ភ្នំពេញ ៖ រាជរដ្ឋាភិបាលកម្ពុជាបានដាក់ចេញនូវយុទ្ធនាការប្រយុទ្ធប្រឆាំងគ្រឿងញៀនរយៈពេល ៦ខែ ចាប់ផ្តើមពីថ្ងៃទី ១ មករា ឆ្នាំ ២០១៧តទៅ។ ក្នុងរយៈពេលបើកឆាកដំបូង ក្រុមសមត្ថកិច្ចបង្ក្រាបបានជនសង្ស័យពីការប្រើប្រាស់និងជួញដូរគ្រឿងញៀនជាដើម។ នៅក្នុងចំណោមនោះក៏មានព្រះសង្ឃផងដែរ។
ទាំងអាជ្ញាធរ និងព្រះសង្ឃនៅតាមវត្តមួយចំនួនក្នុងរាជធានីភ្នំពេញ ដែលវិទ្យុស្រី្តសុំសម្ភាសន៍សុទ្ធតែបាន ទទួលស្គាល់ថា បញ្ហាគ្រឿងញៀនពិតជាបានវាយលុកចូលមកក្នុងសង្គមសង្ឃមែននាពេលបច្ចុប្បន្ននេះ។
ប្រាំបីថ្ងៃមុននោះ គឺនៅថ្ងៃទី២ ខែកុម្ភៈ ក្រុមសមត្ថកិច្ចបានឃាត់ខ្លួនព្រះសង្ឃចំនួន៥អង្គក្នុងវត្តមួយ ក្នុងខេត្តស្វាយរៀង ករណីប្រើប្រាស់គ្រឿង ញៀនដូចគ្នា។
ដូច្នេះវាហាក់ដូចជាសញ្ញាមួយថាគ្រឿងញៀនខុសច្បាប់មិនមែនត្រឹមតែរាតត្បាតក្នុងស្រទាប់ប្រជាពលរដ្ឋទូទៅ ជាពិសេសក្រុមយុវជនប៉ុណ្ណោះទេ ប៉ុន្តែគ្រឿងញៀននេះបានជ្រៀតចូលក្នុងស្រទាប់ព្រះសង្ឃព្រះពុទ្ធសាសនា។ព្រះសង្ឃដែលត្រូវកម្រិតដោយធម៌វិន័យយ៉ាងតឹងតែងបំផុតជាពិសេសទាក់ទងនឹងគ្រឿងស្រវឹង ព្រះសង្ឃនឹងមិនត្រូវអនុញ្ញាតិឲ្យសេពគ្រឿងស្រវឹងឬគ្រឿងញៀននោះទេ។
គង់នៅវត្តនាគវ័ន ស្ថិតនៅសង្កាត់បឹងកក់២ ខ័ណ្ឌទួលគោក កណ្តាលរាជធានីភ្នំពេញព្រះភិក្ខុកល្យាណសិរី មឿន ចន្ថា បានទទូលស្គាល់យ៉ាងឆាប់ រហ័សថាគ្រឿងញៀន ពិតជាបានរាតត្បាតចូលទីវត្តអារាមមួយចំនួនមែននាពេលបច្ចុប្បន្ននេះ។
យ៉ាងណាក៏ដោយព្រះអង្គបន្ថែមថាក្នុងវត្តនាគវ័នមិនមានសង្ឃសេពគ្រឿងញៀនទេ។
ដោយឡែកនៅវត្តក្រាំងធ្មង់ក្នុងភូមិព្រៃខ្លា សង្កាត់ក្រាំងធ្មង់ ខ័ណ្ឌសែនសុខ ដែលស្ថិតនៅចម្ងាយប្រមាណដប់គីឡូម៉ែត្រពីចំណុចកណ្តាលរាជធានីភ្នំពេញ ព្រះចៅអធិការព្រះអង្គ ស៊ូ សុខគា មានថេរដីកាថា កន្លងមកមានជនខិលខូចបានឆ្មក់ចូលបរិវេណវត្តដើម្បីសេពគ្រឿងញៀន។ នៅពេលសួរព្រះតេជគុណថា តើបញ្ហាគ្រឿងញៀននេះបានជ្រាបចូលក្នុងចំណោមសង្ឃក្នុងវត្តនេះទេ?
