ភ្នំពេញ ៖ ទំនប់វារីអគ្គិសនីសេសានក្រោម ២ នឹងដាក់ឱ្យដំណើរការលើកដំបូងនៅខែវិច្ឆិកា ឆ្នាំ២០១៧ ខាងមុខ ខណៈពលរដ្ឋជាង ១០០ គ្រួ សាររងផលប៉ះពាល់នៅតំបន់នោះមិនទាន់ដោះស្រាយសំណង។
លោក ប៉ាន់ ណារិទ្ធ បញ្ជាក់ថាភ្លើងដែលបានពីវារីអគ្គិសនីនេះអូសតាមខ្សែបណ្តាញជាតិ ២៣០គីទ្បូវ៉ុល មកភ្នំពេញដើម្បីយកមកបែងចែកទៅតាមបណ្តាខេត្តទូទាំងប្រទេស។
តំណាងក្រសួងរ៉ែ និងថាមពល លោក ប៉ាន់ ណារិទ្ធ មានប្រសាសន៍យ៉ាងដូច្នេះថា៖ «គម្រោងនេះនឹងបិទទឹកនៅក្នុងខែ ៩ ហើយខែ ១១ ចុងឆ្នាំ២០១៧យើងដំណើរការបូប៊ីនទីមួយ ៥០ មេហ្គាវ៉ាត់ រហូតដល់ឆ្នាំ២០១៨ យើងនឹងដាក់ឱ្យដំណើរការបូប៊ីនទាំងប្រាំបី គឺ ៤០០មេហ្គាវ៉ាត់ »។
គម្រោងទំនប់វារីអគ្គីសនីសេសានក្រោម២(LS2)គឺជាតំបន់ មួយដែលនឹងត្រូវសាងសង់នៅក្នុងទន្លេសេសាន ក្នុងស្រុកសេសាន ខេត្តស្ទឹងត្រែង ប្រទេសកម្ពុជា ដែលមានចម្ងាយ ១,៥ គម ផ្នែកខាងក្រោមនៃចំនុចប្រសព្វគ្នារវាងទន្លេសេសាន និងទន្លេស្រែពក ដែលមានចម្ងាយប្រមាណ ២៥ គម ពីចំណុចជួបគ្នានឹងទន្លេមេគង្គ។ គម្រោងនេះអនុម័តដោយគណៈរដ្ឋមន្ត្រី កម្ពុជា នៅក្នុងខែវិច្ឆិកា ឆ្នាំ២០១២ ។
តែទំបន់វារីអគ្គិសនីនេះ ត្រូវអ្នកជំនាញថាអាចប៉ះពាល់បរិស្ថាន (EIA)ហើយ ប៉ះពាល់ ពលរដ្ឋរស់នៅតំបន់នោះ ។
អ្នកស្រី ណាត់ សូតា ដែលរងផលប៉ះពាល់ពីការធ្វើទំនប់វារីអគ្គិសនីសេសានក្រោម២ មានប្រសាសន៍ថា អ្នកស្រីមិនព្រមចាកចេញពីតំបន់នេះជាដាច់ខាតទោះបីជារដ្ឋាភិបាលផ្តល់សំណងដល់អ្នកស្រីក៏ដោយ។
ឆ្លើយតបការលើកទ្បើងរបស់ពលរដ្ឋដែលមិនព្រមចាកចេញនេះ លោក នង សារ៉េត មន្ត្រីតំណាងក្រសួងរ៉ែ និងថាមពល មានប្រសាសន៍ថារដ្ឋា ភិបាលមិនអាចទុកឱ្យពលរដ្ឋបាត់បង់ជីវិតដោយសារតែការអភិវឌ្ឍន៏ទំនប់វារីអគ្គិនីសេសានក្រោម២នេះទេ។ លោក នង សារ៉េត បន្តថា រាជ រដ្ឋាភិបាលបានសម្រេចសាងសង់ផ្ទះ និងត្រៀមជូនដីដល់ពួកគាត់រួចហើយ។ តំណាងក្រសួងរូបនេះឱ្យដឹងថាទៀតគម្រោងនេះនឹងផ្តល់អត្ថ ប្រយោជន៍ជាច្រើនដល់ប្រជាពលរដ្ឋគឺតាមរយៈការទម្លាក់ថ្លៃភ្លើងប្រើប្រាស់របស់ប្រជាពលរដ្ឋឱ្យកាន់តែមានតម្លៃទាបបន្ថែមទៀត។
ចំណែកនាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា (NGO Forum) លោក តឹក វណ្ណារ៉ា មានប្រសាសន៏ថា ការដាក់ឱ្យប្រើប្រាស់ដំណើរការវារីអគ្គិសនីសេសានក្រោម២ខាងមុខនេះ រាជរដ្ឋាភិបាល ក៏ដូចជាក្រសួងស្ថាប័នពាក់ព័ន្ធត្រូវបន្តពិភាក្សាជាមួយភាគីរងគ្រោះឱ្យបានច្រើនបន្ថែមទៀតដើម្បីរកគន្លឹះសំខាន់ថាតើមានមូលហេតុអ្វីបានជាពួកគាត់នៅតែមិនព្រមចាកចេញទោះបីជាដឹងថានឹងរងគ្រោះហើយនោះ ។
តាមការឱ្យដឹងពីមន្ត្រីក្រសួងរ៉ែ និងថាមពល ក្រុមហ៊ុនដែលវិនិយោគសាងសង់ទំនប់វារីអគ្គីសនីសេសានក្រោម២នេះគឺមានឈ្មោះថា Hydro Power Lower Sesan 2។ ដែលមានក្រុមហ៊ុនចំនួន ៣ ចូលរួមវិនិយោគ។ ក្រុមហ៊ុនទាំងនោះរួមមាន ក្រុមរបស់ខ្មែរឈ្មោះថា ក្រុមហ៊ុនរ៉ូយ៉ាល់គ្រុប ៣៩ % ក្រុមចិន ឈ្មោះថាក្រុមហ៊ុនឆៃណាហាយដ្រូទ្បានឆាងអ៊ិនធើណាសិនណាល់អ៊ិននើជី ៥១ % ហើយនិងអគ្គីសនីវៀតណាមអន្តរជាតិ (EVNI), ដែលជាសាខារបស់ក្រុមហ៊ុនអគ្គីសនីវៀតណាម (EVN) ចំនួន១០%។
គួរជម្រាបថា កម្លាំងថាមពលផលិតវារីអគ្គិសនីសេសានក្រោម២ គឺមានកម្លាំងផលិត ៤០០ មេហ្គាវ៉ាត់ ដែលមានកំពស់ទឹក ៧៥ម៉ែត្រ ប្រវែង ៦ គីទ្បូម៉ែត្រ ក្នុងទំហំផ្ទៃអាងស្តុកទឹក ៣៣៥៦០ហិកតា ដែលចំណាយទុនសាងសង់ ជិត៨០០លានដុល្លារ៕
