ភ្នំពេញ ៖ ប្រមុខរាជរដ្ឋាភិបាលកម្ពុជា សម្តេច ហ៊ុន សែន អំពាវនាវឱ្យក្រសួងវប្បធម៌ និងវិចិត្រសិល្បៈ និងស្ថាប័នពាក់ព័ន្ធផ្សេងៗទៀតត្រូវចាត់វិធានការទប់ស្កាត់បរិស្ថានចរន្តសាកល ភាវូបនីយកម្មដែលអាចជះឥទ្ធិពលអវិជ្ជមានមកលើយុវវ័យកម្ពុជា។ ការអំពាវនាវនេះធ្វើ ទ្បើងខណៈដែលសម្តេច ហ៊ុន សែន ចូលរួមអបអរសាទរ ទិវាវប្បធម៌ជាតិ ៣ មីនា លើកទី១៩ នៅសាលមហោស្រពចតុមុខ ភ្នំពេញ កាលពីរសៀលថ្ងៃទី០៣ ខែមីនា ឆ្នាំ២០១៧។
កម្លាំងយុវជនគឺជាកម្លាំងសកម្មរបស់សង្គមជាតិ ដែលចាំបាច់ត្រូវយកចិត្តទុកដាក់ខ្ពស់ និងគិតគូរអោយបានត្រឹមត្រូវតាមរយៈការផ្ទេរមរតកអោយទៅអ្នកបន្តវេន រួមទាំងអ្នកជំនាន់មុន និងអ្នកជំនាន់ក្រោយ។ ត្រូវធ្វើការអោយបានស៊ីសង្វាក់គ្នា ទាំងការផ្ទេរ និងការទទួលសំដៅរួមគ្នាថែរក្សាការពារអត្តសញ្ញាណវប្បធម៌ជាតិអោយបានគង់វង្ស។ នេះបើតាមគេហទំព័ររបស់សម្តេច ហ៊ុន សែន ដែលបានបង្ហោះជាសាធារណៈក្រោយពីបញ្ចប់ពិធីអបអរសាទរ ទិវាវប្បធម៌ជាតិ ៣ មីនា លើកទី១៩ នៅសាលមហោស្រពចតុមុខ ។
ដោយសារតែយុវជនគឺជាកម្លាំងសកម្មយ៉ាងខ្លាំងរបស់សង្គមជាតិនេះហើយ បញ្ហាវប្បធម៌គឺជារឿងសំខាន់ដែលត្រូវចាំបាច់ដោះស្រាយ។ សម្តេច ហ៊ុន សែន បានឱ្យដឹងតាមរយៈគេហទំព័ររបស់ សម្តេចថា បរិស្ថានវប្បធម៌ក្នុងចរន្តសាកលភាវូបនីយកម្មក្នុងសម័យបច្ចុប្បន្នដែលកំពុងហូរចូលយ៉ាងគំហុកពីគ្រប់ទិសទី អាចជះឥទ្ធិពលអវិជ្ជមានមកលើយុវវ័យកម្ពុជា ដូចច្នេះក្រសួងវប្បធម៌ និង ស្ថាប័នពាក់ព័ន្ធត្រូវយកចិត្តទុកដាក់តាមដាននិងមានវិធានការទប់ស្កាត់អោយមានប្រសិទ្ធភាពខ្ពស់។
សម្តេច ហ៊ុន សែន បានផ្តល់អនុសាសន៍មួយចំនួនក្នុងការចូលរួមថែរក្សាវប្បធម៌ជាតិខ្មែរដូចជា៖ រៀងរាល់មហោស្រពសិល្បៈនីមួយៗត្រូវចេះចម្រាញ់យកទាំងខ្លឹមសារ និងរូបភាពដ៏សំបូរបែបមកបង្ហាញអោយមានភាពទាក់ទាញនិងសម្របតាមបរិការណ៍សង្គម ដោយឈរលើមូលដ្ឋានអភិរក្សដើម្បីអភិវឌ្ឍន៍ ពោលគឺរក្សាចាស់ បង្កើតថ្មី ប៉ុន្តែថ្មីត្រូវមានជាអត្តសញ្ញាណ។ ត្រូវយកចត្តទុកដាក់ស្រាវជ្រាវអោយបានទូលំទូលាយ ស៊ីជម្រៅ អំពីវប្បធម៌នានានៅកម្ពុជា ជាពិសេសវប្បធម៌ជនជាតិដើមភាគតិច ដើម្បីប្រមូលចងក្រងទុកជាសម្បត្តិវប្បធម៌មួយរបស់កម្ពុជា អោយសក្តិសមជាព្រះរាជាណាចក្រនៃវប្បធម៌ ជាសួនច្បារចម្រុះពណ៌ជាដើម។
ឆ្លើយតបនឹងលើកទ្បើងនេះ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោក ស្រី ភឿង សកុណា បានផ្តល់បទសម្ភាសន៍ឱ្យវិទ្យុនៅថ្ងៃអាទិត្យ ទី០៥ ខែមីនា ឆ្នាំ២០១៧នេះថា ការហូរចូលវប្បធម៌បរទេសនេះភាគច្រើនប៉ះទៅលើយុវជន។ លោកស្រី ភឿង សកុណា បន្តថា ផលប៉ះពាល់ទៅលើយុវជនដោយសារតែយុវជនឆាប់ទទួលយកភាពអវិជ្ជមាននៃការហូរចូលវប្បធម៌ទាំងអស់នោះ ជាឧទាហរណ៍ដូចថ្ងៃបុណ្យនៃក្តីស្រលាញ់ ១៤ កុម្ភៈ ថ្ងៃបុណ្យណូអែល ជាដើមដែលជាវប្បធម៌បរទេសមិនមែនវប្បធម៌ខ្មែរនោះទេ។ លោក ស្រី ភឿង សកុណាបន្ថែមថា ការហូរចូលវប្បធម៌បរទេសដែលធ្វើឱ្យយុវជនឆាប់ទទួលយកបានគឺតាមប្រព័ន្ធបច្ចេកវិទ្យា។
ការណ៍នេះក្រសួងសាម៉ីក៏នឹងចាត់វិធានការទប់ស្កាត់វប្បធម៌បរទេសតាមរយៈប្រព័ន្ធផ្សព្វផ្សាយវិញផងដែរ គឺបញ្ជ្រាបការយល់ដឹងពីសារៈសំខាន់នៃវប្បធម៌ខ្មែរទៅប្រជាពលរដ្ឋ ជាពិសេសគឺយុវជន។ «ការហូរចូលលឿនបំផុតដែលមកប៉ះលើយុវជនយើងគឺតាមរយៈប្រព័ន្ធបចេ្ចកវិទ្យា គឺបច្ចេកវិទ្យាតាមខ្ញុំពិនិត្យមើលខ្លួនឯងផ្ទាល់ហូរចូលតាមយូធូប ភាពយន្ត អាយហ្វូន តាមអ៊ិនធឺណេតអី។ យើងនឹងផ្សព្វផ្សាយបន្ថែមទៀតធ្វើម៉េចផ្សព្វផ្សាយជាខ្លឹមសារ ជារូបភាពក្តីគឺតាមរយៈប្រព័ន្ធបច្ចេកវិទ្យាវិញដែរ»។
សូមជម្រាបថា ភ្ជាប់នឹងការអំពាវរបស់សម្តេច ហ៊ុន សែន នៅក្នុងទិវាវប្បធម៌ជាតិ ៣ មីនា លើកទី១៩ កន្លងមកនេះដែរ សម្តេចហ៊ុន សែន បានសម្រេចផ្តល់ប្រាក់១២ លានដុល្លារឱ្យសាងសង់មជ្ឈមណ្ឌលវប្បធម៌ដ៏ទំនើបមួយលើផ្ទៃដី ៤ហិកតាផងដែរ៕
