ភ្នំពេញ៖ប្រព័ន្ធផ្សព្វផ្សាយមានទាំង វិទ្យុ ទូរទស្សន៍ និងកាសែត នៅតែជាចលករមួយជំរុញឲ្យមានអំពើហិង្សាទៅលើស្ដ្រី តាមរយៈការផលិតកម្មវិធីនិងការចុះផ្សាយរបស់ប្រព័ន្ធផ្សព្វផ្សាយទាំងនេះដែលមានរូបភាពហិង្សា។ ករណីនេះទាំងនិពន្ធនាយកកាសែតនិងសាស្ដ្រាចារ្យសារព័ត៌មានយល់ថា ពិតជានៅមានករណីនេះមែន ប៉ុន្ដែក្នុងកម្រិតតិចតូចប៉ុណ្ណោះ។
«ប្រព័ន្ធផ្សព្វផ្សាយនៅតែរួមចំណែកបង្កឲ្យមានហិង្សាលើស្ដ្រី»។ នេះជាការប្រសាសន៍របស់លោកស្រី រស់ សុភាព នាយិការអង្គការយេនឌ័រ និងអភិវឌ្ឍន៍ដើម្បីកម្ពុជា ហៅកាត់ថា GADC ដែលលោកស្រីបានលើកឡើង ក្នុងសិក្ខាសាលាមួយស្ដីពី “ប្រព័ន្ធផ្សព្វផ្សាយនិងការយល់ដឹងយេនឌ័រ” ។ សិក្ខាសាលានេះធ្វើឡើងនៅភោជនីយដ្ឋាន ខ្មែរសុរិន រយៈពេល០២ថ្ងៃ ចាប់ពីថ្ងៃទី០២ ដល់ថ្ងៃទី០៣ ខែមីនា ឆ្នាំ២០១៧ រាជធានីភ្នំពេញ។
តែយ៉ាងណានាយិកាអង្គកា GADC សង្កត់ធ្ងន់ថា ថ្វីបើប្រព័ន្ធផ្សព្វផ្សាយបានចូលរួមបង្កឲ្យមានអំពើហិង្សាលើស្ដ្រីក៏ពិតមែន ប៉ុន្ដែមិនមែនប្រព័ន្ធផ្សព្វផ្សាយទាំងអស់សុទ្ធតែរួមចំណែកទាំងស្រុងក្នុងការជំរុញអំពើហិង្សាលើស្ដ្រីទេ គ្រាន់តែភាគច្រើនបានរួមចំណែកករណីនេះតាមរយៈកម្មវិធីផ្សាយឬការបោះពុម្ពផ្សាយរបស់ពួកគេ។ លោកស្រី រស់ សុភាព បន្ដថា ទាំងស្ថានីយ៍វិទ្យុ ទូរទស្សន៍ និងស្ថាប័នកាសែត គួរតែសិក្សាឲ្យបានច្រើនឡើងវិញជុំវិញកម្មវិធីផ្សាយរបស់ខ្លួន ថា តើជាការជួយសង្គមកាត់បន្ថយហិង្សាលើស្ដ្រី ឬក៏ជាការបង្ហាញរបៀបប្រព្រឹត្ដហិង្សាលើស្ដ្រី។
លោកស្រី រស់ សុភាព ៖«ពេលខ្លះយើងកំពុងតែប្រាប់ប្រជាពលរដ្ឋថា យើងកំពុងបញ្ឈប់អំពើហិង្សា ប៉ុន្ដែយើងបានបោះពុម្ពសៀវភៅមកថា នែ ការធ្វើអំពើហិង្សាគេយកអានេះទៅធ្វើ គេយកកាំបិតទៅកាប់ យកកាំបិតចិតបន្លែទៅចាក់ ហើយបង្ហាញអំពីសម្ភារៈទាំងអស់ហ្នឹង បង្ហាញទៅក្មេងឃើញ។»
ជាការឆ្លើយតបលោក ទាវ សារៈមុន្នី និពន្ធនាយកកាសែតរស្មីកម្ពុជា មានប្រសាសន៍ថា បច្ចុប្បន្នស្ថាប័នកាសែតមួយចំនួនបានកែលំអ ការចុះផ្សាយរូបភាពរបស់ខ្លួនបានច្រើនហើយ។ ប៉ុន្ដែលោកក៏ទទួលស្គាល់ផងដែរថា កាសែតខ្លះនៅតែមានការចុះផ្សាយរូបភាពដែល ជំរុញនិងបង្រៀនពីសកម្មភាពប្រព្រឹត្ដហិង្សាពិតមែន ប៉ុន្ដែលោកថា មិនមែនជាទូទៅនោះទេ ជាក់ស្ដែងដូចស្ថាប័នរបស់លោក តាំងពីដើមមកគឺមានការប្រុងប្រយ័ត្នណាស់ករណីផ្សព្វផ្សាយរូបភាពដែលមិនសមរម្យដាក់លើទំព័រកាសែត។
