ភ្នំពេញ ៖ លោកស្រី ម៉ែន សំអន ឧបនាយករដ្ឋមន្ត្រី លើកទ្បើង ថាវិស័យអប់រំកម្ពុជានៅមានបញ្ហា ប្រឈមនៅទ្បើយ។ ថ្លែងក្នុងសន្និបាទប្រចាំឆ្នាំរបស់ក្រសួងអប់រំ លោកស្រីបានសង្កត់ធ្ងន់ទៅលើការពង្រឹងគុណភាពក្នុងវិស័យអប់រំ។
«ពង្រឹងគុណភាពអប់រំនិងគុណភាពធនធានមនុស្សគឺជាកត្តាសំខាន់សំរាប់ភាពរឹងមាំនៃសេដ្ឋកិច្ចប្រទេសកម្ពុជា។» លោកស្រី ម៉ែន សំអន ឧបនាយករដ្ឋមន្ត្រីនិងជារដ្ឋមន្ត្រីក្រសួងទំនាក់ទំនងសភា ព្រឹទ្ធសភា បានគូសបញ្ជាក់យ៉ាងដូច្នេះនៅក្នុងសន្និបាតបូកសរុបការងារប្រចាំឆ្នាំរបស់ក្រសួងអប់រំ។
សន្និបាតដែលប្រារព្ធធ្វើនៅថ្ងៃអង្គារទី២១ខែមិនានេះក្នុងទីក្រុងភ្នំពេញសំរាប់រយៈពេលបីថ្ងៃ។ ប៉ុន្តែ ដំណាលគ្នានេះ លោកស្រី ម៉ែន សំអន ដើម្បីធានាដល់ការសំរេចទិសដៅនេះក្រសួងអប់រំ យុវជន និងកីទ្បាត្រូវប្រឈមនឹងបញ្ហាមួយចំនួនដូចជា៖«គុណភាពអប់រំ គុណភាពគ្រូ តុល្យភាពរវាងថ្នាក់រៀន និងចំនួនសិស្សដែលចេះតែកើនទ្បើងពីមួយឆ្នាំទៅមួយឆ្នាំ និងភាពស៊ីសង្វាក់គ្នារវាងការអប់រំ និងការបណ្តុះបណ្តាល និងទីផ្សារការងារ»។
ឆ្លើយតបនឹងការលើកទ្បើងនេះរដ្ឋមន្ត្រីក្រសួងអប់រំយុវជន និងកីទ្បា លោក ហង់ ជួនណារ៉ុន ទទួលស្គាល់ថាការលើកកំពស់គុណភាពអប់រំគឺជាកត្តាចាំបាច់ក្នុងពេលនេះ។«ទី១គឺពង្រឹងគុណភាពអប់រំបើសិនមានតែសញ្ញាបត្រប៉ុន្តែមិនមានគុណភាពក៏មិនអាចទៅរកការងារធ្វើបានល្អដែរ អញ្ចឹងបានជាក្រសួងពង្រឹងគុណភាពពីក្រោមមកតែម្តងពីថ្នាក់ទី១-៣ រហូតដល់ឧត្តមសិក្សា ទី២ ការផ្តល់ឱកាសឱ្យបានកាន់តែច្រើនឱ្យសិស្សហ្នឹងអាចទទួលបានប្រឹក្សាអាជីព»។
ចាប់តាំងពីក្រោយការបោះឆ្នោតជ្រើសតាំងតំណាងរាស្ត្រឆ្នាំ ២០១៣មក រាជរដ្ឋាភិបាលបានបង្ហាញឲ្យឃើញពីការរឹតបន្តឹងគុណភាពអប់រំជាច្រើន មានជាអាទិ៍ការពង្រឹងគុណភាពអប់រំតាមរយៈការរឹតបន្តឹងក្នុងពេលប្រឡង ការផ្តល់ជំនួយក្នុងការបង្រៀនបន្ថែមលើម៉ោងដែលមានស្រាប់ និងការពង្រឹងការរឹតបន្តឹងគុណភាពនៅតាមសាលាឯកជនផងដែរ។
លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា ទទូលស្គាល់ថានាពេលចុងក្រោយនេះការដាក់ចេញផែនការយុទ្ធសាស្ត្ររបស់ក្រសួងអប់រំក្នុងការកែទម្រង់វិស័យអប់រំស៊ីជម្រៅមានការរីកចំរើនគួរឱ្យកត់សម្គាល់។
ទោះជាយ៉ាំងណាលោក សន ជ័យ លើកឡងថាការទទួលបានសេវាអប់រំនឹងទទួលរងផលប៉ះពាល់ ប្រសិនបើយុវជនបញ្ចប់ការសិក្សា ដោយមិនមានទីផ្សារការងារគ្រប់គ្រាន់នោះ។«យើងចង់បាននូវយុទ្ធសាស្ត្ររួមមួយឧទាហរណ៍ថាក្រសួងអប់រំលើកយកយុទ្ធសាស្ត្រពង្រឹងគុណភាពអប់រំ ជាមួយគ្នាហ្នឹងវិស័យផ្សេងៗ វិស័យការងារ វិស័យដែលត្រូវការធនធានមនុស្សដែលចេញពីផ្នែកអប់រំត្រូវតែប្រឹងប្រែងដើម្បីផ្តល់ឱកាសឱ្យពលរដ្ឋ ក្រុមនិស្សិតបញ្ចប់ថ្នាក់ឧត្តមសិក្សាទទួលបានអត្ថប្រយោជន៍សមរម្យ ដូចជាប្រាក់បៀវត្សិ៍»។
តាម លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីទ្បា ក្រសួងអប់រំ ទទួលបានវឌ្ឍនភាពជាច្រើនក្នុងការកែទម្រង់របស់ខ្លួនកន្លងមក៕
