ភ្នំពេញ៖ លោកឧត្តមសេនីយ៍ឯក ហ៊ុន ម៉ាណែត ជាកូនប្រុសច្បង សម្ដេចនាយករដ្ឋមន្ត្រីក្នុងឋានៈជានាយរងសេនាធិការចំរុះនៃកងយោធពលខេមរភូមិន្ទ និងជាមេបញ្ជាការរងកងទ័ញជើងគោក បានណែនាំកងទ័ពប្តេជ្ញាចិត្តការពារសុខសន្តិភាព ស្ថេរភាព រដ្ឋធម្មនុញ្ញ រាជរដ្ឋាភិបាលស្របច្បាប់ ប្រទេសជាតិ និងប្រជាជន។
លោកឧត្តមសេនីយ៍បាន ថ្លែងដូចនេះ នៅក្នុងពិធីបិទសិក្ខាសាលាបូកសរុបលទ្ធផលការងារ សម្រេចបានក្នុងឆ្នាំ២០១៦ និងទិសដៅអនុវត្តភារកិច្ចក្នុងឆ្នាំ២០១៧ នៅកងពលតូចលេខ៧០ នៅថ្ងៃទី១០ ខែមីនា ឆ្នាំ២០១៧ ។
ក្នុងឱកាសនោះ លោក ហ៊ុន ម៉ាណែត ក៏បានលើកឡើងពីគោលការណ៍ដែលរាជរដ្ឋាភិបាលបានយកចិត្តទុកដាក់ចំពោះកងកម្លាំប្រដាប់អាវុធជានិច្ចជាកាលដែរ ហើយគោលការណ៍នេះ សំដៅលើកស្ទួយជីវភាពគ្រួសារយោធិន តាមរយៈការតម្លើងប្រាក់បៀវត្ស និងការផ្គត់ផ្គង់ផ្សេងៗ។ នេះបើតាមការចុះផ្សាយរបស់អង្គភាពព័ត៌មាន Fresh News។
តែស្របពេលជាមួយគ្នា គេសង្កេតឃើញសម្ដេច នាយករដ្ឋមន្ត្រី ហ៊ុនសែន ក៏តែងតែលើកឡើងពីការប្ដេជ្ញាចិត្តរបស់ សម្ដេច ក្នុងការរក្សាសន្តិភាព ស្ថេរភាពឱ្យបានរឹងមាំ ដោយមិនត្រូវឱ្យប្រទេសធ្លាក់ក្នុងឧបាយកលសង្គ្រាមម្ដងទៀតឡើយ។ សម្ដេចថា បើសង្គ្រាមកើតហើយ គឺនាំឱ្យប្រទេសខ្ទេចខ្ទាំ យ៉ាងខ្លាំង៕
