ភ្នំពេញ ៖ ការបោះឆ្នោតជ្រើសរើសក្រុមប្រឹក្សា ឃុំ សង្កាត់គ្រោងនឹងប្រព្រឹត្តិទៅនៅថ្ងៃទី៤ ខែមិថុនា ឆ្នាំ២០១៧នេះ។ រហូតមកទល់ពេលមាន តែគណបក្សនយោបាយចំនួន ១២ប៉ុណ្ណោះបានដាក់បេក្ខជនរបស់ខ្លួនដើម្បីចូលរួមប្រកួតប្រជែងការបោះឆ្នោតថ្នាក់មូលដ្ឋាននេះ។
ក្រោយពីបិទបញ្ចប់ការទទួលបញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ដែលមានរយៈពេលបីថ្ងៃរួចមក មានតែគណបក្សនយោបាយចំនួន ១២ តែប៉ុណ្ណោះដែលមានដាក់បេក្ខជនរបស់ខ្លួនសម្រាប់ការបោះឆ្នោតមូលដ្ឋាននេះ។
លោក ហង្ស ពុទ្ធា អ្នកនាំពាក្យគណកម្មាធិការជាតិរៀបចំការបោះឆ្នោត គ.ជ.ប បានឲ្យដឹងនៅថ្ងៃចន្ទ័ទី៦ខែមិនា នេះថាគិតត្រឹមថ្ងៃទី ០៥ ខែមីនា ដែល គ.ជ.ប បិទបញ្ជីឈប់ទទួលយកគណបក្សនយោបាយចូលរួមប្រកួតប្រជែងការបោះឆ្នោតក្រុមប្រឹក្សា ឃុំ សង្កាត់នោះមានតែគណបក្សនយោបាយចំនួន ១២ ប៉ុណ្ណោះដែលមានសិទ្ធិទៅប្រកួតប្រជែង។
ដោយទ្បែកគណបក្សដែលមិនបានចុះបញ្ជីតាមការកំណត់របស់ គ.ជ.ប នោះគ្មានសិទ្ធិចូលរួមប្រកួតប្រជែងនោះទេ។ «គណបក្សទាំង១២សុទ្ធតែជាគណបក្សដែលមើលទៅអាចមានសក្តានុពលក្នុងការប្រកួតប្រជែងហើយការសម្រេចចិត្តមិនចូលរួមប្រកួតប្រជែងដោយគណបក្សនយោបាយដែលនៅសល់ទៀតខ្ញុំគិតថាមិនមែនជាឧបសគ្គឬក៏មិនមែនទទួលនូវការរារាំងណាមួយ ឬក៏នីតិវិធីលំបាកនូវការចុះឈ្មោះប្រកួតប្រជែងនោះទេ ផ្ទុយទៅវិញប្រហែលគណបក្សនយោបាយដែលមិនបានចុះឈ្មោះប្រកួតប្រជែងនេះបានសម្រេចចិត្តដោយខ្លួនឯងថាមិនប្រកួតប្រជែង»។
គណបក្សនយោបាយដែលបានសុំចុះបញ្ជីបេក្ខជនឈរឈ្មោះបោះឆ្នោតទាំង ១២ គណបក្សនោះរូមមាន៖ គណបក្សប្រជាជនកម្ពុជា គណបក្សសង្គ្រោះជាតិ គណបក្សសម្ព័ន្ធដើម្បីប្រជាធិបតេយ្យ គណបក្សប្រជាធិបតេយ្យមូលដ្ឋាន គណបក្សរួបរួមជាតិ គណបក្សហ្វ៊ុនស៊ិនប៉ិច គណបក្សសំបុកឃ្មុំសង្គមប្រជាធិបតេយ្យ គណបក្សសញ្ជាតិកម្ពុជា គណបក្សសាធារណរដ្ឋប្រជាធិបតេយ្យ គណបក្សយុវជនកម្ពុជា គណបក្សអំណាចខ្មែរ និងគណបក្សជនជាតិដើមប្រជាធិបតេយ្យកម្ពុជា។
គួរបញ្ជាក់ថាក្នុងចំណោមគណបក្សនយោបាយទាំង ១២នេះ មានតែបក្សចំនួន ២ ប៉ុណ្ណោះដែលបានសុំចុះបញ្ជីនៅក្នុងឃុំ សង្កាត់ទាំង ១៦៤៦ នៅទូទាំងប្រទេសកម្ពុជា។នោះគឺ គណបក្សប្រជាជនកម្ពុជា និងគណបក្សសង្គ្រោះជាតិ។
តាម គ.ជ.ប ឱ្យដឹងថាបេក្ខជនដែលជាសមាជិកក្រុមប្រឹក្សាឃុំ-សង្កាត់ សម្រាប់ការបោះឆ្នោត នាពេលខាងមុខនេះមានចំនួនសរុប ១១,៥៧២នាក់ ហើយការបោះឆ្នោតក្រុមប្រឹក្សាឃុំ-សង្កាត់នឹងប្រព្រឹត្តទៅនៅថ្ងៃទី ០៤ ខែមិថុនា ឆ្នាំ២០១៧៕
