ភ្នំពេញ៖ តុលាការកំពូលនៅថ្ងៃនេះបានលើកពេលប្រកាសសាលដិកា ស្តីពីបណ្តឹងសុំទាមទារឲ្យដោះលែងក្រុមមន្ត្រីសិទ្ធិមនុស្សនិងមន្ត្រីគជប ស្របពេលដែលក្រុមអង្គការសង្គមស៊ីវិលស្នើសុំឲ្យដោះលែងពួកគេ ជាបន្ទាន់។
តុលាការកំពូលបានបើកសវនាការនៅថ្ងៃទី ៦ ខែ មីនាស្តីពីបណ្តឹងប្រឆាំងនឹងការសម្រេចបន្តឃុំខ្លួនមន្ត្រីការពារសិទ្ធិមនុស្សរបស់សមាគមអាដហុកចំនួន ៤រូប និងអតីតអគ្គលេខាធិការរងគណកម្មការជាតិរៀបចំការបោះឆ្នោត(គជប)មួយរូប។
ប៉ុន្តែការប្រកាសសាលដិកាត្រូវពន្យាពេលរហូតដល់ថ្ងៃទី១៣ខែមិនាសប្តាហ៍ក្រោយ។
នេះបើយោងតាមក្រុមមេធាវីក្រោយពីសវនាការ។
កាលពីខែតុលា ឆ្នាំ២០១៦ សាលាដំបូងសម្រេចពន្យាពេលឃុំខ្លួនក្រុមមន្ត្រីសិទ្ធិមនុស្សនិងមន្ត្រីគជប ទាំងនេះរយៈពេល៦ខែទៀតដោយយកហេតុផលថាត្រូវបន្តការស៊ើប អង្កេត។
លោក ឡោ ជុនធី មេធាវីការពារជនជាប់ចោទបានប្រាប់អ្នករាយការណ៍ព័ត៌មាននៅថ្ងៃនេះថា ការសម្រេចបន្តឃុំខ្លួនក្តីរបស់លោក អាចនឹងប៉ះពាល់ដល់បញ្ហាផ្លូវចិត្ត និងជីវភាពដល់ក្រុមគ្រួសារកូនក្តីលោក។
លោកមេធាវី ជុនធី បានស្នើឲ្យតុលាការពិចារណាអំពីការបន្តឃុំខ្លួនកូនក្តីរបស់លោក ស្របពេលដែលដំណើរការស៊ើបអង្កេតទទួលបានលទ្ធិផលតិចតួច។
«តើយុត្តិធម៌នៅកន្លែងណា រកកំហុសនៅក្នុងនីតិវិធីនិង បើរកមកដល់ពេលនេះ ៦ខែហើយ អត់មានការរីកចំរើនវាតិចតួចបំផុត ផលវិបាកទៅលើកូនក្តីរបស់យើងដែលគាត់ជាប់ឃុំ ទាំងស្ថានភាពផ្លូវចិត្ត ផ្លូវកាយ ទាំងសេដ្ឋកិច្ច កូនចៅរបស់គាត់នៅតូចៗ»។
អ្នកការពារសិទ្ធិមនុស្សទាំងបួនរូប រួមមានលោកស្រី លឹម មុន្នី លោក នី សុខា លោក ណៃ វ៉ង់ដា និងលោក យី សុខសាន្ត រួមទាំង លោក នី ចរិយា គណលេខាធិការរងគណកម្មការជាតិរៀបចំការបោះឆ្នោត(គ.ជ.ប)។
អ្នកការពារសិទ្ធិមនុស្សអាដហុក ត្រូវសាលាដំបូងរាជធានីភ្នំពេញ សម្រេចឃុំខ្លួនចាប់តាំងពីខែឧសភា ឆ្នាំ២០១៦ មកម្ល៉េះក្រោមបទចោទសូកប៉ាន់សាក្សី និងសមគំនិតសូកប៉ាន់ សាក្ស៊ី តាមមាត្រា ៥៤៨ នៃក្រមព្រហ្មទណ្ឌ។ ការឃុំខ្លួនអ្នកទាំងនោះ រហូតមកដល់ពេលនោះចំនួន ៣១២ ថ្ងៃ ហើយ។
កាលពីថ្ងៃទី ៥ ខែមីនា ម្សិលមិញ អង្គការសង្គមស៊ីវិលចំនួន ៧៨ បានអំពាវនាវឲ្យរាជរដ្ឋាភិបាលដោះលែងអ្នកការពារសិទ្ធិមនុស្សទាំងបួនរូប និងមន្ត្រីគ.ជ.ប ជាបន្ទាន់។
នៅក្នុងសេចក្តីថ្លែងការណ៍រួមរបស់ខ្លួនក្រុមអង្គការទាំងនេះបានសំដែងការព្រូយបារម្ភចំពោះការកើនឡើងនៃការបង្ក្រាបរបស់រដ្ឋាភិបាលមកលើសេរីភាពជាមូលដ្ឋាន។
ហើយអង្គការទាំងនេះចាត់ទុកថាគឺជា«ការវាយប្រហារដោយសារហេតុផលនយោបាយ។»
ក្រុមអង្គការសង្គមស៊ីវិលចាត់ទុកថា«អ្នកការពារសិទ្ធិមនុស្សក្លាយជាគោលដៅគំរាមកំហែង យាយីតាមផ្លូវតុលាការ និងការប្រើប្រាស់អំពើហិង្សា។»
អង្គការទាំង៧៨ ហាក់មើលឃើញថា អាជ្ញាធរបានប្រើយុទ្ធសាស្ត្របានគិតទុកជាមុនក្នុងការដាក់ទណ្ឌកម្ម និងរារាំងសំឡេងជំទាស់ មុនការបោះឆ្នោតឃុំ/សង្កាត់ និងបោះឆ្នោតជាតិ។
លោកផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណរដ្ឋមន្ត្រីបានពន្យល់ថារដ្ឋាភិបាលមិនមានសិទ្ធិដោះលែងមន្ត្រីសង្គមស៊ីវិលនិងអតីតអគ្គលេខាធិការរង គជប បានទេដោយសារការសម្រេចនោះជាឆន្ទានុសិទ្ធិរបស់តុលាការ។
លោកផៃ ស៊ីផាន បានហៅក្រុមមន្ត្រីសិទ្ធិមនុស្សទាំងនោះថា«ធ្វើការបម្រើតាមឆន្ទៈរបស់ជនបរទេស»៕
