឆ្នាំ២០១៧ខាងមុខនេះ ដែលមានឃុំ សង្កាត់ ចំនួន ១៦៤៦ និងការរិយាល័យទូទាំងប្រទេសចំនួន ២២១៤៨ការិយាល័យ៕
