ភ្នំពេញ៖ ក្នុងឱកាសទិវាសិទ្ធិនារីអន្ដរជាតិ ០៨ មីនា លើកទី១០៦ ឆ្នាំ២០១៧នេះ សហជីពសហភាពការងារកម្ពុជាបានរៀបចំវេទិកាមួយក្រោមប្រធានបទ “បញ្ឈប់អំពើហិង្សាលើស្ដ្រីនៅក្នុងវិស័យការងារ” ដែលប្រព្រឹត្ដឡើងនៅមជ្ឈ មណ្ឌលមង្គលឧត្ដម រាជធានីភ្នំពេញ ក្នុងគោល បំណងផ្ញើសារទៅរាជរដ្ឋាភិបាល ឲ្យបង្កើនការការពារសិទ្ធិកម្មការិនី ឲ្យបានខ្លាំងបន្ថែមទៀត ខណៈបច្ចុប្បន្នកម្មការិនីភាគច្រើននៅតែរងការបៀតបៀនកេរ្ដិ៍ខ្មាស។
ថ្លែងក្នុងទិវាសិទ្ធិនារីអន្ដរជាតិលើកទី១០៦ ថ្ងៃទី០៨ មីនា ឆ្នាំ២០១៧នេះលោក អាត់ ធន់ ប្រធានសភាពការងារកម្ពុជា មានប្រសាសន៍ថា ការរៀបចំវេទិកានេះ មានគោលបំណងចម្បងចំនួនពីរ ទី១ ជាការឧទ្ទិដល់វិរៈកម្មករ ពិសេសកម្មការិនី ដែលបានចូលរួមយ៉ាងសកម្មដើម្បីទាមទារសិទ្ធិ និងទី២ ដើម្បផ្ញើសារទៅរាជរដ្ឋាភិបាលឲ្យជួយការពារសិទ្ធិស្ដ្រីឲ្យកាន់តែខ្លាំង ខណៈបច្ចុប្បន្នស្ដ្រីដែលបំរើការងារក្នុងរោងចក្រត្រូវបានថៅកែ ឬអ្នកមានអំណាចនៅទីនោះបៀតបៀនផ្លូវភេទ និងវាយដំ។ លោកបន្ដថា នៅពេលដែលកម្មការិនីត្រូវបានថៅកែបៀតបៀនកេរិ៍្ដខ្មាស ពួកគេមិនហ៊ានទៅរកអន្ដរាគមន៍ពីតំណាងកម្មករ ឬអាជ្ញាធរនោះទេ ពីព្រោះពួកគេមានការខ្មាសអៀន និងបារម្ភខ្លាចថៅកែបញ្ឈប់ពីការងារ។
លោក អាត់ ធន់៖«គាត់អត់ហ៊ានប្រាប់គេទេ ព្រោះគាត់ខ្មាសអៀនមិត្ដភក្ដិហើយនឹងខ្លាចគេដឹងកិត្ដិយស់គាត់នឹងបាត់បង់ឬក៏ត្រូវបញ្ឈប់ពីការងារ ហើយជនល្មើសហ្នឹងចេះតែបន្ដធ្វើទៅ រហូតទាល់តែរឿងហ្នឹងធំមែនទែនបានគេដឹង»។
ពាក់ព័ន្ធរឿងនេះលោកស្រី ហេង ចិន្ដា ប្រធានគណៈកម្មាធិការយេឌ័រនៃសហភាពការងារកម្ពុជាមានប្រសាសន៍ថា បញ្ហារបស់ស្ដ្រីនៅតែបន្តកើតមាន ដរាបណាអាជ្ញាធរមិនព្រមអនុវត្ដន៍តួនាទីស្របតាមច្បាប់នោះទេ។ កន្លងមកលោកស្រីថា ជនល្មើសមួយចំនួនតែងតែត្រូវបានរួចខ្លួន បើទោះជាមានភស្ដុតាងបញ្ជាក់ថា ជននោះបានប្រព្រឹត្ដការបៀតបៀនផ្លូវភេទ ឬរំលោភលើស្ដ្រីក៏ដោយ។ ទន្ទឹមនឹងនេះលោកស្រីសំណូមពរដល់រាជរដ្ឋាភិបាល ធ្វើយ៉ាងណា អនុវត្ដន៍ច្បាប់ឲ្យមានប្រសិទ្ធិភាព ដើម្បីបង្ហាញថា រដ្ឋាភិបាលពិតជាបានជួយការពារដល់ស្ដ្រីពិតមែន។
លោកស្រី ហេង ចិន្ដា៖«ខ្ញុំសុំសំណូមពរដល់អាជ្ញាធរ ដែលពាក់ព័ន្ធ និងរដ្ឋាភិបាលជំរុញ អនុវត្ដន៍ច្បាប់ ធ្វើយ៉ាងណាឲ្យការអនុវត្ដន៍ច្បាប់ប្រកបដោយប្រសិទ្ធិភាព ដើម្បីជួយសម្រាលទុក្ខលំបាកដល់ស្ដ្រីដែលរងគ្រោះមានជំនឿជឿជាក់លើរដ្ឋាភិបាលថា ពិតជាបានជួយដល់ពួកគាត់ពេលដែលទទួលរងគ្រោះមែន»។
ទន្ទឹមនឹងការមើលឃើញពីភាពអសកម្មរបស់អាជ្ញាធរនេះដែរ នៅថ្ងៃទី០៨ មីនា នេះសម្ដេច នាយករដ្ឋមន្ដ្រី ហ៊ុន សែន ថ្លែងក្នុងពិធី អបអរសាទរទិវាសិទ្ធិនារីអន្ដរជាតិ ៨ មីនា លើកទី១០៦ នៅសាលមហោស្រពកោះពេជ្រ មានប្រសាសន៍ដោយសង្កត់ធ្ងន់ថា គ្រប់ក្រសួងស្ថាប័នទាំងអស់ ត្រូវធ្វើយ៉ាងបង្កើនការលើកកម្ពស់សិទ្ធិស្ដ្រីឲ្យបានស្មើភាពនឹងបុរស ពិសេសគឺតួនាទីស្ត្រីក្នុងជួរដឹកនាំក្នុងស្ថាប័នរដ្ឋ ។ ជាងនេះសម្តេចក៏អំពាវនាវឲ្យអាជ្ញាធរត្រូវតែធានាឲ្យបានពីការការពារទៅលើស្ដ្រី៕
