ភ្នំពេញ៖ស្ដ្រីកំពុងតែបោះជំហានចូលកាន់តែច្រើនក្នុងវិស័យរដ្ឋបាលនិងវិស័យសេដ្ឋកិច្ច។ របាយការណ៍របស់ក្រសួងកិច្ចការនារីនៅថ្ងៃនេះបង្ហាញថាស្ត្រីក្នុងរដ្ឋបាលសាធារណៈមានចំនួន ២២ភាគរយ។ ដោយឡែកស្ត្រីជិត ៥០ភាគរយកំពុងសកម្មក្នុងវិស័យសេដ្ឋកិច្ច។
មានស្ត្រីកំពុងកាន់កាប់មុខដំណែងក្នុងរដ្ឋបាលសាធារណៈចំនួន ៦៣០២នាក់។ នេះបើតាមរដ្ឋមន្ត្រី ក្រសួងកិច្ចការនារីនិងអតីតយុទ្ធជនដែលបានថ្លែងនៅថ្ងៃចន្ទ ទី៦ ខែមីនានេះ។ លោកស្រី អ៊ឹង កន្ថាផាវី ថ្លែងក្នុងពិធីអបអរទិវាសិទ្ធិនារីអន្តរជាតិនៅមន្ទីររដ្ឋសភាថា ស្ត្រីមានចំនួន ២២ភាគរយនៃរាជការដែលមានមុខដំណែងសរុបចំនួន២៨ ០៤៥នាក់។
ពិធីអបអរសាទរទិវាសិទ្ធិនារី ៨ មីនា នៅមន្ទីររដ្ឋសភាធ្វើឡើងពីរថ្ងៃ មុនទិវាជាផ្លូវការត្រូវចាប់ផ្តើម។ ក្នុងពិធីនេះដែរ លោកស្រីរដ្ឋមន្ត្រីក្រសួងកិច្ចការនារី អ៊ឹង កន្ថាផាវី បានលើកឡើងថាស្ត្រីស្ទើរតែពាក់កណ្តា លកំពុងតែសកម្មក្នុងវិស័យសេដ្ឋកិច្ច។ ក្នុងនោះស្ត្រីក្នុងវិស័យឧស្សហកម្មមានចំនួន ៤៧,៤ភាគរយ។ ហើយមានស្ត្រីចំនួន៤៥,៣ភាគរយកំពុងធ្វើការក្នុងវិស័យកសិកម្ម។
តាមលោកស្រីអ៊ឹង កន្ថាផាវី ស្ត្រីដែលកំពុងមានសញ្ញាប័ត្រជាន់ខ្ពស់ដូចជាបរិញ្ញាប័ត្ររងនិងបរិញ្ញាប័ត្រចំនួនជិត ៥០ភាគរយនិងស្ត្រីដែលមានសញ្ញាប័ត្របណ្ឌិតចំនួនជាង ៥ភាគរយខណៈដែលស្ត្រីមានសញ្ញាបប័ត្រអនុបណ្ឌិតចំនួនជិត២២ភាគរយ។
សម្តេច ហេង សំរិន ប្រធានរដ្ឋសភា បានជំរុញឲ្យរដ្ឋាភិបាលបន្តពង្រឹងនិងលើកកំពស់សមភាពយេនឌ័រ ការចូលរួមស្ត្រីនិងកុមារនៅក្នុងសង្គមឲ្យកាន់តែច្រើនថែមទៀត៕
