ភ្នំពេញ៖ ក្រសួងការបរទេសកម្ពុជា បាន ជូនដំណឹងថា កម្ពុជា-វៀតណាម នឹងបើកកិច្ចប្រជុំរួមគ្នាមួយ នៅរាជធានីភ្នំពេញ ដោយផ្ដោតលើកិច្ចសហប្រតិបត្តិការនិងការអភិវឌ្ឍរវាងបណ្តាខេត្តជាប់ព្រំដែននៃប្រទេសទាំង២ និងកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកទេស។
តាមសេចក្ដីជូនដំណឹងរបស់ក្រសួងការបរទេសកម្ពុជា កិច្ចប្រជុំនេះ ចាប់ពីថ្ងៃ ចន្ទ ទី ១៣ ដល់ថ្ងៃទី១៥ ខែមីនា ឆ្នាំ២០១៧ ហើយទីកន្លែងនៃកិច្ចប្រជុំ នៅរាជធានីភ្នំពេញ។
តាមសេចក្ដីជូនដំណឹងកិច្ចប្រជុំនេះ ភាគីកម្ពុជាតំណាងដោយ សម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និង លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ ចំណែកភាគីវៀតណាម តំណាងដោយ ឧបនាយករដ្ឋមន្ត្រី និងជារដ្ឋមន្ត្រីការបរទេស ផាម ប៊ិញ មិញ។
ជំនួបនៃកិច្ចប្រជុំទាំងពីរនេះ ក៏រម្លឹកផងដែរខួបលើកទី៥០ នៃការបង្កើត ទំនាក់ទំនងការទូតរវាងប្រទេសទាំងពីរ។
កន្លងមកបើតាមគណៈកម្មាធិការព្រំដែននៃប្រទេសទាំង២ ក្រុមការងារបានបោះបង្គោលព្រំដែនរួមគ្នាជិតចប់សព្វគ្រប់ហើយ នៅលើខ្សែបន្ទាត់ព្រំដែនគោក ១២៧០ គីឡីម៉ែត្រ៕
