ភ្នំពេញ ៖ សាលាដំបូងរាជធានីភ្នំពេញ នៅថ្ងៃទី២៣ មីនានេះ បានផន្ទាទោស ឈ្មោះ អឿត អាង ហៅជួបសម្លាប់ ឱ្យជាប់ពន្ធនាគារអស់មួយជីវិត ករណីបានបាញ់សម្លាប់លោកបណ្ឌិត កែម ឡី។ តែពលរដ្ឋដែលតាមដានរឿងនេះ បានប្រាប់វិទ្យស្ត្រីថា ទោសទណ្ឌដែលជួបសម្លាប់បានទទួលនេះសមរម្យ តែចង់ឱ្យតុលាការវែកមុខរកអ្នកបញ្ជាមកផ្ដន្ទាទោស។យ៉ាងណាមេធាវីលោកជួបសម្លាប់ ថាអាចមានអ្នកពាក់ព័ន្ធពីរនាក់ទៀតក្នុងរឿងនេះ។
ក្នុងបន្ទាប់សវនាការសាលទី១ នៃសាលាដំបូងរាជធានីភ្នំពេញ ចៅក្រមលោក លាង សំណាត់ បានប្រើពេលប្រមាណ ៣០នាទី ដើម្បីអានសំអាងហេតុ និងប្រកាសសាលក្រមលើឈ្មោះ អឿត អាង ហៅជួបសម្លាប់ ឱ្យជាប់ពន្ធនាគារអស់មួយជីវិត ពីបទឃាតកម្មគិតទុកជាមុន និងកាន់កាប់អាវុធដោយគ្មានការអនុញ្ញាត ប្រព្រឹត្តលើលោកបណ្ឌិត កែម ឡី។
ជនជាប់ចោទស្ថិតក្នុងសម្លៀកបំពាក់អ្នកទោសពណ៌ស្លាទុំ ឈរក្នុងរង្វង់ក្រចកសេះ ជួបសម្លាប់មិនបានបញ្ចេញប្រតិកម្មតបអ្វីនោះទេ ពេលចៅ ក្រមប្រកាសឱ្យខ្លួនជាប់គុកមួយជីវិត។
ចំណែកមេធាវីការពារក្តីឱ្យ ជួប សម្លាប់ លោក យុង ផានិត បានប្រាប់អ្នកសារព័ត៌មានថា លោកហាក់ខកចិត្តបន្តិចព្រោះតុលាការមិនបានបន្ធូរបន្ថយទោសកូនក្ដីខ្លួន។
លោកមេធាវីបញ្ជាក់ថាការពិតលោកធ្លាប់បានស្នើដល់តុលាការឱ្យបំបែករឿងនេះជាពីរ ព្រោះនៅមានជនសង្ស័យពីររូបទៀត គឺឈ្មោះ ប៉ូលិល និងឈ្មោះចក់ មិនទាន់នាំមកសាកសួរ ដែលអ្នកទាំងពីរម្នាក់ជាអ្នកទិញអាវុធឱ្យជួបសម្លាប់ និងម្នាក់ទៀតជាអ្នកនាំជួបសម្លាប់ឱ្យជួបបណ្ឌិត កែម ឡី នៅថ្ងៃប្រព្រឹត្ត។ លោក យុង ផានិត៖« យើងឃើញថា សំនុំរឿងនេះអ្នកទាំងពីរហ្នឹង[ប៉ូលិល និង ចក់] មិនទាន់មានចម្លើយអ្វីទាំងអស់ វាហាក់ដូចសាវតាជាតិអត់គ្រប់គ្រាន់។ អញ្ចឹងយល់ឃើញថាការបំបែកសំនុំរឿង គឺជានីតិវិធីមួយសម្រាប់ធ្វើការស៊ើបអង្កេតអ្នកផ្សេងៗដែលពាក់ព័ន្ធ។»
លោកបណ្ឌិត កែម ឡី ត្រូវបានគេទទួលស្គាល់ថា ជាអ្នកហ៊ានវិភាគបញ្ហាចំៗលើភាពអវិជ្ជមានរបស់រដ្ឋាភិបាលបច្ចុប្បន្ន។ លោកត្រូវបានឃាតករបាញ់សម្លាប់នៅក្នុងស្តារម៉ាតក្បែរស្តុបបូកគោ ក្នុងរាជធានីភ្នំពេញ កាលពីថ្ងៃទី១០ កក្តដា ឆ្នាំ២០១៦ បន្ទាប់ពីលោកបានធ្វើការវិភាគលើរបាយ ការណ៍របស់ គ្លបល វិនេស (Global Witness) ដែលបានបកអាក្រាតលើជំនួញគ្រួសារត្រកូលហ៊ុន របស់លោកនាយករដ្ឋមន្ត្រី ហ៊ុន សែន។
