ភ្នំពេញ ៖ កាលពីថ្ងៃ ទី០៣ មីនា ម្សិលមិញ គ.ជ.ប ចាប់ផ្តើមឱ្យគណបក្សនយោបាយចុះបញ្ជីបេក្ខជនដែលត្រៀមប្រកួតប្រជែងការបោះឆ្នោតក្រុមប្រឹក្សា ឃុំ សង្កាត់ ដោយមានគណបក្សនយោបាយចំនួន ៧ បានទៅចុះបញ្ជីបេក្ខជនរបស់ខ្លួនតាមឃុំ សង្កាត់នីមួយៗ។ នេះបើតាមសេចក្តីប្រកាសព័ត៌មានរបស់ គ.ជ.ប ចុះថ្ងៃទី០៣ មីនា ម្សិលមិញ។
តាមរបាយការណ៍ដែល គ.ជ.ប ទទួលបានពីគណៈកម្មការរាជធានី ខេត្តរៀបចំការបោះឆ្នោត បានឱ្យដឹងថា គណបក្សនយោបាយដែលបានសុំចុះបញ្ជីបេក្ខជនឈរឈ្មោះបោះឆ្នោតចំនួន ៧ គណបក្សកាលពីម្សិលមិញរួមមាន៖
គណបក្សប្រជាជនកម្ពុជា គណបក្សសង្គ្រោះជាតិ គណបក្សសម្ព័ន្ធដើម្បីប្រជាធិបតេយ្យ គណបក្សប្រជាធិបតេយ្យមូលដ្ឋាន គណបក្សរួបរួមជាតិ គណបក្សហ្វ៊ុនស៊ិនប៉ិច និងគណបក្សសំបុកឃ្មុំសង្គមប្រជាធិបតេយ្យ។
តាម គ.ជ.ប ឱ្យដឹងថាបេក្ខជនដែលជាសមាជិកក្រុមប្រឹក្សាឃុំ-សង្កាត់ សម្រាប់ការបោះឆ្នោតនាពេលខាងមុខនេះមានចំនួនសរុប ១១,៥៧២នាក់។
សូមជំរាបថា ការបោះឆ្នោតក្រុមប្រឹក្សាឃុំ-សង្កាត់នឹងប្រព្រឹត្តទៅនៅថ្ងៃទី ០៤ ខែមិថុនា ឆ្នាំ២០១៧ ដែលមានឃុំ-សង្កាត់នៅទូទាំងប្រទេស ១៦៤៦៕
