ភ្នំពេញ ៖ ក្រសួងការបរទេសកម្ពុជានៅថ្ងៃនេះ បានចេញសេចក្តីថ្លែងការណ៍ប្រតិកម្មតបទៅនឹងរបាយការណ៍របស់ក្រុមសមាជិកសភាអាស៊ានដើម្បីសិទ្ធិមនុស្ស (APHR)ថាគ្មានមូលដ្ឋានច្បាស់លាស់ និងមិនឆ្លុះបញ្ចាំងការពិតរបស់កម្ពុជា ហើយថា របាយការណ៍នេះជាមានចរិតជ្រៀកជ្រែងកិច្ចផ្ទៃក្នុងរបស់សមាជិកអាស៊ាន តួយ៉ាងដូចកម្ពុជាជាដើម។
យ៉ាងណាមន្ត្រីបក្សប្រឆាំង និងអ្នកវិភាគថា របាយការណ៍របស់សមាជិកអាស៊ាននេះ មិនមែនជាការជ្រៀកជ្រែកកិច្ចការផ្ទៃក្នុងរបស់កម្ពុជានោះទេ ហើយថាកម្ពុជា គម្បីទទួលយកការរិះគន់ខ្លះៗ ដើម្បីស្ថាបនាប្រទេស។
ជាថ្មីម្តងទៀត កម្ពុជាតាមរយៈក្រសួងការបរទេសរបស់ខ្លួន បានចេញសេចក្តីថ្លែងការណ៍ជាផ្លូវការដោយប្រតិកម្មតបទៅនឹងរបាយការណ៍របស់ក្រុមសមាជិកសភាអាស៊ានដើម្បីសិទ្ធិមនុស្ស ដែលបានចេញផ្សាយវាយប្រហារកម្ពុជាថាសជារដ្ឋបង្ក អស្ថិរភាពនយោបាយ នៅមុនការបោះឆ្នោតជិតចូលមកដល់។
របាយការណ៍កម្រាស់ ៥២ ទំព័ររបស់សមាជិកសភាអាស៊ានដើម្បីសិទ្ធិមនុស្ស ចេញផ្សាយកាលពីថ្ងៃទី២០ មីនានេះក៏បាន វិភាគលើរលកវាយប្រហារសមាជិកសភាបក្សប្រឆាំងកាលពីពេលថ្មីៗ រួមទាំងការធ្វើទុក្ខបុកម្នេញតាមផ្លូវតុលាការ ដោយរំលោភនីតិវិធីនៃអភ័យឯកសិទ្ធិសភា និងការរំលោភបំពានលើរូបរាងកាយផងដែរ។
យ៉ាងណាក្រសួងការបរទេសកម្ពុជា បានប្រតិកម្មថា របាយការណ៍នេះមិនឆ្លុះបញ្ចាំងអំពីទស្សនៈរបស់សភាអាស៊ានឡើយ ហើយការវាយតម្លៃនេះពុំមានន័យណាមួយតំណាងឱ្យការវាយតម្លៃរបស់អាស៊ានឡើយ។
ក្នុងសេចក្តីថ្លែងការណ៍ប្រតិកម្មរបស់កម្ពុជានេះ ក៏ប្រតិកម្មទៅលើលោក Charles Santiago ប្រធានអង្គការសភាអាស៊ាន ដើម្បីសិទ្ធិមនុស្ស និងជាសមាជិកសភាម៉ាឡេស៊ី ថា បានជ្រៀកជ្រែកកិច្ចផ្ទៃក្នុងរបស់សមាជិកអាស៊ាន ដែលមានចែងក្នុងមាត្រា ២ នៃធម្មនុញ្ញអាស៊ាន។ស្របពេលនេះ កម្ពុជា អះអាងថាខ្លួន កំពុងដើរលើផ្លូវនីតិរដ្ឋនិង ប្រជាធិបតេយ្យ ល្អប្រសើរជាងប្រទេសមួយចំនួនជាសមាជិកអាស៊ាន។
តែបែបនេះក្ដី សមាជិកសភា មកពីគណក្សសង្គ្រោះជាតិ ដែលជាសមាជិករបស់ អង្គការសភាអាស៊ានដើម្បីសិទ្ធិមនុស្សបាន ច្រានចោលសេចក្តី ថ្លែងការណ៍របស់ក្រសួងការបរទេសកម្ពុជា ដែលថា មានការជ្រៀតជ្រែកចូលកិច្ចការផ្ទៃក្នុងកម្ពុជា។