ក្នុងអំឡុងពេលធ្វើពិធីបុណ្យសព និងពិធីដង្ហែរសពលោកបណ្ឌិត កែម ឡី មន្ត្រីទូត មន្ត្រីអង្គការសង្គមស៊ីវិល និងពលរដ្ឋរាប់សែននាក់ បានមកចូលរួមរំលែកទុក្ខនៃក្រុមគ្រួសារសព និងបានចូលដង្ហែសពយ៉ាងច្រើនកុះករទៅបញ្ចុះសពលោកនៅស្រុកកំណើតនៅឯខេត្តតាកែវ។
អារម្មណ៍ពលរដ្ឋនៅពេលដឹងថាលោកជួបសម្លាប់ត្រូវបានផ្ដន្ទាទោសមួយជីវិត
ចំណែកលោក កែវ ផល្លា អ្នករត់តុកតុកមួយរូបទៀតលើកឡើងថា សាលក្រមនេះមិនបានផ្តល់ភាពយុត្តិធម៌ដល់ក្រុមគ្រួសារជនរងគ្រោះនោះទេ។
លោកបន្តថា វីដេអូ ដែលបានបង្ហោះជាសាធារណលើបណ្តេញសង្គមហ្វេសប៊ុក គឺមិនស៊ីចង្វាក់គ្នានិងការប្រព្រឹត្តរបស់ ជួបសម្លាប់ នោះទេ។លោក កែវ ផល្លា៖ «ខ្ញុំមើលតាមវីដេអូ គឺបាញ់ហើយ គាត់រត់ចេញមក ប៉ូលិសជិះម៉ូតូតាមទៅកៀកឈប់មកតិចទៅ ហើយរត់ទៅទៀត បានប៉ូលិសមកចាប់ហើយយកម៉ូតូមកដឹកអាចអ្នកប្រព្រឹត្តមកកន្លែងវិញ អញ្ចឹងបានសេចក្តីថា អ្នកហ្នឹងគេរៀបចំរួចទៅហើយ»។
លោក ជិន សុផាជានិស្សិតមួយរូប មិនជឿថា ជនដៃដល់អាចសម្លាប់លោក កែម ឡី ក្រោមហេតុផលត្រៀមតែជំពាក់ប្រាប់ ៣ ពាន់ដុល្លារនោះទេ ។ លោកសុំឱ្យតុលាការស្វែងរកឃាតករពិតដែលប្រព្រឹត្តលើ លោកបណ្ឌិត កែម ឡី។ លោក ជិន សុផា៖«សូមសំណុំឱ្យតុលាការខ្មែរយើងស្វែងរកជនដៃដល់ដែលសម្លាប់លោកបណ្ឌិត កែម ឡី ព្រោះខ្ញុំជឿថា មិនមែន ជួប សម្លាប់ហ្នឹងទៅសម្លាប់លោកបណ្ឌិត កែម ឡី ដោយសារជំពាក់លុយ៣ ពាន់ដុល្លារនោះទេ។»
អឿត អាង ហៅជួបសម្លាប់ត្រូវបានតុលាការសម្រេចដាក់ពន្ធនាគារអស់មួយជីវិត ក្រោមបទចោទឃាត កម្មគិតទុកជាមុន នៃមាត្រា២០០ និងបទកាន់កាប់អាវុធដោយគ្មានការអនុញ្ញាតតាមមាត្រា ៤៩០ នៃក្រមព្រហ្មទណ្ឌ។ ជួបសម្លាប់តែងតែសារភាពថា ខ្លួនពិតជាបានសម្លាប់លោកបណ្ឌិត កែម ឡី មែន។
ស្របពេលនេះដែរ លោក សម រង្ស៊ី អតីតប្រធានគណបក្សសង្គ្រោះជាតិបានអំពាវនាវឱ្យតុលាការផ្អាកការចេញសាលក្រមនេះ ដោយសារតែក្រុម ហ៊ុន ឆឺវូរុន នៅអាមេរិកអាចនឹងចេញវីដេអូកាំមេរ៉ាសុវត្ថិភាព អំពី ឃាតកម្មលើលោកកែម ឡី ដែលត្រូវបានថត ដោយកាំមេរ៉ាសុវត្ថិភាពក្នុងពេលកើតហេតុ៕
