ភ្នំពេញ៖ តំណាងមូលនិធិកូហ្វីអាណាន់សន្យាថា នឹងដាក់អ្នកអង្កេតការណ៍ឃ្លាំមើលដំណើរការបោះឆ្នោតជ្រើសរើសក្រមប្រឹក្សាឃុំសង្កាត់នៅកម្ពុជា តបតាមការស្នើសុំរបស់គណៈកម្មាធិការជាតិរៀបចំការបោះឆ្នោត នៅថ្ងៃទី ៤ ខែ មិថុនា ឆ្នាំ ២០១៧។
តំណាងមូលនិធីកូហ្វីអាណាន់ លោក Hassan Witajuda បានសន្យាថា នឹងដាក់អ្នកអង្កេតការណ៍ តាមការស្នើសុំរបស់គណៈកម្មាធិការជាតិរៀបចំការបោះឆ្នោត។
ការស្នើសុំរបស់គ.ជ.ប ធ្វើឡើងនៅក្នុងជំនួបពិភាក្សា ជាមួយតំណាងមូលនិធិកូហ្វីអាណាន់ កាលពីរសៀលថ្ងៃទី ១៧ ខែមីនា ម្សិលមិញ។
លោក Hassan Witajuda បានបញ្ជាក់ថា គោលបំណង់សំខាន់របស់មូលនិធិកូហ្វីអាណាន់គឺ ចូលរួមលើកកម្ពស់កិច្ចការបោះឆ្នោតនៅកម្ពុជាប្រកបសុចរឹតភាព និងតម្លាភាព។«មូលនិកូហ្វីអាណាន់ផ្ទាល់មានការបើកចំហរជាពិសេសពាក់ព័ន្ធនឹងអ្វីដែលលើកទ្បើងដោយ គ.ជ.បផ្ទាល់ដែលយើងធ្វើការសហការជាមួយសហគមន៍អន្តរជាតិជាពិសេសពាក់ព័ន្ធនឹងរដ្ឋាភិបាលក្តី ពាក់ព័ន្ធនឹងអង្គការសង្គមស៊ីវិលធ្វើការងារបោះឆ្នោតហ្នឹងក្តី»។
អ្នកនាំពាក្យ គ.ជ.ប លោក ហង្ស ពុទ្ធា បានមានប្រសាសន៍ថា ការស្នើសុំអ្នកអង្កេតអន្តរជាតិ តាមដានការបោះឆ្នោតក្រុមប្រឹក្សាឃុំ-សង្កាត់ ដើម្បីជាសាក្សីបន្ថែមទៀត។ លោកបានបង្ហាញក្តីសង្ឃឹងថា គណបក្សនយោបាយនឹងទាំងអស់មានសីលធម៌ខ្ពស់ក្នុងចូលរួបប្រកួតប្រជែងដោយគោរតាមតួនាទីរបស់ខ្លួន។«លើកជាចំនួនចំហរអញ្ចឹងកូហ្វីអាណាន់អាចមានលទ្ធភាពអញ្ចើញមកប៉ុន្មានគឺតាមចិត្តចង់របស់ក្រុមពួកគាត់។ សំណើរនេះគឺកំពុងមានពិភាក្សាហើយ ហើយខាងកូហ្វីអាណាន់ក៏ឆ្លើយតបដែរថាគាត់នឹងធ្វើការពិភាក្សាជាមួយក្រុមមូលនិធីរបស់ពួកគាត់ទៅលើបញ្ហាអ្វីដែលជាសំណើររបស់គ.ជ.ប»។
ក្រៅពីស្នើសុំដាក់អ្នកអង្កេតការណ៍ ស្ថាប័នគ.ជ.ប ក៏បានស្នើសុំឲ្យមូលនិធិកូហ្វីអាណាន់ ជួយធ្វើបទបង្ហាញអំពីសារសំខាន់នៃសុច្ចរឹតភាពទៅដល់គណបក្សនយោបាយនិងគ្រប់ភាគីពាក់ព័ន្ធផងដែរ។
គិតត្រឹមថ្ងៃទី ១៥ ខែ មីនា ឆ្នាំ ២០១៧ គ.ជ.ប បានអនុញ្ញាតឲ្យ អង្គការសង្គមស៊ីវិល និងសមាគមចំនួនពីរ ដែលបានដាក់ឈ្មោះស្នើសុំដាក់អ្នកអង្កេតការណ៍ចំនួន ៥២១ ដើម្បីអង្កេតការណ៍ដំណើរការបោះឆ្នោតក្រុមប្រឹក្សាឃុំ សង្កាត់។ ក្នុងនោះ អង្គការខមហ្វេលបានសុំដាក់អ្នកអង្កេតការណ៍ចំនួន ២៩៣ នាក់ និងសហភាពសហព័ន្ធយុវជនកម្ពុជា ដាក់អង្កេតការណ៍ចំនួន ២២៨នាក់។
គណបក្សនយោបាយចំនួន ១២ ចូលរួមប្រកួតប្រជែង ក្នុងនោះមានបេក្ខជនដែលត្រូវប្រកួតប្រជែងជាង ៩ ម៉ឺននាក់ ក្នុងការបោះឆ្នោតក្រុមប្រឹក្សាឃុំសង្កាត់៕
