ភ្នំពេញ៖ បន្ទាប់ពីតុលាការកំពូលបើកសវនាការលើបណ្ដឹង សុំនៅក្រៅឃុំ របស់លោក នី ចរិយា អគ្គលេខាធិការរង គ.ជ.ប នៅព្រឹកថ្ងៃទី ២៤ ខែមិនា ឆ្នាំ ២០១៧នេះរួចមក តុលាការសម្រេចលើកពេលប្រកាសលទ្ធផលនៅថ្ងៃទី ៣១ មិនា វិញ។
ក្នុងរឿងនេះដែរ លោក សំ សុគង់ មេធាវីការពារក្ដីអោយលោក នី ចរិយា បានប្រាប់អ្នក សារព័ត៌មានថា លោករំពឹងថា តុលាការនឹងសម្រេចឱ្យកូនក្ដីខ្លួន បាននៅក្រៅឃុំ។
ក្នុងសំណុំរឿងស្នេហាលួចលាក់ដែលគេសង្ស័យថា ជាលោកកឹម សុខា បច្ចុប្បន្នជាប្រធាន គណបក្សសង្គ្រោះជាតិ ជាមួយ នាងខុមចាន់តារាទីហៅស្រីមុំ នេះ មានជនត្រូវចោទចំនួន ៤រូបទៀត ដែលជាមន្ដ្រីសមាគមអាដហុក រួមមាន លោក នី សុខា លោក ណៃ វង់ដា លោកស្រី លឹម មុនី និងលោក យី សុខសាន្ដ ក្នុងបទល្មើសសូកប៉ាន់សាក្ស៊ី នេះផងដែរ។
ទាំងសាលាដំបូង និងសាលាឧទ្ធរណ៍តែងតែបដិសេធបណ្ដឹងសុំនៅក្រៅឃុំរបស់អ្នកទាំង ៥រូបនេះ ជារឿយៗ ។
កាលពីពេលថ្មីៗនេះ ឧត្ដមស្នងការអង្កការសហប្រជាជាតិផ្នែកសិទ្ធិមនុស្ស បានចេញសេចក្ដី ថ្លែងការណ៍ ដោយថ្កោលទោសបញ្ហាសិទ្ធិមនុស្សនៅកម្ពុជា។ក្នុងសេចក្ដីថ្លែងការណ៍ដដែលនោះ ក៏មានការលើកឡើងពីការឃុំខ្លួនរយៈពេលវែង លើមន្ដ្រី អាដហុក និងមន្ដ្រី គ.ជ.ប ដោយមិនបានសវនាការជំនុំជម្រះ៕
