ក្រុងវ៉ាស៊ីនតោន៖ ក្រសួងការបរទេសរបស់សហរដ្ឋអាមេរិក កាលពីថ្ងៃអង្គារ៍ ទី១៤ មីនា បានជំរុញឲ្យកូរ៉េខាងជើង លើកលែងទោសដល់និស្សិតអាមេរិកម្នាក់ ដែលត្រូវបានផ្តន្ទាទោសរយៈពេល ១៥ឆ្នាំ ពីបទលួចបដានយោបាយពីសណ្ឋាគារមួយ។ និស្សិតអាមេរិកដែលតុលាការកូរ៉េខាងជើង ផ្ដន្ទាទោសនេះគឺ លោក Otto Warmbier ដែលលោកមានអាយុជាង ២០ឆ្នាំ ។
លោក Rex Tillerson រដ្ឋមន្ត្រីក្រសួងការបរទេសអាមេរិកបាននិយាយដូចនេះ ខណៈលោកកំពុងធ្វើទស្សនកិច្ច នៅប្រទេសជប៉ុន កូរ៉េ ខាងត្បូង និង ប្រទេសចិន ដើម្បីពិភាក្សាបញ្ហាអាវុធនុយក្លែអ៊ែររបស់កូរ៉េខាងជើង។ មន្ត្រីនាំពាក្យក្រសួងការបរទេសលោក Mark Toner និយាយថា៖« ពួកយើងជឿថា ការកាត់ក្តីរយៈពេល ១៥ឆ្នាំ នេះគឺ វាអាក្រក់ហួសហេតុពេក សម្រាប់សកម្មភាពដែលលោក Warmbier បានប្រព្រឹត្តហើយយើងក៏ជំរុញឲ្យកូរ៉េខាងជើង ដោះលែង និង លើកលែងទោសដល់គាត់ ដែលជាពិសេស គោរពទៅដល់ច្បាប់និងមូលដ្ឋានមនុស្សជាតិ»។
និស្សិតWarmbier ត្រូវបានតុលាកាកំពូលរបស់ប្រទេសកូរ៉េខាងជើងសម្រេចកាត់ក្តីផ្តន្ទាទោស រយៈពេល១៦ ឆ្នាំ ដែល បានសារភាពថា លោកបានលួចបដាឃោសនា ពីសណ្ឋាគារក្រុងព្យុងយ៉ាងដែលគាត់បានស្នាក់នៅ។ កាលពីថ្ងៃអង្គារ៍ ក្រសួងការបរទេសបានអំពាវនាវឲ្យប្រជាជនអាមេរិក កុំធ្វើដំណើរកំសាន្តទៅកាន់ ប្រទេសកម្មុយនីស្តមួយនេះដែលមិនមានទំនាក់ទំនងការទូតជាមួយអាមេរិក។ ក្រុងព្យុងយ៉ាងក្នុងពេលកន្លងមកបានយកការឃុំខ្លួនពលរដ្ធអាមេរិកដើម្បីធ្វើជាឧបករណ៍ចរចា៕
