ភ្នំពេញ៖ មន្ត្រីជាន់ខ្ពស់គណបក្សប្រជាជនកម្ពុជា បញ្ជាក់ថាលោក ប៊ិន ឈិន អាចនឹងទទួលដំណែងជាផ្លូវការជំនួសដំណែង សម្តេច សុខ អាន។ ប៉ុន្តែនៅមិនទាន់មានប្រភពណាមួយដែលអាចបញ្ជាក់ពីនិតិវិធីជាក់លាក់អំពីការឡើងជំនួសដំណែងសម្តេចសុខ អាន ជាផ្លូវការនោះទេ។
លោក ប៊ិន ឈិន ជាសមាជិកនៃគណៈកម្មាធិការកណ្តាល និងអចិន្ត្រៃយ៍នៃគណបក្សប្រជា ជនកម្ពុជា ទំនងជានឹងត្រូវតែងតាំងជាផ្លូវការជំនួសដំណែងសម្តេចសុខ អាន ឧបនាយករដ្ឋ មន្ត្រីនិងជារដ្ឋមន្ត្រីប្រចាំទីស្តីការគណរដ្ឋមន្ត្រី។
នេះបើតាមសេចក្តីអះអាងរបស់អ្នកនាំពាក្យគណបក្សប្រជាជនកម្ពុជា លោកសុខ ឥសាន។
សម្តេចវិបុលបញ្ញា សុខ អាន បានទទួលមរណភាពកាលពីថ្ងៃពុធ នៅទីក្រុងប៉េកាំង ក្នុងអាយុ៦៦ឆ្នាំ។ ភ្លាមៗនោះរាជរដ្ឋាភិបាលបានតែងតាំងលោកប៊ិន ឈិន ដែលមាននាទីជាប្រធានអាជ្ញាធរជាតិដោះស្រាយវិវាទដីធ្លី ឲ្យមកជំនួសតំណែងសម្តេចសុខ អាន។
លោកសុខ ឥសាន្ត ធានាអះអាងថា លោកប៊ិន ឈិន នឹងទទួលបានដំណែងនេះជាផ្លូវការ។
« ខ្ញុំជឿជាក់មួយភាគរយហើយ គឺ ឯកឧត្តម ប៊ិន ឈិន ព្រោះទីមួយ គាត់ជាឧបនាយករដ្ឋ មន្ត្រីទទួលបន្ទុកប្រចាំការរួចទៅហើយ រដ្ឋមន្ត្រីទីស្តីការ រដ្ឋមន្ត្រីនៅក្រោម ថ្នាក់ដឹកនាំកំពូលគឺ មាននាយករដ្ឋមន្ត្រី និងឧបនាយករដ្ឋមន្ត្រីនិង អញ្ចឹងមិនអាចទៅណាទេ មិនអាចយកអ្នកផ្សេង ព្រោះឯកឧត្តម ប៊ិន គាត់នៅគ្រប់ដណ្តប់នៅកន្លែងនិងស្រាប់។»
ទោះជាយ៉ាងណា លោក សុខ ឥសាន្ត មិនទាន់ដឹងប្រាកដថាតើការឡើងកាន់ដំណែងជាផ្លូវការរបស់លោកប៊ិន ឈិន ត្រូវឆ្លងកាត់ការបោះឆ្នោតផ្តល់សេចក្តីទុកចិត្តពីរដ្ឋសភាដែរឬយ៉ាងណា។
អ្នកនាំពាក្យទីស្តីការគណៈរដ្ឋមន្ត្រីលោកផៃ ស៊ីផាន អះអាងថា ករណីលោក ប៊ិន ឈិន មិនចាំបាច់ឆ្លង់កាត់សេចក្តីសម្រេចពីរដ្ឋសភាក៏បាន។
«បើយើងចង់បានរដ្ឋមន្ត្រីមួយ មកជំនួយឧត្តមឧប បើយើងអត់មានឧបនាយករដ្ឋមន្ត្រីប្រចាំ ការយើងត្រូវឆ្លង់សភា ករណីនេះយើងចង់ឆ្លង់សភាក៏បាន យើងមិនចង់ឆ្លង់សភាក៏បានព្រោះ(ប៊ិន ឈិន ជា)ឧបនាយករដ្ឋមន្ត្រី ប្រចាំការរួចស្រាចទៅហើយ។»
