រដ្ឋាភិបាលម៉ាឡេស៊ី ពិចារណាប្រគល់សាកសពលោក គីម ជុងណាំម ទៅឱ្យកូរ៉េខាងជើងជាថ្នូរនៃការដោះលែងពលរដ្ឋម៉ាឡេស៊ី ៩នាក់ដែលត្រូវបានអាជ្ញាធរក្រុងព្យុងយ៉ាង ចាប់ធ្វើចំណាប់ខ្មាំង។
ឧបនាយករដ្ឋមន្ដ្រីម៉ាឡេស៊ី លោក Ahmad Zahid Hamidi បាននិយាយថា លោកបានស្នើឱ្យនាយករដ្ឋមន្ដ្រីពិចារណាសំណើរបស់លោកដែលលោកថា អាចជួយឱ្យកូរ៉េខាងជើង ដោះលែងពលរដ្ឋម៉ាឡេស៊ីមកប្រទេសវិញ។
ជម្លោះរវាងម៉ាឡេស៊ី និងកូរ៉េខាងជើងបានកើតឡើងដោយសារតែ ក្រុងកូឡាឡាំពួរ មិនព្រមប្រគល់សាកសពលោក គីម ជុងណាំម ទៅឱ្យក្រុងព្យុងយ៉ាងដែលនាំអោយមានជម្លោះការទូតកើតឡើង។
ដោយសារករណីនេះ កូរ៉េខាងជើងបានឃាឃាំង ហើយឃុំខ្លួនពលរដ្ឋម៉ាឡេស៊ី ៩នាក់មិនអោយចាកចេញពីប្រទេស ដោយត្រូវរង់ចាំរហូតមានដំណោះស្រាយការប្រគល់សពលោក គីម ជុងណាំម ។
លោក គីម ជុងណាំម បងប្រុសគីម ជុងអ៊ុន ម្ដាយទីទៃ បានទទួលមរណភាពនៅថ្ងៃទី ១៣ កុម្ភៈ ដោយសារតែការដាក់ថ្នាំបំពុលដែលគេសង្ស័យថា ជាគម្រោងការរបស់មេដឹកនាំគីម ជុងអ៊ុន។ប៉ុន្ដែ រដ្ឋាភិបាលកូរ៉េខាងជើងបដិសេធ៕
