ភ្នំពេញ៖ស្ថានទូតជប៉ុនប្រចាំនៅកម្ពុជា ដាក់ការសង្ឃឹមថា ទាំងគណបក្សកាន់អំណាច និងគណបក្សប្រឆាំង បន្តកិច្ចខិតខំប្រឹងប្រែងដើម្បីបង្កើតឲ្យបាននូវបរិយាកាសនយោបាយមួយដែលអនុគ្រោះដល់ការបោះឆ្នោតនោះ។
ទាំងអ្នកនាំពាក្យ គ.ជ.ប និង មន្ត្រីឃ្លាំមើលការបោះឆ្នោតសាទរការខិតខំប្រឹងប្រែងរបស់ប្រទេសជប៉ុន ខណៈអ្នកនាំពាក្យរដ្ឋាភិបាលថា ជាគតិបណ្ឌិតរបស់សម្ដេច ហ៊ុន សែន ដែលឲ្យជប៉ុនជួយកម្ពុជារឿងបោះឆ្នោត។
ការបង្ហាញក្ដីសង្ឃឹមរបស់ស្ថានទូត ជប៉ុន ប្រចាំនៅកម្ពុជាទំនងជាលើកដំបូងហើយដែលបានឆ្លើយតាម អ៊ីម៉ែល មកកាន់វិទ្យុស្ត្រីFM102 ដែលបានចោទសួរអំពីស្ថានការណ៍នយោបាយនៅកម្ពុជានាពេលចុងក្រោយនេះ។ ទន្ទឹមនឹងនេះដែរប្រទេសជប៉ុន ផ្តល់សារៈសំខាន់លើការរៀបចំការបោះឆ្នោតប្រកបដោយសេរី និង យុត្តិធម៌ ដែលមានការចូលរួមពីភាគីពាក់ព័ន្ធទាំងអស់ចូលរួម។ ក្នុងន័យនេះ ស្ថានទូតជប៉ុន នឹងបន្តតាមដានស្ថានការយ៉ាងយកចិត្តទុកដាក់រួមទាំងការអនុវត្តច្បាប់ស្តីពីគណបក្សនយោបាយដែលបានធ្វើវិសោធនកម្មរួចហើយ។
ទាក់ទិនរឿង នេះ លោក ហង្សពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប ទទួលស្គាល់ថា ប្រទេសជប៉ុន ពិតជាខិតខំជួយកម្ពុជាខាងកិច្ចការបោះឆ្នោតដោយយកចិត្តទុកដាក់ពិតប្រាកដមែន។ លោកបាននិយាយថា ជប៉ុនជួយទាំង ថវិកា ទាំងសម្ភារៈនិង ទាំងបច្ចេកទេសផងដែរ។ «ជប៉ុនបានជួយថវិកាចំនួនជាងមួយលានដុល្លារ និងជួយជាគំនិតផ្សេងៗ កិច្ចការកែទម្រង់ឲ្យកាន់តែរីកចម្រើននៅក្នុងការបោះឆ្នោត។ ជាឧបករណ៍គាត់បានតម្លើងសេវា កន្លែងផ្ទុកខួរក្បាលនូវព័ត៌មាននិងទិន្នន័យទាំងឡាយពាក់ព័ន្ធនឹងអ្នកបោះឆ្នោត»។
ជប៉ុនជា ប្រទេសមួយ ប្ដេជ្ញាជួយអភិវឌ្ឍប្រទេសកម្ពុជា តាមរយៈកិច្ចព្រមព្រៀងក្រុងប៉ារីស២៣ តុលា ១៩៩១។ តែការជួយផ្នែកបោះឆ្នោតនេះ ទំនងទើបតែជាលើកដំបូងរបស់ប្រទេសជឿនលឿនមួយនេះ ។ លោក សំ គន្ធាមី នាយកប្រតិបត្តិនៃអង្គការឃ្លាំមើលការបោះឆ្នោតមួយហៅថា និចហ្វិច ក៏បានទទួលស្គាល់ចំពោះ ការជួយឧបត្ថម្ភគាំទ្រទាំងបច្ចេកទេស និងថវិការបស់ប្រទេសជប៉ុន ដោយចាត់ទុកថា ជប៉ុន ជួយគឺជួយទាំងភាពស្មោះត្រង់។ «ជប៉ុនគាត់ធ្វើអញ្ចឹងវាល្អប្រពៃហើយ ខ្ញុំរីករាយណាស់លឺថា គេជួយយើងក្នុងការរៀបចំតាមដានសភាពការណ៍នយោបាយ ឃើញស្រាប់ហើយអ្នកនយោបាយខ្មែរ មិនទាន់ដឹងអីរវល់តែឈ្លោះគ្នា អញ្ចឹងបានចំនុចនេះជាចំណុចវិជ្ជមានមួយ ដែលយើងគួរតែអបអរសាទរ»។
ការដែលប្រទេសជប៉ុន សម្រេចជួយកិច្ចការបោះឆ្នោតនៅប្រទេសកម្ពុជា ជាលើកដំបូងនេះ គឺធ្វើឡើងបន្ទាប់ពី គណបក្សប្រជាជនកម្ពុជា និងគណបក្សសង្គ្រោះជាតិ បានសម្រេចថា ត្រូវមានសហគមន៍អន្តរជាតិជួយកិច្ចការនេះ ទើបកម្ពុជាអាចរៀបចំការបោះឆ្នោតមានភាពសុក្រិត្យ និងយុត្តិធម៌។
លោក ផៃ ស៊ីផាន អ្នកនាំពាក្យរដ្ឋាភិបាលមានប្រសាសន៍ថា គឺជាស្នាដៃ និងភាពវាងវៃរបស់សម្តេចនាយករដ្ឋមន្ត្រី ទើបមានសហគមន៍អន្តរជាតិចូលជួយប្រទេសកម្ពុជា។ «យើងឃើញការអំពាវនាវរបស់សម្តេចអគ្គមហាសេនាបតីតេជោ ហ៊ុន សែន សុំឲ្យបរទេសចូលរួមនៅក្នុងការរៀបចំឲ្យមានព្រឹត្តិការណ៍ក្នុងការចុះឈ្មោះបោះឆ្នោតឲ្យបានសុក្រិត្យ ប្រសើរជាងមុនទៀត»។
ប្រទេសកម្ពុជានឹងមានការបោះឆ្នោតសំខាន់ចំនួន២ គឺការបោះឆ្នោតក្រុមប្រឹក្សាឃុំសង្កាត់ នៅថ្ងៃទី៤ មិថុនា ឆ្នាំ២០១៧ និងការបោះឆ្នោតសភាអាណត្តិទី៦នៅឆ្នាំ២០១៨។ ការបោះឆ្នោតលើកនេះត្រូវគេរំពឹងថា នឹងមានអ្នកសង្កេតការណ៍អន្តរជាតិជាច្រើនរយនាក់មកឃ្លាំមើលស្ថានការណ៍ឃោស នាបោះឆ្នោតគណបក្សនីមួយៗនៅប្រទេសកម្ពុជា៕
