ភ្នំពេញ៖ គណបក្សប្រជាជនកម្ពុជា (CPP) បានទាមទារឲ្យគណបក្សសង្គ្រោះជាតិកែតម្រូវខ្លឹមសារ«ដូរមេឃុំបម្រើបក្ស ដាក់មេឃុំបម្រើរាស្ត្រ»។ តែគណបក្សសង្គ្រោះជាតិបកស្រាយថា គោលនយោបាយនេះជាខ្លឹមសារពាក្យស្លោក មិនមែនខ្លឹមសារនយោបាយឡើយ។
កាលពីថ្ងៃទី ៦ មីនា គណបក្សប្រជាជនកម្ពុជា (CPP) បានចេញសេចក្តីថ្លែងការណ៍ដោយទាមទារឱ្យ គណបក្សសង្គ្រោះជាតិកែតម្រូវខ្លឹមសារនេះចេញ ដោយចាត់ទុកថាមានចរិកញុះញុងបង្កហេតុ និងប្រមាថមើលងាយយ៉ាងធ្ងន់ធ្ងរដល់មន្ត្រីឃុំសង្កាត់របស់រដ្ឋ។ គណបក្សប្រជាជនកម្ពុជាព្រមានថា ប្រសិនបើគណបក្សសង្គ្រោះជាតិមិនកែម្រែខ្លឹមសារទេ នឹងប្តឹងទៅតុលាការ។
កាលពីថ្ងៃទី ២ ខែ មីនា គណបក្សសង្គ្រោះជាតិបានធ្វើសមាជដោយ ដាក់ឲ្យប្រើប្រាស់គោលនយោបាយចំនួន ៥ ចំនុច។ ក្នុងចំណោមនោះគោលនយោបាយមួយមានខ្លឹមសារ«ដូរមេឃុំបម្រើបក្ស ដាក់មេឃុំបម្រើរាស្ត្រ» ។
ទាក់ទិនការព្រមានរបស់ បក្សកាន់អំណាច លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានបកស្រាយថាខ្លឹមសារនេះ មិនខុសច្បាប់ឡើយ។
លោក យឹម សុវណ្ណ៖ «ឃ្លាឃ្លោងជាពាក្យស្លោកមិនមែនជាសារនយោបាយទេ ទី២ពាក្រស្លោកនិងសំដៅលើកទឹកចិត្តមេឃុំគ្រប់គណបក្សនយោបាយ ឲ្យធ្វើការបម្រើរាស្ត្រ ហើយពាក្យស្លោកក៏យើងបានពីប្រជារាស្ត្រដែរ»។
ចំណែកអ្នកឃ្លាំមើលកិច្ចការបោះឆ្នោតនៃអង្គការនិចហ្វិច លោក សំ គន្ធាមី យល់ថា ខ្លឹមសារនេះ ដូចជាគ្មានការញុះញុង បង្កហេតុ និងប្រមាថមើលងាយមេឃុំ ចៅសង្កាត់នោះទេ។
លោក សំ គន្ធាមី ៖«ខ្ញុំមើលច្បាប់បោះឆ្នោត ដូចជាមិនមានលក្ខណៈញុះញង់ទេ។ កុំឲ្យមានបញ្ហានៅពេលឃោសនាគណបក្សសង្គ្រោះជាតិគួរតែប្រើសារអ្វីភ្លែងពីនិងទៀតទៅ»។
លោកបានផ្តល់អនុសាសន៍ថា គណបក្សសង្គ្រោះជាតិ និងគណបក្សប្រជាជនកម្ពុជាគួរសម្របសម្រួលខ្លឹមសារសមរម្យណាមួយអាចទទួលយកបានទាំងសងខាង ដើម្បីបង្កបរិយាកាសនយោបាយមុនការបោះឆ្នោត។
ប្រទេសកម្ពុជានឹងមានការរៀបចំការបោះឆ្នោត ក្រុមប្រឹក្សាឃុំសង្កាត់ នៅថ្ងៃទី៤ មីថុនា ដោយមានសង្កាត់ និងឃុំ ១៦៤៦ ហើយក្រុមប្រឹក្សាឃុំ ១១៥៧២ ៕
