ទំហំពាណិជ្ជកម្មទ្វេភាគីកម្ពុជា-វៀតណាម កើនជាង ៦ រយលានដុល្លារអាមេរិក ក្នុងដំណាច់ខែកុម្ភៈ ឆ្នាំ២០១៧ ខណៈទំហំពាណិជ្ជកម្មកម្ពុជា-វៀតណាម រយៈពេលពេញ១ឆ្នាំ ២០១៦ មានតែជាង ២ពាន់លានដុល្លារអាមេរិក។
នេះបើតាមសេចក្តីប្រកាសរួមនៃកិច្ចប្រជុំលើកទី៩ស្តីពីកិច្ចសហប្រតិបត្តិការ និងការអភិវឌ្ឍរវាងបណ្តាខេត្តជាប់ព្រំដែនកម្ពុជា-វៀតណាម ចុះថ្ងៃទី១៥ ខែមីនា ឆ្នាំ២០១៧ ។
ទំហំពាណិជ្ជកម្មទ្វេភាគី កម្ពុជា-វៀតណាម រយៈពេលត្រឹម ២ ខែ ដើមឆ្នាំ២០១៧នេះ មានការកើនទ្បើងគួរឱ្យកត់សម្គាល់បើធៀបនឹងឆ្នាំ២០១៦។ ការកើនទ្បើងទំហំពាណិជ្ជកម្មនេះ ភាគីទាំងពីរប្តេជ្ញាចិត្តពង្រឹងកិច្ចសហប្រតិបត្តិជាមួយគ្នាបន្ថែមទៀតដើម្បីឱ្យទំហំពាណិជ្ជកម្មកាន់តែមានការកើនទ្បើង។
ក្រោយបញ្ចប់កិច្ចប្រជុំរយៈពេល៣ថ្ងៃរវាងថ្នាក់ដឹកនាំកម្ពុជា សម្តេច ស ខេង និងសមភាគី រដ្ឋមន្ត្រីក្រសួងការបរទេស វៀតណាម លោក ផាម ប៊ិញ មិញ កាលពីថ្ងៃទី១៣-១៥ ខែមីនា ឆ្នាំ២០១៧ ប្រទេសទាំងពីរបានចេញសេចក្តីប្រកាសរូមគ្នាមួយស្តីពីកិច្ចសហប្រតិបតិ្ត និងការអភិវឌ្ឍរួមគ្នា។ តាមខ្លឹមសារសេចក្តីប្រកាសនេះ ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការទ្វេភាគីទៅលើវិស័យសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរដែលត្រូវបានបន្តពង្រឹង និងលើកកម្ពស់ជាប្រចាំ។
ក្នុងន័យនេះបានធ្វើឱ្យសេដ្ឋកិច្ចនៃប្រទេសទាំងពីរមានកើនទ្បើងគួរឱ្យកត់សម្គាល់ផងដែរ។ ចំពោះសេដ្ឋកិច្ចកម្ពុជាសម្រេចបានក្នុងរង្វង់ ៧% និងសេដ្ឋកិច្ចវៀតណាមសម្រេចបាន ៦,២១% ដែលជាអត្រាមួយខ្ពស់។ ក្នុងនោះទំហំពាណិជ្ជកម្មសរុបកម្ពុជា-វៀតណាមឆ្នាំ២០១៦ សម្រេចបានប្រមាណ ២,៩២០ លានដុល្លារអាមេរិកថយចុះ ១៣,១% ធៀបនឹងឆ្នាំ២០១៥។ គិតដល់ដំណាច់ខែកុម្ភៈ ឆ្នាំ២០១៧ ទំហំពាណិជ្ជកម្មទ្វេភាគីសម្រេចបានប្រមាណ ៦២៤,១លានដុល្លារអាមេរិកកើនទ្បើង ២១,២% ធៀបនឹងរយៈពេលដូចគ្នាឆ្នាំ២០១៦។
តាមសេចក្តីប្រកាសរួមគ្នាកម្ពុជា-វៀតណាម ទំហំថវិកានាំចេញរបស់វៀតណាមទៅកម្ពុជាសម្រេចបានប្រមាណ ២៣៦,១លានដុល្លារអាមេរិក កើនទ្បើង ២៥% ធៀបនឹងរយៈពេលដូចគ្នាឆ្នាំ២០១៦។
ផលិតផលវៀតណាមសំខាន់ៗនាំចូលមកកម្ពុជាមានដូចជា ប្រេងឥន្ធនៈ ដែក ជី វាយនភ័ណ្ឌ ផលិតផលធ្វើអំពីជ័រ ម៉ាស៊ីន គ្រឿងបន្លាស់។ ចំណែកផលិតផលកម្ពុជាសំខាន់ៗនាំចូលវៀតណាមមានដូចជា កៅស៊ូ គ្រាប់ស្វាយចន្ទី ឈើ ពោត ក្រៅពីនេះវៀតណាមនាំចូលពីកម្ពុជានូវវត្ថុធាតុដើមថ្នាំជក់ និងដែកអេតចាយ។ លើសពីនេះទៀតនោះភាគីទាំងពីរ ឯកភាពគ្នាបន្តពិនិត្យលទ្ធភាពបង្កើនភាពអនុគ្រោះ និងការលើកទឹកចិត្តឱ្យបានកាន់តែប្រសើរដល់ការវិនិយោគ និងធ្វើការធ្វើពាណិជ្ជកម្មនៅតាមតំបន់ព្រំដែនជាពិសេសការបង្កើតរោងចក្រ សហគ្រាសកៃច្នៃកសិផលនៅហ្នឹងកន្លែង៕
