ភ្នំពេញ៖ក្រសួងមហាផ្ទៃបានបដិសេធ ចំពោះការលើកឡើងថា អ្នកទោសពាក់ព័ន្ធនឹងគ្រឿង ញៀន មានតែឈ្មោះក្នុងបញ្ជី តែមនុស្សចេញរកស៊ីជួញដូគ្រឿងញៀននៅខាងក្រៅ។
ការបដិសេធនេះ បន្ទាប់ពីមានបណ្តាញផ្សព្វផ្សាយមួយចំនួនបានស្រង់សំដីលោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន កាលពីពេលថ្មីៗនេះថា «ការគ្រប់គ្រងជនជាប់ឃុំ ពាក់ព័ន្ធបទល្មើសគ្រឿងញៀន មានតែឈ្មោះក្នុងបញ្ជី តែមនុស្សចេញមកជួញដូគ្រឿងញៀនខុសច្បាប់ នៅខាងក្រៅ។»
នៅក្នុងលិខិតបំភ្លឺរបស់ខ្លួននៅថ្ងៃទី១៥ មីនា នេះក្រសួងមហាផ្ទៃ បានបញ្ជក់ថា ដំណឹងដែលបានផ្សព្វផ្សាយកន្លងមកនេះ មិនឆ្លុះបញ្ចាំងអំពីការពិតជាក់ស្តែងដែលបាន និងកំពុងអនុវត្តន៍ឡើយ ពោលគឺគ្មានជនជាប់ឃុំណាម្នាក់ត្រូវបានដោះលែងឱ្យនៅក្រៅពន្ធនាគារ ក្នុងរយៈពេលដែលមិនទាន់អនុវត្តន៍ទោសពន្ធនាគារចប់សព្វគ្រប់ឡើយ។
ជាមួយគ្នានេះដែរ ក្រសួងបានបញ្ជាក់បន្តថា ពិតណាស់មានជនជាប់ឃុំមួយចំនួន បាននឹងកំពុងសម្រាកព្យាបាលជំងឺនៅតាមមន្ទីពេទ្យខាងក្រៅ ។ ក្រសួងមហាផ្ទៃបន្តថា គ្រប់ករណីដែលបញ្ជូនជនជាប់ឃុំទៅសម្រាកព្យាបាល ឬសង្គ្រោះបន្ទាន់នៅមន្ទីពេទ្យខាងក្រៅ សុទ្ធតែមានការដឹងលឺ និងការអនុញ្ញាតពីព្រះរាជអាជ្ញា។
បន្ថែមពីនេះក្រសួងអះអាង ថា ចាប់តាំងពីឆ្នាំ២០១៥ មកអគ្គនាយកដ្ឋានពន្ធនាគារពុំដែលស្នើសុំឱ្យលើកលែងទោស ឬបន្ធូបន្ថយទោសទណ្ឌិតណាម្នាក់ ដែលជាប់ទោសពីបទល្មើសគ្រឿងញៀនឡើយ៕