ទំនងជាស្ថិតក្នុងសម្ពាធរាតត្បាតនៃគ្រឿងញៀនក្នុងទីវត្តអារ៉ាម ព្រះគ្រូសូត្រស្តាំ យឹម សំបាន គង់នៅវត្តស្រះចក ខណ្ឌ័ដូនពេញ ក្បែររមណីយ ដ្ឋានវត្តភ្នំ បានជ្រើសរើសយកវិធានការណ៍អប់រំដើម្បីបង្កាការយាយីដោយសារគ្រឿងញៀនក្នុងចំណោមព្រះសង្ឃ។
ព្រះតេជគុណមានថេរដិកាថា ក្នុងវត្តនេះមិនមានមុខសញ្ញាប្រើប្រាស់ ឬចែងចាយគ្រឿងញៀនកើតឡើងចំពោះសង្ឃ និងកូនសិស្សលោកក្នុងវត្តនេះទេ។ ដ្បិតនៅក្នុងវត្តរបស់ព្រះអង្គ មានការអប់រំអំពីការយល់ដឹងពីគ្រឿងញៀនជារៀងរាល់សប្តាហ៍។
កាលពីថ្ងៃទី ៨ ខែកុម្ភៈ សម្តេចនាយករដ្ឋមន្ត្រី ហ៊ុន សែន បានអំពាវនាវឱ្យព្រះសង្ឃអប់រំប្រជាពលរដ្ឋចៀសឆ្ងាយពីគ្រឿងញៀន។ ថ្លែងចំៗនាពិធីនោះ លោក ហ៊ុន សែន លើកឡើងថា ព្រះសង្ឃក៏មានជាប់ពាក់ព័ន្ធនឹងគ្រឿងញៀនដែរ។ «អត់ទេពេលខ្លះគ្រឿងញៀនវាជ្រកក្នុងវត្តអីអញ្ចឹងទៅ ពេលខ្លះដោយទាំងលោក ដោយទាំងព្រះសង្ឃទៅទៀត ប៉ុន្តែវាមិនមែនព្រះសង្ឃទាំងអស់នោះទេ»។
ទាក់ទិនរឿងនេះ ព្រះតេជគុណ ឃឹម សន ព្រះមេគុណរាជធានីភ្នំពេញបានមានសង្ឃដីកាថា កន្លងមកព្រះសង្ឃបានប្រឹងប្រែងយ៉ាងខ្លាំងដើម្បីអប់រំយុវជនទាំងអស់ឱ្យចៀសឆ្ងាយពីគ្រឿងញៀន តាមរយៈការទេសនាអប់រំប្រៀនប្រដៅតាមវិទ្យុ និងទូរទស្សន៍ និងការនិមន្តចុះតាមសាលារៀន នៅតាមបណ្ដាខេត្តដើម្បីផ្សព្វផ្សាយអំពីបញ្ហានេះ។
អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃ លោក មាស វីរិទ្ធ ប្រាប់វិទ្យុស្ត្រីថា ករណីព្រះ សង្ឃប្រព្រឹត្តគ្រឿងញៀននេះ សមត្ថកិច្ចបង្ក្រាបបានក្នុងចំនួនតិចតួចតែប៉ុណ្ណោះ។ លោកថានៅដើមឆ្នាំ ២០១៧នេះ សមត្ថកិច្ចបង្ក្រាបបានករណីព្រះសង្ឃប្រើប្រាស់ និងចែកកាយគ្រឿងញៀននេះ ចំនួន ២ករណី។ លោក មាស វីរិទ្ធ មានប្រសាសន៍ថា ដើម្បីទប់ស្កាត់បញ្ហាគ្រឿងញៀនក្នុងសង្គម ការចូលរួមពីវិស័យឯកជន គឺជាចំណែកមួយមិនអាចខ្វះបាន។ «ការចូលគាំទ្រពីវិស័យឯកជន វិស័យសាសនា និងសប្បុរសជន ពិតជាមានសារសំខាន់ក្នុងការជួយឱ្យសម្រេចបាននូវសមិទ្ធផល និងការផ្លាស់ប្តូរស្ថានភាពដែលកំពុងអាប់អួល ដោយសារតែបញ្ហាគ្រឿងញៀន ទៅជាស្ថាន ភាពមួយដែលអាចទទួលយកបាន មានភាពសុខដុម ដែលអាចទទួលស្គាល់ថា មានសណ្តាប់ធ្នាប់ មានសនិ្តសុខ និងសុវត្ថិភាពជាងមុន។»
រាជរដ្ឋាភិបាលកម្ពុជា បានដាក់ចេញនូវយុទ្ធនាការប្រយុទ្ធប្រឆាំង គ្រឿងញៀន ខុសច្បាប់ជាលើកដំបូងសំរាប់រយៈពេល ៦ខែ។ គិតត្រឹមពាក់ កណ្តាលខែកុម្ភៈឆ្នាំ ២០១៧នេះ សមត្ថកិច្ចបង្ក្រាបបានគ្រឿងញៀនចំនួន ១៥៦២ ករណី និងឃាត់ខ្លួនជនសង្ស័យដែលជាប់ពាក់ព័ន្ធ និងអ្នកប្រើ ប្រាស់សរុប ៣៧៤១នាក់។ក្នុងនោះមានស្រីចំនួន ៣៥៧នាក់។ ជនសង្ស័យក្នុងការជួញដូរនិងចរាចរគ្រឿងញៀនចំនួន១៧៣៧នាក់ត្រូវបានចាប់ ខ្លួន៕
