ភ្នំពេញ៖ គណបក្សប្រជាជនកម្ពុជា បានធានារ៉ាប់រងការចំណាយទាំងអស់ សម្រាប់ពិធីបុណ្យសពសម្តេច វិបុលបញ្ញា សុខ អាន រហូតដល់ចប់កម្មវិធីបុណ្យ។ គណបក្សកាន់អំណាចបានសម្រេចបង្វិល លុយចំនួន ៣០០០ លានរៀង ឬ ប្រហែល ៧៥ ម៉ឺនដុល្លារទៅឲ្យក្រសួងសេដ្ឋកិច្ច និងហិរញ្ញវត្ថុវិញ។
បើយោតតាមលិខិតរបស់គណបក្សប្រជាជនកម្ពុជា ចុះកាលពីថ្ងៃទី ១៨ ខែមីនា បានធានារ៉ាប់រងរាល់ការចំណាយទាំងអស់សម្រាប់ពិធីបុណ្យសពនេះ។ លិខិតដដែល បានអះអាងថា ថវិការដែលស្នើសុំពីក្រសួងសេដ្ឋកិច្ច និងហិរញ្ញវត្ថុចំនួន ៣០០០លានរៀល ឬប្រហែល ៧៥ ម៉ឺនដុល្លារ ដើម្បីចាត់ចែងក្នុងកម្មវិធីបុណ្យ សម្តេចសុខ អាន ត្រូវបង្វិលទៅឲ្យថវិការរដ្ឋវិញ។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានអះអាង ថា គណបក្សកាន់អំណាច នឹងធានារ៉ាប់រងរាល់ការចំណាយថវិការ សម្រាប់ពិធីបុណ្យសពសម្តេច វិបុលបញ្ញា សុខ អាន រហូត ដល់កម្មវិធីបុណ្យប្រាំពីរថ្ងៃ។
ប៉ុន្តែ លោក សុខ ឥសាន្ត មិនទាន់អាចប្រាប់អំពីខ្ទង់ចំណាយ សម្រាប់ពិធីបុណ្យសពសម្តេច សុខ អាន ចំនួនប៉ុន្មានបាននៅឡើយទេ។ «ខ្ញុំជម្រាប់ជូនការខ្ចី ៣០០០ លានរៀល មិនមែនចាយទាំំងអស់ទេ ចាយទៅតាមការជាក់ស្តែង គ្រាន់តែយកមកតម្កល់ទុកសិន។ ឥឡូវគណបក្សគិតថា ចំណាយនិងមិនចំណាយទាំំងអស់ទេ វាអាស្រ័យចាយវាយជាក់ស្តែងតែម្តង់ នៅដល់បុណ្យប្រាំពីរថ្ងៃទៀត យើងឲ្យដឹងចំនួនតួរលេខមិនកើត»។
អ្នកនាំពាក្យគណបក្សប្រជាជនកម្ពុជារូបនេះ បានបដិសេធថា ការបង្វិលលុយចំនួន ៣០០០លានរៀល ឬស្មើនិងប្រមាណ ៧៥ ម៉ឺនដុល្លារទៅឲ្យរដ្ឋវិញ ដោយសាររងការរិះគន់នោះទេ។ «ទេគ្រាន់តែដំបូង សម្តេច នាយករដ្ឋមន្ត្រី លោក ស្វេស្វាមិនទាន់ អញ្ចឹងមានតែខ្ចីលុយពីក្រសួងសេដ្ឋកិច្ច ហិរញ្ញវត្ថុសិន យកមក ដើម្បីតម្កល់ ព្រោះការចាយ មានបញ្ជី វិក័យប័ត្រត្រឹមត្រូវ មិនទៅធ្វើអ្វីផ្តេសផ្តាស់ឯណា។»
ទោះបីយ៉ាងណាអ្នកប្រើប្រាស់បណ្តាញសង្គមជាច្រើនរិះគន់ ចំពោះការស្នើសុំថវិការរាប់សិបម៉ឺនដុល្លារ ពីក្រសួងសេដ្ឋកិច្ច និងហិរញ្ញវត្ថុ ដើម្បីចាត់ចែងក្នុងកម្មវិធីបុណ្យ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា សាទរចំពោះការបង្វិលលុយប្រហែល ៧៥ ម៉ឺនដុល្លារ ទៅឲ្យរដ្ឋ ហើយការចំណាយទាំងអស់គណបក្សកាន់អំណាចជាអ្នកចាត់ចែងវិញនោះ។ «គណបក្សប្រជាជនកម្ពុជា សម្រេចប្រើប្រាស់ធនធានរបស់គណបក្ស ខ្ញុំគិតថា ជាជម្រើសមួយដ៏ល្អ ហើយជាអ្វីមួយដើម្បីដោះស្រាយទៅនិងចម្ងល់ទាក់ទងទៅនិងតម្លាភាពនៃការចាយលុយដែរ»។
លោក សន ជ័យ បានបង្ហាញទស្សនៈថា ប្រហែលរងការរិញគន់ពីប្រជាពលរដ្ឋ ទើបគណបក្សកាន់អំណាចសម្រេចបង្វិលលុយទាំងនោះទៅឲ្យរដ្ឋ ហើយប្រើប្រាស់ធនធានរបស់គណបក្ស ដើម្បីចំណាយសម្រាប់កម្មវិធីបុណ្យរបស់សម្តេច សុខ អាន។
សពសម្តេច សុខ អាន បានបូជានៅព្រឹកថ្ងៃទី ១៩ ខែមីនានេះ នៅមុខវត្តបទុមវតី្ត។
សម្តេច សុខ អាន បានទទួលមរណភាពនៅទីក្រុងប៉េកាំង ប្រទេសចិន ក្នុងអាយុ ៦៦ ឆ្នាំ ដោយសាររោគាពាធ កាលពីថ្ងៃទី ១៥ ខែ មីនា ឆ្នាំ ២០១៧៕
