ឡាអេ៖ ជម្លោះការទូតរវាង ប្រទេសហូឡង់ នឹងតួកគី ហាក់ឡើងកម្ដៅកាន់តែខ្លាំង ខណៈប្រទេសតួកគី សន្យាថា នឹងសងសឹង ទីក្រុងឡាអេ វិញចំពោះការដែលមិនឲ្យរដ្ឋមន្ត្រីម្នាក់របស់ ក្រុងអង់ការ៉ា ចូលប្រទេសនេះ ដើម្បីចូលរួមកិច្ចប្រជុំមួយ។
នាយករដ្ឋមន្ដ្រីហូឡង់ លោក Mark Rutte បាននិយាយថា ទោះជាលោកមិនសុំទោសតួកគី ក៏ដោយតែសង្ឃឹមថា តួកគី នឹងយល់ថា ទីក្រុងឡាអេ ធ្វើនេះគឺឈរលើហេតុផលមួយ ហើយសង្ឃឹមទៀតថា ភាពតានតឹងផ្នែកការទូតរវាងប្រទេសទាំងពីរនឹងមិនរីកធំបន្ដទៀតទេ។ តែយ៉ាងណាក៏ដោយ រដ្ឋាភិបាលតួកគី បានប្ដេជ្ញាថា ខ្លួននឹងសងសឹកលើប្រទេស ហូឡង់ វិញនៅថ្ងៃណាមួយករណីនេះ។
វិធានការណ៍របស់ប្រទេស ហូឡង់ បានធ្វើឡើងបន្ទាប់ពីប្រធានាធិបតីតួកគី Recep Tayyip Erdogan បានរិះគន់ប្រទេស ហូឡង់ ថា ពេលខ្លះចរិកដឹកនាំប្រទេសគឺដូចទៅនឹងពួក ណាស៊ីស ដែលការរិះគន់នេះនាំឲ្យហូឡង់ បង្ហាញកំហឹងវិញភ្លាមៗ ពោលគឺការមិនអនុញ្ញាតឲ្យរដ្ឋមន្ដ្រីរបស់ប្រទេសតួកគី បានចូលប្រជុំនៅទីក្រុង Rotterdam នៃប្រទេសហូឡង់ កាលពីថ្ងៃអាទិត្យ ទី១២ មីនា ម្សិលមិញ។
ពេលដែលស្ថានការណ៍ការទូតរវាង តួកគី និងហូឡង់ កំពុងតែតានតឹងខ្លាំងនាយករដ្ឋមន្ដ្រីប្រទេសហូឡង់ បានអំពាវនាវ ឲ្យប្រជាជនហូឡង់ ដែលកំពុងនៅប្រទេសតួកគីស្ថិតក្នុងស្ថានភាពស្ងប់ស្ងាត់៕
