ភ្នំពេញ៖ ក្រសួងមហាផ្ទៃរព្រមានលុបឈ្មោះ បេក្ខជនឈរឈ្មោះបោះឆ្នោត ក្រុមប្រឹក្សាឃុំសង្កាត់ណាដែល ឈរឈ្មោះ ចំនួន២គណបក្ស នៅក្នុងការបោះឆ្នោត ថ្ងថៃទី៤ មិថុនាឆ្នាំ២០១៧នេះ។
តាមសេចក្ដីជូនដំណឹងរបស់ក្រសួងមហាផ្ទៃចុះនៅថ្ងៃទី ១៤ មីនា ឆ្នាំ ២០១៧ ក្រសួងបានពិនិត្យឃើញ មានសមាជិកក្រុមប្រឹក្សា ឃុំ សង្កាត់ ឬសមាជិកក្រុមប្រឹក្សាក្រុង ស្រុក ខណ្ណ ក្នុងមុខតំណែងដែលមកពីគណបក្សមួយចំនួនបានទៅឈរឈ្មោះជាបេក្ខជនពេញសិទ្ធិ ឬបេក្ខជនបម្រុងរបស់គណបក្សមួយទៀតដែលមិនមែនជាគណបក្សនយោបាយដែលខ្លួនដែលនាំឱ្យមានវិសមត្ថភាពផ្លូវច្បាប់។
ពាក់ព័ន្ធនឹងបញ្ហាខាងលើ ក្រសួងមហាផ្ទៃធ្វើការណែនាំអំពីការអនុវត្តគោលការណ៍ និងនីតិវិធីចំពោះសមាជិកក្រុមប្រឹក្សាឃុំសង្កាត់ ឬសមាជិកក្រុមប្រឹក្សាក្រុង ស្រុក ខណ្ឌ ដែលបានទៅឈរឈ្មោះជាបេក្ខជនពេញសិទ្ធិ ឬបេក្ខជនបម្រុងសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៤ គឺ អនុលោកតាមមាត្រា ១៥ និងមាត្រា ១៦ នៃច្បាប់ស្ដីពីគណបក្សនយោបាយបានចែងថា “ប្រជាពលរដ្ឋខ្មែរម្នាក់ មិនអាចនជាសមាជិកគណបក្សនយោបាយលើសពីមួយក្នុងពេលតែមួយបានទេ”។
ក្នុងករណីដែលបេក្ខជនមួយរូបចូលជាសមាជិកគណបក្ស សមាជិកភាពក្នុងគណបក្សនយោបាយចុងក្រោយ ត្រូវចាត់ទុកជាបានការ។ ទន្ទឹមនោះ សមាជិកគណបក្សនយោបាយត្រូវបាត់បង់សមាជិកភាពរបស់ខ្លួនក្នុងករណីបានលាឈប់ ឬបានបោះបង់សមាជិកនៃគណបក្សនយោបាយរបស់ខ្លួន។ ផ្អែកតាមបទប្បញ្ញាត្តិខាងលើ ប្រសិនបើសមាជិកក្រុមប្រឹក្សាឃុំ សង្កាត់ ឬសមាជិកក្រុមប្រឹក្សា ក្រុង ស្រុក ខណ្ឌ របស់គណបក្សមួយ បានទៅឈរឈ្មោះជាបេក្ខជនពេញសិទ្ធិ ឬបេក្ខជនបម្រុងរបស់គណបក្សនយោបាយមួយផ្សេងទៀតនោះ សមាជិកភាពក្នុងគណបក្សនយោបាយចុងក្រោយត្រូវចាត់ទុកជាបានការ។
សមាជិកក្រុមប្រឹក្សាឃុំ សង្កាត់ ឬសមាជិកក្រុមប្រឹក្សាក្រុង ស្រុក ខណ្ឌទាំងនោះ នឹងត្រូវបាត់បង់សមាជិកភាពពីគណបក្សនយោបាយដើមរបស់ខ្លួន ស្របតាមស្មារតីច្បាប់ស្ដីពីគណបក្សនយោបាយ។ ទន្ទឹមនឹងនេះ ផ្អែកតាមមាត្រា ១៦ នៃច្បាប់ស្ដីពីការគ្រប់គ្រងរដ្ឋបាលឃុំ សង្កាត់ និងមាត្រា ២២ នៃច្បាប់ស្ដីពីការគ្រប់គ្រងរដ្ឋបាលរាជធានី ខេត្តក្រុង ស្រុកខណ្ឌ ការបាត់បង់សមាជិកភាពពីគណបក្សនយោបាយនឹងនាំឲ្យសាមីខ្លួនបាត់បង់សមាជិកភាពពីក្រុមប្រឹក្សាផងដែរ៕
