ថៃ៖ ព្រះមហាក្សត្រថៃ វិជ្ជរ៉ា ឡុងកន បានបញ្ជាឱ្យនាយករដ្ឋមន្ដ្រី ប្រាយុទ្ធ ចាន់អូចា យកចិត្តទុកដាក់ ដោយធ្វើយ៉ាងណាជួយពលរដ្ឋក្រីក្រកុំអោយជួបគ្រោះថ្នាក់ដោយសារតែភាពរាំងស្ងួតនៅឆ្នាំ ២០១៧នេះ ។
កាសែតថៃ The Nation បានរាយការណ៍ថា ការព្រួយបារម្ភរបស់ព្រះមហាក្សត្រគឺធ្វើឡើងនៅពេលដែលព្រះអង្គកោះហៅលោកនាយករដ្ឋមន្ដ្រីប្រាយុទ្ធចាន់អូចា មកសួរនាំអំពីភាពរាំងស្ងួតនៅតំបន់មួយចំនួននៃប្រទេសថៃ ដែលកំពុងកើតមាន។
លោក ឧត្ដមសេនីយ៍ប្រាយុទ្ធ បានប្រាប់អ្នកសារព័ត៌មានថា ព្រះមហាក្សត្រមានការលំបាកហារាទ័យ ដោយលឺថា ប្រជារាស្ដ្រក្នុងខេត្តខ្លះកំពុងតែជួបវិបត្តិ ដោយសារតែគ្រោះរាំងស្ងួត ហើយបែរជាខេត្តខ្លះជួបវិបត្តិដោយសារទឹកជំនន់ទៅវិញ។
លោកប្រាយុទ្ធ បាននិយាយថា លោកនឹងដឹកនាំក្រុមការងារគណៈរដ្ឋមន្ដ្រីរបស់លោកដើម្បីចុះពិនិត្យផ្ទាល់អំពីខេត្តមួយចំនួនដែលជួបគ្រោះរាំងស្ងួត គឺធ្វើទៅតាមការផ្ដល់ឱវាទរបស់ព្រះមហាក្សត្រ ក៏ដូចជាភារកិច្ចរបស់រដ្ឋាភិបាល៕ The Nation
