ភ្នំពេញ៖ ឯកអគ្គរដ្ឋទូតសហភាពអឺរ៉ុប ប្រចាំនៅកម្ពុជា លោក ច្សច អេដហ្គាបាន ដែលអះអាងថា លោកបានចុះផ្ទាល់ដល់សាលារៀនមួយចំនួននៅតាមជនតំបន់ និងតំបន់ដាច់ស្រយាល ឃើញថា កម្រិតទទួលបាននៃការអប់រំរបស់កុមារ ពិសេស គឺក្មេងស្រី នៅមានចំនួនតិចជាងកុមារាហើយ ទទួលការអប់រំតិចនៅឡើយ ។
ការលើកឡើងរបស់លោក ច្សច អេដហ្គា ដូចនេះ ធ្វើឡើងនៅក្នុងកម្មវិធីប្រគល់ពានរង្វាន់ជ័យ លាភីដល់យុវជនខ្មែរទាំង៦រូបដែលមានស្នាដៃថតរូបល្អជាងគេ នៅស្ថានទូតសហភាពអឺរ៉ុប នៅថ្ងៃទី២ មីនា ម្សិលមិញ។ ព័ត៌មាននេះជូនសេចក្ដីរាយការណ៍ដោយកញ្ញា ជុំ ជោគជាតា៖
ថ្លែងនៅក្នុងកម្មវិធីនេះ លោក ឯកអគ្គរដ្ឋទូតសហភាពអឺរ៉ុប បានលើកឡើងថា ក្មេងស្រី និងក្មេងប្រុសគួរតែទទួលបានការសិក្សាស្មើភាពគ្នា។
តាមការបកស្រាយរបស់លោក ច្សច អេដហ្គា បញ្ហាប្រឈមមួយចំនួនទៅលើកុមារ ជាពិសេសចំពោះក្មេងស្រី ទាក់ទងនឹងការអប់រំដូចជា អត់មានសាលារៀន ហើយមានសាលារៀន ប៉ុន្ដែអត់មានគ្រូបង្រៀន និងពេលខ្លះទៀត មានសាលារៀនដែរ តែនៅឆ្ងាយពីផ្ទះ ។ លោកបានសង្កត់ធ្ងន់ថា ចំនុចសំខាន់មួយទៀតដែលលោកបានសង្កេតឃើញផងដែរនោះ គឺ ការរួមផ្សំពីកត្តាគ្រួសារជាចំបងផងដែរ។
លោក ច្សច អេដហ្គា ៖«តាមបទពិសោធន៍យើងកន្លងមក យើងសង្កេតឃើញមានបញ្ហាប្រឈមមួយចំនួន ជាពិសេសចំពោះក្មេងស្រីទាក់ទងជាមួយនឹងការទទួលបានការអប់រំនឹងទីមួយ.គឺបញ្ហាប្រឈមខ្លាំងជាងគេ គឺ អត់មានសាលារៀន ពេលខ្លះមានសាលារៀនហើយប៉ុន្ដែអត់មានគ្រូគ្រប់គ្រាន់ ហើយធ្វើយ៉ាងណាកុំអោយសាលានៅឆ្ងាយពីគាត់រស់នៅខ្លាំងពេក ធ្វើយ៉ាងណាបង្កភាពងាយស្រួលអាចអោយគាត់ទៅសិក្សាបាននោះ។ បញ្ហាប្រឈមមួយទៀត គឺ ទាក់ទងនឹងថ្លៃចំណាយសម្រាប់ការសិក្សារបស់ក្មេងទាំងអស់នោះផងដែរ ពិសេសគឺក្មេងស្រី» ។
តាមលោក លោក ច្សច អេដហ្គា បញ្ហាប្រឈមក្នុងការសិក្សាមិនមែនកើតមានតែលើក្មេងស្រីនោះទេ ប៉ុន្ដែបញ្ហាប្រឈមទាំងនោះក៏កើតមានទៅលើក្មេងប្រុសផងដែរ ព្រោះថា ក្មេងប្រុសងាយនិងលះបង់ការសិក្សាជាងក្មេងស្រីនៅកម្រិតមធ្យមសិក្សា ដោយមានគំនាបផ្នែកសេដ្ឋកិច្ច ឬមួយក៏ហិរញ្ញាវត្ថុនៅក្នុងគ្រួសាររបស់ពួកគេផ្ទាល់ ដែលគ្រួសារពួកគេបង្ខំឱ្យកូនមានកាតព្វកិច្ចស្វែងរកចំណូលដើម្បីផ្គត់ផ្គង់ដល់ក្រុមគ្រួសារ។
ទាក់ទងរឿនេះដែរ លោក រស់ សាលីន អ្នកនាំពាក្យក្រសួងអប់រំ យុវជននិងកីឡា ហាក់យល់ស្របការលើកឡើងរបស់លោក ច្សច អេដហ្គា លើចំណុចផ្ដល់អត្ថភាពសំខាន់ដែធ្វើយ៉ាងណា ឱ្យកុមារគ្រប់រូបមានសិទ្ធិស្មើៗគ្នាទាំងអស់ក្នុងការទទួលបានការសិក្សា ដោយលោកបញ្ជាក់ថា ដើម្បីកាត់បន្ថយការលំបាករបស់ក្មេងស្រី ទើបតម្រូវឱ្យមានសាលានៅក្នុងភូមិ ។
លោក រស់ សាលីន ៖«ជាពិសេសកុមារដែលជានារី គឺ ក្រសួងបានរៀបចំតាមរយៈនាយកដ្ឋឋានសុខភាពសិក្សាជាដើម បានចុះពន្យល់ណែនាំសុខភាពអនាម័យ ហើយក្រៅពីនេះ ក្រសួងបានជម្រុញឱ្យមានសាលាបឋមសិក្សា និងមតេ្តយ្យបឋម និងអនុវិទ្យាល័យឱ្យនៅជិតបំផុតនៅផ្ទះប្រជាពលរដ្ឋ »។
តាមលោក រស់ សាលីន យោងទៅលើច្បាប់អប់រំឆ្នាំ ២០០៧ គឺ ក្នុងនោះ បានជម្រុញឱ្យកុមារទាំងអស់ចូលរៀនឱ្យបានគ្រប់ៗគ្នា ជាពិសេសនៅក្នុងកម្រិតការសិក្សាជាទូទៅពីថ្នាក់ទី១ ដល់ថ្នាក់ទី៩ ដែលរហូតមកដល់ពេលនេះ កុមារដែលគ្រប់អាយុចុះឈ្មោះចូលរៀន មាន ៩៨ភាគរយហើយ នៃកុមារទូទាំងប្រទេស។
តែបែបនេះក្ដី លោក ច្សច អេដហ្គា លើឡើងថា សហភាពអឺរ៉ុប និងក្រសួងអប់រំកំពុងតែសិក្សាគំនិតផ្ដួចផ្ដើមជាមួយគ្នាជុំរុញអោយរដ្ឋាភិបាលកម្ពុជាផ្ដល់ជាមធ្យោបាយផ្ដល់ការអប់រំទៅដល់កុមារ កុមារី ដូចជា ការផ្ដល់អាហារូបករណ៍ និងការទទួលបានការសិក្សា៕
