កំពង់ឆ្នាំង ៖ ប្រជាពលរដ្ឋជាច្រើនគ្រួសាររស់នៅតាមដងទន្លេសាប ស្ថិតក្នុងស្រុកកំពង់លែង ខេត្តកំពង់ឆ្នាំង កំពុងជួបប្រទះបញ្ហាផលសណ្តែក ខៀវធ្លាក់ថ្លៃយ៉ាងខ្លាំង ខណៈឈ្មួញអ្នកប្រមូលទិញបញ្ជាក់ថា សណ្តែកខៀវនាំចូលពី ប្រទេសភូមាកំពុងវាយលុកក្នុងទីផ្សារកម្ពុជាក្នុងតម្លៃថោក។
អ្នកស្រីថា សណ្តែកខៀវនៅឆ្នាំនេះបានធ្លាក់ថ្លៃមកត្រឹម ៣ ពាន់រៀលក្នុងមួយគីឡូក្រាម ដែលឆ្នាំមុនលក់បានមួយគីឡូ ៤ ពាន់រៀល។
អ្នកស្រីបន្ថែមថា បច្ចុប្បន្នកសិករកំពុងជួបបញ្ហាជំពាក់បំណុលធនាគារ និងប្រឈមបញ្ហាខ្វះខាតក្នុងជីវភាពរស់នៅ។ អ្នកស្រី ឈុំ សុភា៖«អ្នក ចំការវេទនាណាស់ ពិបាកនឹងអារឿងសណ្តែកចុះថោកហ្នឹង ធ្វើអត់បានហូប ណាថ្លៃច្រូត ណាថ្លៃថ្នាំ ឆ្នាំមុនៗ៤ពាន់ជាង ដល់ឥឡូវវាធ្លាក់នៅ២៨០០រៀលនេះ»។
តាមប្រភពពីពលរដ្ឋ ប្រជាពលរដ្ឋក្នុងស្រុកកំពង់លែង ដែលរស់នៅតាមដងទន្លេសាបភាគច្រើនប្រកបរបស់កសិកម្ម។ ដំណាំដែលពលរដ្ឋនិយមដាំគឺសណ្តែកខៀវ និងសណ្តែកលឿងហើយបន្ទាប់ពីប្រមូលផលសណ្តែកកសិករក៏និយមដាំពោតផងដែរ។
ទាក់ទិនបញ្ហាថ្លៃសណ្តែកធ្លាក់ថ្លៃនេះ លោក ជា សាន់ឌី ឈ្មួញប្រមូលទិញសណ្តែកពីកសិករមានប្រសា សន៍ថា មូលហេតុដែលនាំឱ្យសណ្តែក ខៀវឆ្នាំនេះធ្លាក់ថ្លៃច្រើន ដោយសារការវាយលុកផលិតផលសណ្តែកខៀវពីប្រទេសភូមាមកក្នុងទីផ្សារកម្ពុជា។ ប្រការមួយទៀតដែលនាំឱ្យតម្លៃសណ្តែកខៀវធ្លាក់ថ្លៃនេះ លោក សាន់ឌី បញ្ជាក់ថា ដោយសារកសិករប្រមូលផលសណ្តែកដោយប្រើម៉ាស៊ីន នាំឱ្យគ្រប់សណ្តែកបាត់បង់គុណ ភាព ធ្វើឱ្យតម្លៃក៏ស្រុតចុះផងដែរ។ លោក ជា សាន់ឌី៖«វាមកពីសណ្តែកភូមាឆ្លងកាត់ ហើយថោកជាងយើង ហើយមកមួយឆ្នាំទល់មួយឆ្នាំ។»
បញ្ហាធ្លាក់ថ្លៃផលដំណាំតែងតែកើតមានជារឿយៗនៅរដូវច្រូតកាត់ប្រមូលផលម្តងៗ។ កាលពីថ្ងៃទី ១៨ ខែកញ្ញា ឆ្នាំ២០១៦ ប្រជាកសិករក្នុងស្រុកសង្កែ ខេត្តបាត់ដំបង បានដឹងស្រូវមកចាក់លើកំណាត់ផ្លូវជាតិលេខ ៥ បន្ទាប់ពីតម្លៃស្រូវរបស់កសិករត្រូវបានឈ្មួញទម្លាក់ថ្លៃយ៉ាងខ្លាំង។
