ភ្នំពេញ៖ តុលាការសាលាដំបូងរាជធានីភ្នំពេញនៅព្រឹកថ្ងៃព្រហស្បត្តិ៍ ទី ២៣ មិនានេះ បានសម្រេចផ្ដន្ទាទោសលើជនចោទ ជួប សម្លាប់ ដោយមានទោសអស់មួយជីវិត ករណីឃាតកម្មលើអ្នកវិភាគនយោបាយលោកបណ្ឌិត កែម ឡី។
លោក កែម ឡី ត្រូវបានបាញ់សម្លាប់នៅក្នុងស្ដាម៉ាតកាលពីថ្ងៃទី ១០ កក្កដា កាលពីឆ្នាំ ២០១៦ ដែលភ្លាមៗនោះ ជនចោទត្រូវបានសមត្ថកិច្ចចាប់ខ្លួន ហើយជនជាប់ចោទនេះ អះអាងថា ខ្លួនពិតជាបានសម្លាប់លោកកែម ឡី ដោយសារជំពាក់លុយ ៣ពាន់ដុល្លារ។
ក្នុងការប្រកាសសាលក្រមព្រឹកមិញនេះ គឺ នៅចំពោះមុខលោក ជួប សម្លាប់ និងមេធាវីរបស់លោក។
លោក យ៉ុង ផានិត មេធាវីរបស់ខ្មាំន់កាំភ្លើងនេះ បាននិយាយប្រាប់អ្នកសារព័ត៌មានថា បើទោះជាលោកជួបសម្លាប់ទទួលយកសាលក្រមនេះក៏ដោយ ប៉ុន្ដែ លោក មេធាវីចង់ឱ្យតុលាការសម្រេចសម្រាលទោសតិចតួចដល់ជនជាប់ចោទ ព្រោះជនជាប់ចោទបានសហការជាមួយតុលាការ។
យ៉ាងណាក៏ដោយ សាលក្រមនេះ ពុំបានធ្វើអោយភ្ញាក់ផ្អើលដល់អ្នកសង្កេតការណ៍ និងក្រុមអ្នកការពារសិទ្ធិមនុស្សនោះទេ ដោយសារតែពួកគេមិនមានជំនឿថា ជនជាប់ចោទនេះ ប្រព្រឹត្តដោយអារម្មណ៍ខ្លួនឯងនោះទេ។
ទោះបីយ៉ាងណា គ្រួសារលោកកែម ឡី ពុំបានពឹងពាក់មេធាវីដើម្បីតតាំងរឿងក្ដីនេះទេ ។ស្របពេលនេះដែរ លោក សម រង្ស៊ី អតីតប្រធានគណបក្សសង្គ្រោះជាតិបានអំពាវនាវឱ្យតុលាការផ្អាកការចេញសាលក្រមនេះ ដោយសារតែក្រុមហ៊ុន Cheveron នៅអាមេរិកអាចនឹងចេញវីដេអូកាំមេរ៉ាសុវត្ថិភាព អំពី ឃាតកម្មលើលោកកែម ឡី ដែលត្រូវបានថត ដោយកាំមេរ៉ាសុវត្ថិភាពក្នុងពេលកើតហេតុ៕
