ភ្នំពេញ៖ទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID)បានប្រកាសគាំទ្រគម្រោង«ផ្កាស្លាក្រោមអង្គការ» ដែលជាប្រភេទរបាំច្នៃប្រឌិតបែបថ្មីដើម្បីជំរុញដល់សន្តិភាព និងការផ្សះផ្សារឡើងវិញ នៅប្រទេសកម្ពុជា។
គំរោងផ្កាស្លាក្រោមអង្គការ បង្ហាញពីការជាប់ទាក់ទងនឹងការរៀបការដោយបង្ខំនិងការទទួលរងហឹង្សាផ្លូវេភទ និងហឹង្សាជេនឌ័រ ដោយសារពួកខ្មែរក្រហមក្នុងរបបកម្ពុជាប្រជាធិបតេយ្យ។ កម្មវិធីនេះមានបំណងជួយផ្សះផ្សារអ្នករួចជីវិតពីការចាប់បង្ខំអោយរៀបការដោយពួកខ្មែរក្រហម ហើយមានការទាក់ទងនឹងតុលាការកាត់ក្តីខ្មែរក្រហមនៅកម្ពុជា (ECCC) ដែលកំពុងកាត់ក្តីចំពោះបទឧក្រិដ្ឋប្រឆាំងមនុស្សជាតិ និងបទឧក្រិដ្ឋសង្គ្រាមដែលត្រូវបានចោទទៅលើមេដឹកនាំជាន់ខ្ពស់បំផុតនៃរបបខ្មែរក្រហម ដែលកំពុងមានជីវិត។
គម្រោង«ផ្កាស្លាក្រោមអង្គការ» នេះត្រូវបានគ្រប់គ្រង ដោយអង្គការកម្ពុជាចំនួន ៤ គឺអង្គការបណ្ឌិតសភាសិល្បៈខ្មែរ អង្គការក្តីករុណា មជ្ឈមណ្ឌលបុប្ផាណា និងអង្គការ Transcultural Psychological Organization (TPO) ។
ទីភ្នាក់ងារ USAID នឹងផ្តល់ថវិកាសំរាប់ការសំដែងល្ខោន ការនិទានរឿងផ្ទាល់មាត់ ការពិភាក្សាគ្នាក្នុងសហគមន៍ និងពិព័រណ៌ចល័ត។ រួមជាមួយនឹងដៃគូអភិវឌ្ឍន៍ដទៃទៀត ទីភ្នាក់ងារ USAID និងក្រុមអង្គការទាំងនេះសង្ឃឹមថានឹងលើកកំពស់ការយល់ដឹងរបស់សាធារណជន នៅទូទាំងប្រទេសកម្ពុជា លើផលវិបាកនៃហឹង្សាជេនឌ័រទៅលើសង្គមសព្វថ្ងៃ។
លោកស្រី ប្រធានទីភ្នាក់ងារ USAID ប្រចាំនៅកម្ពុជាបានមានប្រសាសន៍ថា “ការគាំទ្ររបស់ទីភ្នាក់ងារ USAID ចំពោះគំរោងផ្កាស្លាក្រោមអង្គការបញ្ជាក់ពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិក នៅក្នុងការ ជួយលើកទឹកចិត្តដល់ការផ្សះផ្សារជាតិ នៅកម្ពុជា តាមរយៈការចងចាំពីសម័យខ្មែរក្រហម។ ការចងចាំពី ឧក្រិដ្ឋកម្មពីអតីតកាលមានសារៈសំខាន់ តែការស្វែងរកវិធីសំរាប់អោយសង្គមមួយដើរទៅមុខ ហើយកសាង អនុស្សាវ រីយ៍ថ្មី និងល្អមានសារៈសំខាន់ចាំបាច់”៕