ដំណោះស្រាយនៅគ្រានោះ រដ្ឋាភិបាលបានបញ្ចេញថវិកាជាតិប្រមាណ ២៧លានដុល្លារ ដើម្បីសង្គ្រោះជាតិថ្លៃស្រូវរបស់កសិករ។ ចំណែកឈ្មួញដែលស្និទ្ធជាមួយរដ្ឋាភិបាលការបានប្រកាសជួយទិញស្រូវពីកសិករផងដែរ។
តែយ៉ាងណា ចំណាត់ការនេះត្រូវបានអ្នកជំនាញកសិករ និងសេដ្ឋកិច្ចមើលឃើញត្រឹមជាវិធានការណ៍ដោះស្រាយបញ្ហារយៈពេលខ្លីតែប៉ុណ្ណោះ។
លោក មាន ហ៊ុន ប្រធានមន្ទីរកសិកម្មខេត្តកំពង់ឆ្នាំង មានប្រសាសន៍ដោយទទួលស្គាល់ថា ផលសណ្តែករបស់ប្រជាកសិករក្នុងស្រុកកំពង់លែងពិតជាមានការធ្លាក់ថ្លៃមែន ខណៈដំណាំសណ្តែកនៅឆ្នាំនេះមានការដំដុះច្រើន។ យ៉ាងណាដំណោះស្រាយចំពោះមុខនេះ លោកប្រធានមន្ទីរនិយាយថា មន្ទីរនឹងចុះជួយអន្តរាគមន៍សម្របសម្រួលបញ្ហាតម្លៃសណ្តែកនេះជាមួយឈ្មួញកណ្តាល និងជួយស្វែងរកក្រុមហ៊ុនដើម្បីជួយទិញសណ្តែកពីពលរដ្ឋ។ លោក មាន ហ៊ុន៖«ជាយន្តការរបស់មន្ទីរកសិកម្ម នឹងសម្របសម្រួលជាមួយនឹងឈ្មួញកណ្តាល ឬក្រុមហ៊ុនណាដែលអាចទិញសណ្តែកហ្នឹងដើម្បីកុំឱ្យគាត់មានបញ្ហាបន្តទៀត។»
ដើម្បីចូលរួមចំណែកដោះស្រាយបញ្ហាតម្លៃផលិតផលកសិកម្មនេះ លោក ឡោ រស្មី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ និយាយថា ក្រសួងបានណែនាំដល់មន្ទីរកសិកម្ម និងអង្គភាពជំនាញពិនិត្យណែនាំកសិករឱ្យដាំដំណាំណាដែលមានភាពងាយស្រួលក្នុងការរកទីផ្សារពេលប្រមូលផល។ មួយវិញទៀត កសិករគប្បីធ្វើផលិតកម្មកសិកម្មតាមកិច្ចសន្យាជាមួយក្រុមហ៊ុននាំចេញ ដែលក្រសួងធ្វើជាសាក្សីដើម្បីកុំឱ្យមានការទម្លាក់តម្លៃ។
តាមអ្នកនាំពាក្យក្រសួងកសិកម្ម កន្លងមកកម្ពុជាបានចុះ MOU ជាមួយក្រុមហ៊ុនរបស់សាធារណរដ្ឋកូរ៉េ ក្នុងការនាំចេញស្វាយរបស់កសិករក្នុងខេត្តកំពុងស្ពឺ។ ចំណែកក្រុមហ៊ុនកុងហ្វីរ៉េ ក៏បានចុះកិច្ចសន្យានាំចេញម្រិចរបស់កសិករផងដែរ។ រីឯក្នុងខេត្តស្វាយរៀងវិញ ក៏មានក្រុមហ៊ុនប្រទេសជប៉ុនមួយបានចុះកិច្ចសន្យាជាមួយកសិករធ្វើនាំបន្លែគ្មានសារជាតិគីមីផងដែរ៕
