ភ្នំពេញ៖ក្រសួងមហាផ្ទៃបានជូនដំណឹងទៅគណបក្សសង្គ្រោះជាតិថាសមាជវិសាមញ្ញជ្រើសរើសប្រធាន និងអនុប្រធានថ្មី របស់គណបក្សនេះ កាលពីពេលកន្លងទៅគឺខុសច្បាប់។ នេះបើយោងតាមសេចក្តីប្រកាសព័ត៌មានរបស់ក្រសួងមហាផ្ទៃ ចេញកាលពីថ្ងៃទី២២ មីនា ឆ្នាំ២០១៧។
សេចក្តីប្រកាសរបស់ក្រសួងមហាផ្ទៃ ដែលចុះហត្ថលេខាដោយសម្តេច ស ខេង បានបញ្ជាក់ថា បើផ្អែកតាមលក្ខន្តិកៈរបស់គណបក្ស ដែលបានតម្កល់ទុកនៅក្រសួងមហាផ្ទៃ ចុះថ្ងៃទី១០ ខែឧសភា ឆ្នាំ២០១៣ សមាជវិសាមញ្ញ បោះឆ្នោតជ្រើសតាំងលោក កឹម សុខា ជាប្រធាន លោក ប៉ុល ហំម លោកស្រី មូរ សុខហួរ និងលោក អេង ឆៃអ៊ាង ជាអនុប្រធាននៃគណបក្សសង្គ្រោះជាតិ គឺបានអនុវត្តផ្ទុយនឹងប្រការ៤៧ ត្រេទី២ នៃលក្ខន្តិកៈគណបក្ស។
ក្រសួងបានបញ្ជាក់ទៀតថា សមាជនេះខុសលក្ខន្តិកៈដោយអាណត្តិនៅសល់មានរយៈពេលតិចជាង១៨ខែ គិតត្រឹមកាលបិរច្ឆេទដែលលោក សម រង្ស៊ី បានលាលែងចេញ ពីតំណែងជាប្រធានគណបក្សនៅថ្ងៃទី១១ ខែកុម្ភៈ ឆ្នាំ២០១៧។ គណបក្សសង្គ្រោះជាតិ បានធ្វើសមាជវិសាមញ្ញ កាលពីថ្ងៃទី២ មីនា ឆ្នាំ២០១៧ ជ្រើសរើសប្រធាន និងអនុប្រធានថ្មី បន្ទាប់ពីលោក សម រង្ស៊ី បានលាលែងពីតំណែងជាប្រធានបក្សកាលពីដើមខែកុម្ភៈ៕