លោក ទាវ សារៈមុន្នី៖«សម្រាប់ខ្ញុំយល់ឃើញថា ការបង្ហាញរូបភាពហ្នឹង (ហិង្សា) វានៅតែមាន តែវាបើយើងធៀបទៅពេលមុន វាកែលម្អបានច្រើនហើយ ដោយសារតែស្ថាប័នព័ត៌មាននីមួយៗ យល់ដឹងបានច្រើនហើយ។»
ចំណែកលោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មាន មានប្រសាសន៍ថា ជាការពិតប្រព័ន្ធផ្សព្វផ្សាយមួយចំនួននៅកម្ពុជា ពិតជានៅតែមានការផ្សព្វផ្សាយខុសពីក្រមសីលធម៌វិជ្ជាជីវៈពិតមែន។
តែករណីនេះលោកយល់ថា អ្នកដែលផ្សព្វផ្សាយព័ត៌មានខុសក្រមសីលធម៌វិជ្ជាជីវៈភាគច្រើន គឺសុទ្ធសឹងតែជាប្រព័ន្ធផ្សព្វផ្សាយថ្មីដែលទើបតែង្កើត។ ជុំវិញរឿងនេះលោកយល់ថា ដើម្បីកុំឲ្យប្រព័ន្ធផ្សាយក្លាយខ្លួនជាអ្នកជំរុញករណីហិង្សាឬបង្រៀនសាធារណៈជនពីរបៀបប្រព្រឹត្ដហិង្សា ស្ថាប័នឬអង្គភាពនោះត្រូវតែគិតគូរឡើងវិញឲ្យបានហ្មតចត់មុនពេលដែលសម្រេចចុះផ្សាយអត្ថបទជាសាធារណៈ។
លោក មឿន ឈានណារិទ្ធ ៖«រយៈពេលជាង ២០ឆ្នាំកន្លងមកនេះក្រមសីលធម៌វិជ្ជាជីវៈសារព័ត៌មានគឺកើនឡើងច្រើន ប៉ុន្ដែទន្ទឹមនឹងនេះយើងក៏ទទួលស្គាល់ថា នៅមានកំហុសវិជ្ជាជីវៈនៅសល់ខ្លះដែលអ្នកសារព័ត៌មានខ្លះគាត់ទើបតែប្រកបអាជីពថ្មីៗ គាត់អត់យល់និងមិនបានឆ្លងកាត់វគ្គបណ្ដុះបណ្ដាលក្រមសីលធម៌វិជ្ជាជីវៈសារព័ត៌មាន។»
សូមជម្រាបថា ការអះអាងរបស់នាយិកាអង្គការអភិវឌ្ឍន៍ និងយេនឌ័រដើម្បីកម្ពុជា ផ្អែកទៅលើរបាយការណ៍របស់អង្គការមូលនិធិអាស៊ីដែលបង្ហាញ កាលពីថ្ងៃទី០៩ ធ្នូ ឆ្នាំ២០១៦ ថា អំពើហិង្សាលើស្ដ្រីដែលមិនថយចុះ ពីព្រោះតែកម្មវិធីមួយចំនួនរបស់ស្ថានីយ៍ទូរទស្សន៍ល្បីៗនៅកម្ពុជា សុទ្ធតែផ្ទុកនូវខ្លឹមសារអំពើហិង្សា គ្រប់ទម្រង់ទៅលើស្ត្រី។ តាមអង្គការនេះ កម្មវិធីទូរទស្សន៍បានផ្ទុកនូវខ្លឹមសារអំពើហិង្សាលើស្ត្រីខ្លាំងជាងគេ។ បន្ថែមពីនេះអង្គការនេះបានរកឃើញទៀតថា អំពើហិង្សាលើស្ដ្រីនិងកុមារ ភាគច្រើនទាំងអ្នករងគ្រោះនិងអ្នកប្រព្រឹត្ដ គឺពួកគេមានការចេះដឹងតិចតួច ហើយជាងនេះពួកគេជាក្រុមមនុស្សមានអាយុចន្លោះពី ២៦ដល់៤៩ឆ្នាំ ជាពលរដ្ឋរស់នៅតាមតំបន់ដាច់ស្រយាល៕
