រ៉ង់ហ្គូន៖ តំណាងអង្គការសហប្រជាជាតិ ទទួលបន្ទុកសិទ្ធិមនុស្ស នៃប្រទេសភូមា លោកស្រី យ៉ាង ហ៊ីលី បាននិយាយថា រដ្ឋាភិបាលភូមា ប្រហែលជាមានផែនការ ជាថ្មីទៀត បណ្តេញជនជាតិភាគតិច រ៉ូហ៊ីងយ៉ា ឱ្យចេញពីប្រទេសភូមា នាពេលឆាប់ៗនេះ ដែលលោកស្រីថា ជាបទល្មើសប្រឆាំងមនុស្សជាតិ។
អ្នករាយការណ៍ពិសេសរូបនេះ បាននិយាយថា លោកស្រីមានភស្តុតាង បញ្ជាក់ថាពួកយោធាភូមា អាចនឹង ធ្វើការបង្ក្រាបម្តងទៀត ទៅលើពួកសហគមន៍មូស្លីម រ៉ូហ៊ីងយ៉ា ក្នុងរូបភាពនៃការបណ្តេញពួកគេចេញជាថ្មីម្តងទៀត។ លោកស្រីបានបញ្ជាក់ដូចនេះ ទៅកាន់មហាសន្និបាត ក្រុមប្រឹក្សាសិទ្ធិមនុស្សអង្គការសហប្រជាជាតិកាលពីពេលថ្មីនេះ។ អ្នករាយការណ៍ពិសេសអង្គការសហប្រជាជាតិ បានបញ្ជាក់ទៀតថា ក្នុងអំឡុងប្រតិបត្តិការបង្ក្រាប ទៅលើពួកពួកសហគមន៍រ៉ូហ៊ីងយ៉ា តាំងពីខែតុលា មកគឺពួកគាត់ប្រមាណជាង១០ម៉ឺននាក់ បានទៅជ្រកកោននៅប្រទេសបង់ក្លាដេស។
ពួកសហគមន៍ រ៉ូហ៊ីងយ៉ាភូមា ដែលជាជនអន្តោប្រវេសន៍ មកពីប្រទេសបង់ក្លាដេស និងឥណ្ឌា សហ គមន៍នេះបានមករស់នៅភូមា នៅរដ្ឋរ៉ាក់ខាញ នៅភាគខាងលិចប្រទេស។ សហគមន៍នេះ មកតាំងទីលំនៅតាមរយៈអាណានិគមអង់គ្លេស។ ប៉ុន្តែក្រោយមករបបយោធា បានដាក់ពួកនេះនៅក្នុងរដ្ឋ ធម្មនុញ្ញ ជាចំណាកស្រុកខុសច្បាប់។ បច្ចុប្បន្នសហគមន៍នេះរស់នៅប្រទេសភូមា ប្រមាណជា១លាន ១សែននាក់៕
