ភ្នំពេញ៖ លោកឧបនាយករដ្ឋមន្ត្រី ប៊ិន ឈិន ត្រូវបានសម្តេចនាយករដ្ឋមន្ត្រី ហ៊ុន សែន ប្រគល់ ភារកិច្ច ជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីជំនួស សម្តេច សុខ អាន បន្ទាប់ពី ទទួល មរណភាព កាលពីថ្ងៃទី ១៥ មីនា។
នេះបើយោងតាមសេចក្តីសម្រេចរបស់ប្រមុខរដ្ឋាភិបាល នៅថ្ងៃទី ១៦ ខែ មីនានេះ។
សម្តេច សុខ អាន បានទទួលមរណភាព កាលពីថ្ងៃទី ១៥ ខែ មីនា ឆ្នាំ ២០១៧ ក្នុងជន្មាយុ ៦៦ ឆ្នាំ។
លោក ប៊ិន ឈិន គឺថ្នាក់ដឹកនាំជាន់ខ្ពស់ មួយរូបរបស់គណបក្សប្រជាជនកម្ពុជា ហើយបច្ចុប្បន្នលោកគឺជាឧបនាយករដ្ឋមន្ត្រីប្រចាំការ នៃរាជរដ្ឋាភិបាល របស់សម្ដេចនាយករដ្ឋមន្ត្រី ហ៊ុន សែន និងជាតំណាងរាស្ត្រ មណ្ឌលព្រៃវែង។
តាមសេចក្ដីសម្រេចរបស់សម្ដេចហ៊ុនសែន លោក ប៊ិន ឈិន ជាឧបនាយករដ្ឋមន្ត្រី ជាទេសរដ្ឋមន្ត្រី និងជារដ្ឋមន្ត្រី គ្រប់គ្រងក្រសួង និងប្រធានគ្រប់ស្ថាប័ន។
ជីវប្រវត្តិសង្ខេប របស់ លោក ប៊ិន ឈិន
លោក ប៊ិន ឈិន កើតនៅថ្ងៃទី១៧ ខែសីហា ឆ្នាំ១៩៤៩ នៅឃុំជើងទឹក ស្រុកកំពង់លាវ ខេត្តព្រៃវែង។
មុនឆ្នាំ១៩៧៥ លោកសាស្ត្រាចារ្យមធ្យមសិក្សាបឋមភូមិ និងជាសិស្សជាន់ខ្ពស់ជំនាន់ទី២ សាលាជាតិរដ្ឋបាល។
១៩៨០ - ១៩៨២ : បុគ្គលិកមន្ទីរឧស្សាហកម្ម ពាណិជ្ជកម្ម ខេត្តព្រៃវែង
១៩៨២ – ១៩៨៤ : ប្រធានការិយាល័យមន្ទីរឧស្សាហកម្ម ពាណិជ្ជកម្ម ខេត្តព្រៃវែង
១៩៨៤ – ១៩៨៦ : ប្រធានមន្ទីរឧស្សាហកម្មខេត្តព្រៃវែង
១៩៨៦ – ១៩៩០ : អនុប្រធានខេត្តទទួលបន្ទុកផែនការ ខេត្តព្រៃវែង
១៩៩០ – ១៩៩២ : អនុប្រធានខេត្តទទួលបន្ទុកកសិកម្ម ខេត្តព្រៃវែង
១៩៩២ – ១៩៩៣ : អនុប្រធានទី១ ខេត្តព្រៃវែង
១៩៩៣ - ១៩៩៨ : តំណាងរាស្ត្រ មណ្ឌលព្រៃវែង
១៩៩៨ – ២០០១ : សមាជិកក្រុមប្រឹក្សាធម្មនុញ្ញ
២០០១ -២០០៧: ប្រធានក្រុមប្រឹក្សាធម្មនុញ្ញ
បច្ចុប្បន្ន: ជាឧបនាយករដ្ឋមន្ត្រី ប្រចាំការ នៃអាណត្តិទី៦ នៃរដ្ឋសភា។
តាមរដ្ឋធម្មនុញ្ញកម្ពុជា ការតែងតាំង រដ្ឋមន្ត្រី ណាម្នាក់ត្រូវ ឆ្លងកាត់ការអនុម័តពីរដ្ឋសភា និង រាជក្រឹត្យរបស់ព្រះមហាក្សត្រ៕
