ភ្នំពេញ៖សម្ដេចនាយករដ្ឋមន្ដ្រី ហ៊ុន សែន នៅថ្ងៃនេះបានថ្លែងសារនយោបាយជាថ្មីម្ដងទៀតដោយផ្ដោតទៅលើបញ្ហាសន្ដិភាព បញ្ហាភាពចម្រូងចម្រាសខាងនយោបាយជាមួយបក្សប្រឆាំង តែសម្ដេចបានអះអាងថា កម្ពុជាមានគណបក្សនយោបាយជាច្រើន ដើម្បីចូលរួមការបោះឆ្នោតក្រុមប្រឹក្សា ឃុំ សង្កាត់ នៅថ្ងៃទី០៤ មិថុនា ខាងមុខនេះ ដែលនេះគឺជាប្រទេសមួយមានពហុបក្ស។
សម្ដេច ហ៊ុន សែន ថ្លែងដូចនេះក្នុងពិធីសម្ពោធការដ្ឋានសាងសង់ផ្លូវក្រវ៉ាត់ក្រុងខ្សែទី២ កំណាត់ទី២ និងសម្ពោធដាក់ឲ្យប្រើប្រាស់ ផ្លូវក្រវ៉ាត់ក្រុងទី២ កំណាត់ទី១ ពីទំនប់កប់ស្រូវឆ្ពោះទៅក្រុងតាខ្មៅ។ ក្នុងពិធីនេះសម្ដេចនាយករដ្ឋមន្ដ្រីបានបញ្ជាក់ថា គណបក្សនយោបាយចុះឈ្មោះនិងបញ្ជូនបេក្ខជនសម្រាប់ការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ នេះមាន ១២គណបក្ស ដែលសម្ដេចថា ចំនួននេះអាចបញ្ជាក់បានថា បើបក្សណាមួយគ្មានក្នុងការប្រកួតនេះទេ គឺគ្មានបញ្ហឡើយ ព្រោះកម្ពុជាមានពហុបក្សច្រើនល្មមហើយ។ ដោយភ្ជាប់នឹងរឿងនេះប្រមុខរដ្ឋាភិបាលបាននិយាយោងដល់អ្នកនយោបាយម្នាក់ ដែលចាកចេញពីតំណែងហើយតែបែរជាបន្ដវាយប្រហារមកលើរដ្ឋាភិបាលរបស់សម្ដេចថែមទៀត។ សម្ដេច ហ៊ុន សែន ដែលទំនងសំដៅដល់លោក សម រង្ស៊ី បាននិយាយថា លោកនឹងមិនអត់ឱនឲ្យបុគ្គលនេះទេ ទោះក្នុងកាលៈទេសៈណាក៏ដោយ ព្រោះបុគ្គលនេះមិនកែចរិកឡើងដែលសម្ដេចថា “ស្លឹកឈើជ្រុះមិនឆ្ងាយពីគល់”។
តែយ៉ាងនេះក្ដីសម្ដេចប្រមុខរដ្ឋាភិបាលបាននិយាយថា មេបក្សនយោបាយទាំងអស់កុំដើរតួជាតួឯក ព្រោះគ្មានអ្នកឯងក៏មានគេធ្វើដែរ ហើយនៅកម្ពុជាមិនមែនមានតែគណបក្សពីរនោះទេ គឺមានរហូតដល់ទៅ ១២គណបក្សឯណោះ៕