លោកស្រី មួរ សុខហួរ អនុប្រធានគណបក្សសង្គ្រោះជាតិ និងជាសមាជិកសភាអាស៊ានដើម្បីសិទ្ធិមនុស្ស ប្រាប់វិទ្យុស្ត្រីថា របាយការណ៍របស់សមាជិកអាស៊ាន ដែលមានលោក សាន់ទីអាហ្គូ ជាប្រធាននេះ គឺសិទ្ធិសមាជិកសភា អាស៊ានដែលមានតួនាទីក្នុងការតាមដានពីបញ្ហាសិទ្ធិមនុស្ស និងលទ្ធិប្រជាធិបតេយ្យគ្នាទៅវិញទៅមក។ លោកស្រីទទូចថា រាជរដ្ឋាភិបាលគួរចេះទទួលយកការរិះគន់ដើម្បី ពង្រឹកការដឹកនាំប្រទេសបែបប្រជា ធិបតេយ្យពិតៗ។ លោកស្រី មួរ សុខហួរ៖«ខ្ញុំយល់ឃើញថា រឿងអាស៊ានជារឿងយើង សិទ្ធិមនុស្សជារឿងយើងទាំងអស់គ្នា ដើម្បីឱ្យសហគមន៍អាស៊ានទាំងមូលហ្នឹង នៅគ្រប់ប្រទេសទាំងអស់អាចលើកស្ទួយពិតប្រាកដនូវសិទ្ធិមនុស្ស សិទ្ធិប្រជាពលរដ្ឋជាពិសេស ឱ្យមានលទ្ធិប្រជាធិបតេ យ្យពិប្រាដកនៅអាស៊ាន។»
តែសម្រាប់លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយ និយាយថា របាយការណ៍របស់សមាជិកសភាអាស៊ានដែលរិះគន់ពីបញ្ហាសិទ្ធិមនុស្ស និងលទ្ធិប្រជាធបតេយ្យស្តីពីកម្ពុជាគឺធ្វើឡើងក្នុងក្របខណ្ឌនៃការបញ្ចេញមតិរបស់អាស៊ាន។ លោកយល់ថាប្រតិកម្មតបរបស់កម្ពុជាក៏ជាសេរីភាពអាចប្រព្រឹត្តទៅបានផងដែរ តែកម្ពុជាមិនគួរធ្វើការព្រមានសមាជិកអាស៊ានទេ ព្រោះសមាជិកអាស៊ានមានសិទ្ធិបញ្ចេញមតិ។
យ៉ាងណាលោក ឯម សុវណ្ណារ៉ា លើកទឹកចិត្តឱ្យរដ្ឋាភិបាលកម្ពុជា កុំព្យាយាមបដិសេធរបាយការណ៍ដែលរកពីភាពអវិជ្ជមានច្រើនពេក ហើយព្យាយាមកែតម្រូវតាមដែលអាចធ្វើបានដើម្បីការរីកចំរើនលទ្ធិប្រជាធិបតេយ្យរបស់កម្ពុជា។ លោក ឯម សុវណ្ណារ៉ា៖«ការរំលោភសិទ្ធិមនុស្ស ការវៃតំណាងរាស្ត្រ ការមិនអាចរកឃើញឃាត់ករសម្លាប់ពលរដ្ឋ អាហ្នឹងវាបង្ហាញទិដ្ឋភាពពិតប្រាកដ អញ្ចឹង!ការបដិសេធយូរៗទៅ អាភាពបដិសេធរបស់ខ្លួនក៏វាអត់មានតម្លៃដែរ ធ្វើឱ្យអន្តរជាតិគេថា យើងមិនយកចិត្តទុកដាក់ទៅលើអ្នកដែលលើកឡើងដែរ។»
កន្លងមកគេសង្កេតឃើញថា កម្ពុជាតែងតែប្រតិកម្មចំពោះសហគមន៍អន្តរជាតិ ដែលរិះគន់បញ្ហាសិទ្ធិមនុស្សក្នុងនោះ កម្ពុជាបានវាយប្រហារតបវិញទៅលើ ក្រុមប្រឹក្សាសិទ្ធិមនុស្សអង្គការសហប្រជាតិ ករណីចាត់ទុកកម្ពុជា បច្ចុប្បន្នជារដ្ឋមួយប្រឈមឈមមុខនឹងគ្រោះថ្នាក់ខ្លាំងផ្នែកសិទិ្ធមនុស្ស សេរីភាព បញ្ចេញមតិនិងបំបិទសំឡេងប្រឆាំង៕
