ភ្នំពេញ៖សមគមក្រុមប្រឹក្សាអន្តរជាតិ ស្តីពីសៀវភៅសម្រាប់កុមារ និងយុវជន នឹងរៀបចំពិពណ៌សៀវភៅកុមារលើកទី៥ នៅថ្ងៃទី២៥ ខែមីនា ខាងមុខនេះ នៅសាលសន្និសីទចតុមុខ។ ក្នុងសន្និសិទសារព័ត៌មានមួយនៅថ្ងៃនេះក្រុមអ្នកជំនាញអះអាងថា នៅកម្ពុជាពុំទាន់មានសៀវភៅគ្រប់គ្រាន់សំរាប់ការអានរបស់កុមារនៅឡើយទេ។
ក្រុមអ្នកជំនាញដែលធ្វើការពាក់ព័ន្ធនឹងសៀវភៅសំរាប់កុមារ បានលើកឡើងថា សៀវភៅសម្រាប់កុមារអាន មិនមានគ្រប់គ្រាន់សម្រាប់កុមារអាននោះទេ ដោយសារការផលិតសៀវភៅមានបញ្ហាប្រឈមជាច្រើន។ កញ្ញា ហួត សុជាតា អ្នកគ្រប់គ្រង់កម្មវិធីបោះពុម្ពនៃអង្គការស៊ីប៉ា និងប្រធានសមាគម ក្រុមប្រឹ ក្សាអន្តរជាតិ ស្តីពីសៀវភៅសម្រាប់កុមារនិងយុវជន (IBBY ) ថ្លែងក្នុងសន្និសីទកាសែតមួយនៅថ្ងៃសុក្រ ទី១៧ មីនានេះ ថា ប្រភេទសៀវភៅសំរាប់កុមារដែលបានផលិតក្នុងមួយឆ្នាំៗ នៅមិនទាន់មានចំនួនគ្រាប់គ្រាន់សម្រាប់កុមារអាននោះទេ។
កញ្ញាបន្តថា មូលហេតុនៃការខ្វះខាតនេះ ដោយសារមានបញ្ហាប្រឈមច្រើនទាក់ទិននឹងការផលិត ដូចជាគ្មានអ្នកនិពន្ធ អ្នកគូរគំនូរ និងអ្នករចនាទំព័រដែលទាក់ទាញចិត្តកុមារជាដើម។ កញ្ញាបន្ថែមថា គ្រឹះស្ថានបោះពុម្ពខ្លះ ក្នុងមួយខែផលិតបានតែមួយ ឬពីរប្រភេទ ហើយខ្លះទៀតក៏មិនមានផលិតផងដែរ។
«ការផលិតសៀវភៅអត់ទាន់គ្រប់គ្រាន់ ដោយសារមានបញ្ហាទាំងអស់ហ្នឹង ហើយការផ្សព្វផ្សាយក៏មានការគ្រប់គ្រាន់ អត់មានការទូលំទូលាយប៉ុន្មានដែរ សៀវភៅកុមារដែលផលិតប្រកបដោយគុណភាពហ្នឹងដែលចេញទៅដល់តាមខេត្ត តាមតំបន់ឆ្ងាយ ឥឡូវនេះគឺសៀវភៅហ្នឹង អត់អាចទៅដល់ខេត្តបានដោយសារមានបញ្ហាមួយទៀត គឺការចែកចាយ»។
នៅប្រទេសកម្ពុជាមានគ្រឹះស្ថានបោះពុម្ពផ្សាយប្រមាណ៥០០ ប៉ុន្តែគ្រឹះស្ថានតែបោះពុម្ពប្រភេទសៀវភៅសំរាប់កុមារមានត្រឹមតែ ១០ប៉ុណ្ណោះ។ ម្យ៉ាងវិញទៀត ភាគច្រើននៃគ្រឹះស្ថានដែលបោះពុម្ពសៀវភៅកុមារគឺជាអង្គការ។
លោកស្រី ខ្លូត វិបុល្លា ប្រធានបណ្ណាល័យជាតិ មានប្រសាន៍នៅក្នុងសន្និកាសែតនៅថ្ងៃនេះដែរថា ក្នុងមួយឆ្នាំ ការផលិតសៀវភៅបានចំនួនពី៨០ ទៅ១០០ចំណងជើង ក្នុងនោះសៀវភៅប្រភេទកុមារ មានប្រមាណតែជាង ១០ចំណងជើងតែប៉ុណ្ណោះ។ «មិនសូវមានប៉ុន្តែគេបោះពុម្ពច្រើន ក្នុងមួយឆ្នាំពិតមែនមានតែតិចមែន ប៉ុន្តែគេមានបោះពុម្ពច្រើនសៀវភៅ»។
បើទោះជាការផលិតសៀវភៅកុមារមិនគ្រាប់គ្រាន់តាមតម្រូវការក៏ដោយ លោកស្រី ទន់ សាអ៊ីម អនុ រដ្ឋលេខាធិការក្រសួងអប់រំយុវជន និងកីឡា បានថ្លែងថា ក្រសួងអប់រំយុវជននិងកីឡា មិនមានគោល ការណ៍ក្នុងការបណ្តុះបណ្តាលអ្នកនិពន្ធសៀវបែបកុមារនោះទេ។ «អង្គការណាក្តីដែលមានសៀវភៅយកមក ចង់ចែកជូនសាលារៀន ក្រសួងអប់រំទទួលយកហើយ និងជញ្ជូនទៅដល់សាលារៀន អាហ្នឹងសុខចិត្តចេញលុយ ចំពោះថា គោលការណ៍តែនិពន្ធ បណ្តុះបណ្តាលអ្នកនិពន្ធអាហ្នឹងនៅក្នុងកម្រិតក្រសួងវប្បធម៌ទេ»។
បើតាមកញ្ញា ហួត សុជាតា អ្នកគ្រប់គ្រង់កម្មវិធីបោះពុម្ពនៃអង្គការស៊ីប៉ា និងប្រធានសមាគម ក្រុម ប្រឹក្សាអន្តរជាតិ កុមារកម្ពុជាចូលចិត្តអាន ប៉ុន្តែពួកគេគ្មានឱកាសនឹងបានអាន ដោយសារឪពុកម្តាយ មិនបានទិញសៀវភៅសម្រាប់អានឱ្យកូន ព្រោះយល់ថា កូនមិនចូលចិត្តអានសៀវភៅ ឬសៀវភៅមានតម្លៃថ្លៃជាដើម។ ហេតុដូច្នេះហើយនៅថ្ងៃទី២៥ ខែមីនា ខាងមុខនេះ សមគមក្រុមប្រឹក្សាអន្តរជាតិ ស្តីពីសៀវភៅសម្រាប់កុមារ និងយុវជន នឹងរៀបចំពិពណ៌សៀវភៅកុមារលើកទី៥ មួយក្នុងទីក្រុងភ្នំពេញ ក្នុងគោលបំណងលើកស្ទួយការផលិតសៀវភៅសំរាប់កុមារ៕
