ភ្នំពេញ ៖ សាលារាជធានីភ្នំពេញបានច្រានចោលសំណើសុំប្រារព្ធទិវាសិទ្ធិនារីអន្តរជាតិសម្រាប់កម្មការិនីកាត់ដេរដែលមានបំណងធ្វើនៅទីតាំងរមណីយដ្ឋានវត្តភ្នំក្នុងរាជធានីភ្នំពេញនៅថ្ងៃទី ៨ មិនានេះ។ យ៉ាងណាមិញ ខណៈនេះ លោកនាយករដ្ឋមន្ត្រីកំពុងរៀបចំប្រារព្ធអបអរសាទរទិវានេះ នៅសាលមហោស្រពកោះពេជ្រ រាជធានីភ្នំពេញ បានយ៉ាងរលូន។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានប្រាប់សារព័ត៌មានថា សាលាក្រុងបានច្រានចោលសំណើសុំប្រារព្ធទិវាសិទ្ធិនារីជាសាធារណៈ ដែលគ្រោងធ្វើនៅទីតាំងវត្តភ្នំ។
លោកបន្តថា លោកបានជួលទីតាំងថ្មី ស្ថិតនៅបុរីមង្គលឧត្តម ក្នុងខ័ណ្ឌមានជ័យជំនួសវិញ ដើម្បីប្រារព្ធទិវានេះ ដោយមិនចង់ឱ្យមានការប្រឈមជាមួយកម្លាំងសមត្ថកិច្ច។
យោងតាមទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន បានឱ្យថា សម្តេច និងភរិយា នឹងចូលរួមប្រារព្ធទិវានេះ នៅសាលមហោស្រពកោះពេជ្រ រាជធានីភ្នំពេញ។
សូមជំរាបថា ទិវាសិទ្ធិនារីអន្តរជាតិនេះចាប់ផ្តើមប្រារព្ធឡើងនៅក្នុងឆ្នាំ ១៩០៩ ហើយទិវាប្រារព្ធឡើងដើម្បីរំលឹកដល់កូដកម្មរបស់កម្មកររោងចក្រកាត់ដេរនៅទីក្រុងញ៉ូវយ៉ក សហរដ្ឋអាមេរិក ក្នុងទាមទារសិទ្ធិសេរីភាពការងារ និងប្រាក់បៀវត្សរ៍សមរម្យ៕
