សមាជិក និងសកម្មជនគណបក្សសង្រ្គោះជាតិទាំង១៤នាក់ ដែលកំពុងជាប់ពន្ធនាគារព្រៃសរ ប្រាប់ទៅប្រធានគណបក្សសង្រ្គោះជាតិ លោក សម រង្ស៊ី ឲ្យគិតពីបញ្ហាជាតិជាធំ កុំយកពួកគេដោះដូរជាថ្នូរនឹងនយោបាយ ដើម្បីសេរីភាព។ ទោះបីយ៉ាងនេះក្តី លោក សម រង្ស៊ី ជឿជាក់ថា សកម្មជនរបស់ខ្លួនអាចនឹងមានសេរីភាពឡើងវិញនៅពេលឆាប់នេះ។ នេះបើតាមការបញ្ជាក់របស់លោក សម រង្ស៊ី នៅពេលចុះទៅសួរសុខទុក្ខសកម្មជនរបស់ខ្លួននៅពន្ធនាគារព្រៃសរ នៅព្រឹកថ្ងៃទី១៧ ខែ សីហា ឆ្នាំ២០១៥នេះ។
លោក សម រង្ស៊ី មានសង្ឃឹមយ៉ាងមុតមាំថា សមាជិក និងសកម្មជនរបស់ខ្លួនទាំង១៤នាក់ នោះនឹងអាចមានសេរីភាពឡើងវិញ តែលោកមិនទាន់បានកំណត់ពេលវេលាជាក់លាក់នៅឡើយទេ ដើម្បីជួបចរចារជាមួយលោកនាយករដ្ឋមន្រ្តី ហ៊ុន សែន ជុំវិញរឿងសមាជិក និងសកម្មជនរបស់ខ្លួនកំពុងឃុំខ្លួនក្នុងពន្ធនាគារនោះ។
បន្ថែមពីលើនេះប្រធានគណបក្សប្រឆំាង និងជាប្រធានសំឡេងភាគតិចនៃរដ្ឋសភាបានប្រាប់ទៅមន្រ្តីក្រោមឱវាតរបស់ខ្លួនឲ្យប្រើប្រាស់ពាក្យសម្តីដោយប្រុងប្រយ័ត្ន មុននឹងនិយាយស្តី ជាពិសេសមិនត្រូវនិយាយអំពីចំនុចរសើបៗនោះទេ។ ទោះបីជាលោក សម រង្ស៊ីមិនបានបញ្ជាក់អំពីចំនុចរសើបជាអ្វីក៏ដោយ ប៉ុន្តែទំនងជារឿងរសើបនោះគឺ បញ្ហាបោះបង្គោលព្រំដែនកម្ពុជា វៀតណាម ដែលកំពុងតែមានភាពចម្រូងចម្រាស់នៅឡើយ។
ឆ្លើយនឹងសំនួររបស់អ្នកកាសែតនៅមុខពន្ធនាគារព្រៃសរ ដែលសួរថាតើលោក សម រង្ស៊ី មានយុត្តសាស្ត្រអ្វីថ្មី ដើម្បីឲ្យមានការ ដោះលែងសមាជិក និងសកម្មជនរបស់ខ្លួនទាំងអស់នោះ? លោក សម រង្ស៊ី បានឆ្លើយតបវិញថា គណបក្សរបស់លោក អាចនឹងឈប់រិះគន់ចំនុចរសើបៗ របស់បក្សកាន់អំណាច ដោយងាកមករួបរួមសាមគ្គីគ្នាដោះស្រាយបញ្ហាជាតិជាធំ។
នាពេលថ្មីៗនេះ កំដៅនយោបាយកម្ពុជាបានងើបឡើងវិញ បន្ទាប់ពីសកម្មភាពរបស់តំណាងរាស្រ្តបក្សប្រឆំាងចុះអង្កេតបង្គោលព្រំដែនកម្ពុជា វៀតណាម ក្រោយមកក៏មានការបញ្ជារបស់លោក ហ៊ុន សែន ឲ្យតាមចាប់ខ្លួនសមាជិក និងសកម្មជនរបស់គណបក្សប្រឆំាង ដាក់ពន្ធនាគារព្រៃសរជាបន្តបន្ទាប់។ ជាក់ស្តែងកាលពីពេលថ្មីៗនេះ អយ្យការអមសាលាដំបូងរាជធានីភ្នំពេញ បានចោទប្រកាន់លោក ហុង សុខហួរ មន្រ្តីសមាជិកព្រឹទ្ធសភាមកពីគណបក្សសមរង្ស៊ីពីបទប្រព្រឹត្តបទល្មើសចំនួន ៣ រួមមាន ការក្លែងបន្លំឯកសារសាធារណៈ ការប្រើប្រាស់ឯកសារសាធារណៈ ការក្លែង និងញុះញង់បង្កភាពអានាធិបតេយ្យដល់សន្តិសុខ តាមមាត្រា ៦២៩, ៦៣០ និង៤៩៥ នៃក្រមព្រហ្មទណ្ឌ ដោយដាក់ពន្ធនាគារព្រៃសរបណ្តោះអាសន្ន កាលពីថ្ងៃទី១៦ សីហា ទាំងមិនទាន់ដកអភ័យឯកសិទ្ធិព្រឹទ្ធសភានៅឡើយ។
