អតីតប្រធានាធិបតីកូរ៉េខាងត្បូងប៉ាក គួនហេ ដែលត្រូវបានតុលាការដ្ឋធម្មនុញ្ញដកហូតអំណាចបានត្រឡប់ទៅគេហដ្ឋានរបស់លោកស្រីវិញ នៅព្រឹកព្រលមថ្ងៃពុធនេះ បន្ទាប់ពីរដ្ឋអាជ្ញាបានឃាត់ខ្លួននិងសាកសួរហូតដល់ ២២ម៉ោង។
លោកស្រីមានទឹកមុខស្ងួត ហើយដើរសំដៅចូលរថយន្ដភា្លមដោយមិននិយាយមួយម៉ាត់ទៅកាន់អ្នកសារព័ត៌មានទោះបី អ្នកសារព័ត៌មានបានចោទសួរលោកស្រីជាច្រើនសំនួរក៏ដោយ។
ពួករដ្ឋអាជ្ញាបានចោទសួរលោកស្រីប៉ាក ជុំវិញសំណុំរឿងឧក្រិដ្ឋមួយពាក់ព័ន្ធអំពើពុករលួយនិងបំពានអំណាចរដ្ឋ។ ទោះជាយ៉ាងនេះក្ដីរដ្ឋអាជ្ញា មិនបានប្រាប់ថា ត្រូវកោះហៅលោកស្រីត្រឡប់មកវិញនៅថ្ងៃណានោះទេ។
លោកស្រីប៉ាក នៅឆ្នាំនេះ មានអាយុ ៦៥ឆ្នាំ ។ លោកស្រីគឺជាប្រធានាធិបតីដំបូងគេនៅសាធារណរដ្ឋកូរ៉េដែលត្រូវបានទម្លាក់ពីអំណាចដោយតុលាការដ្ឋធម្មនុញ្ញថ្ងៃទី ១០ មិនា ។
សំណុំរឿងរបស់លោកស្រីប៉ាក ប្រសិនបើរកកំហុសឃើញ គឺ លោកស្រី អាចប្រឈមមុខនឹងការជាប់ពន្ធនាគារ ១០ឆ្នាំ។ ក្នុងសំណុំរឿងនេះ បណ្ដាលឱ្យមនុស្សជិតស្និទ្ធលោកស្រី យ៉ាងតិច ៤នាក់ត្រូវបានរដ្ឋអាជ្ញាចាប់ខ្លួន ក្នុងនោះមាន លោកស្រី ឆយ ស៊ុនស៊ីល មិត្តភក្ដិរបស់លោកស្រី និងប្រធានក្រុមហ៊ុន SAMSUNG ។
អ្វីដែលនាំអោយលោកស្រីប៉ាកជួបរឿងបែបនេះ ដោយសារតែលោកស្រី ឆយ ស៊ុនស៊ីល ប្រើប្រាស់តួនាទីរបស់លោកស្រី ប៉ាក ជំរិតយកប្រាក់ពីក្រុមហ៊ុនមូលនិធិមនុស្សធម៌មួយចំនួន៕CNA