ដូចគ្នាដែរ លោក ឈាង វុន អ្នកនាំពាក្យរដ្ឋសភា មកពីគណបក្សប្រជាជនកម្ពុជា បានពន្យល់ដូចគ្នាទៅនិង លោក ផៃ ស៊ីផានដែរថា ស្តីការគណៈរដ្ឋមន្ត្រី មានឧបនាយករដ្ឋមន្ត្រីប្រចាំការរួចទៅហើយ មិនបាច់ត្រូវការសំឡេងពីរដ្ឋសភាឡើយ។
សម្តេចសុខ អាន បានកាន់កាប់តួនាទីយ៉ាងច្រើនក្រៅពីមុខដំណែងជាឧបនាយករដ្ឋមន្ត្រីនិងជារដ្ឋមន្ត្រីទីស្តីការគណរដ្ឋមន្ត្រី។តួនាទីទាំងនោះរួមមាន
-ប្រធានក្រុមប្រឹក្សាកំណែទម្រង់រដ្ឋបាល
- ប្រធានអជ្ញាធរអប្សារា
-ប្រធានអជ្ញាធរជាតិប្រេងកាតកម្ពុជា
-ប្រធានអជ្ញាធរជាតិដោះស្រាយទំនាស់ដីធ្លី
-ប្រធានគណៈកម្មាធិការទទួលស្គាល់គុណភាពអប់រំ នៃកម្ពុជា
-ប្រធានក្រុមប្រឹក្សាភិបាលរាជបណ្ឌិតសភាវិជ្ជាជីវៈតុលាការ
-ប្រធានក្រុមការងារដើម្បីកាត់ទោសខ្មែរក្រហម
-ក្រុមប្រឹក្សាភិបាលសាលាភូមិន្ទរដ្ឋបាល
-ប្រធានគណៈកម្មាធិការជាតិអវិនិយោគរបស់រដ្ឋ លើសហគ្រាសចំការកៅស៊ូ ក្រុម ហ៊ុន សំភារៈកសិកម្ម និង ក្រុមហ៊ុន ជលផល និងជាប្រធានរាជបណ្ឌិតកិត្តិយសសភា។
លោកផៃ ស៊ីផាន បញ្ជាក់ថា លោកប៊ិន ឈិន នឹងបំពេញភារកិច្ចទាំងអស់សរបស់សម្តេច សុខ អាន កាលពីសម្តេចនៅមានជីវិត។
លោក សុន ឆ័យ អ្នកតំណាងរាស្ត្រគណបក្សសង្គ្រោះជាតិមានប្រសាសន៍តាមទស្សនផ្ទាល់ខ្លួន ថាការប្រគល់មុខតំណែងជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីទៅឲ្យ លោក ប៊ិន ឈិន គឺជាបុគ្គលសាកសមបំផុត ព្រោះលោក ប៊ិន ឈិន គឺជាបុគ្គលស្អាតស្អំ។
«ខ្ញុំយល់ថាជានីតិវិធី ការផ្លាស់ប្តូរតែងតាំងគណៈរដ្ឋមន្ត្រីត្រូវតែមានការអនុម័តពីសភា ហើយដូចខ្ញុំបានបញ្ជាក់អញ្ចឹង គណបក្សសង្គ្រោះជាតិមិនទាន់ការប្រជុំពិគ្រោះយោបល់រឿងនិង ប៉ុន្តែសម្រាប់ខ្លួនខ្ញុំផ្ទាល់ខ្ញុំយល់ថា គួរតែយើងគាំទ្រគាត់។»
ក្រៅពីតួនាទីជាឧបនាយករដ្ឋមន្ត្រីប្រចាំការ នៃរាជរដ្ឋាភិបាល លោក ប៊ិន ឈិន ក៏ជាតំណាងរាស្ត្រមណ្ឌលព្រៃវែងផងដែរ៕
