ភ្នំពេញ៖សហភាពអ៊ឺរ៉ុបត្រៀមបញ្ជូនអ្នកសង្កេតការណ៍របស់ខ្លួនមកឃ្លាំមើលការបោះឆ្នោតក្រុមប្រឹក្សាឃុំ សង្កាត់ ឆ្នាំ២០១៧នេះ ក្នុងគោលបំណងដើម្បីចូលរួមធ្វើឱ្យដំណើការបោះឆ្នោតនៅកម្ពុជាកាន់តែទទួលបានភាពជោគជ័យ។ នេះបើតាមការឱ្យដឹងពីអ្នកនាំពាក្យ គ.ជ.ប លោក ហង្ស ពុទ្ធា ថ្លែងប្រាប់អ្នកសារព័ត៌មាននៅព្រឹកថ្ងៃទី ២៨ ខែកុម្ភៈ ឆ្នាំ២០១៧នៅសាលស្និសិទ្ធ គ.ជ.ប។
ថ្លែងក្រោយពីបញ្ចប់កិច្ចប្រជុំជាមួយភាគីពាក់ព័ន្ធស្តីពីនីតិវិធីនៃការសុំចុះបញ្ជីបេក្ខជនឈរឈ្មោះបោះឆ្នោតរបស់គណបក្សនយោបាយ សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ ឆ្នាំ២០១៧ អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថាសហភាពអឺរ៉ុបនឹងបញ្ជូនអ្នកសង្កេត ការណ៍មកឃ្លាំមើលការបោះឆ្នោតក្រុមប្រឹក្សាឃុំ សង្កាត់ ខាងមុខនេះ។
លោក ហង្ស ពុទ្ធា មានប្រសាសន៍ថា គ.ជ.ប សាទរដែលសហភាពអ៊ឺរ៉ុបត្រៀមបញ្ជូនអ្នកសង្កេតការណ៍របស់ខ្លួនចូលរួមឃ្លាំមើលការបោះឆ្នោតនៅកម្ពុជា។ លោកបន្តថាការបោះឆ្នោតពិតជាមានសារៈសំខាន់ណាស់ដែលត្រូវមានអ្នកសង្កេតការណ៍តាមដានពីសកម្មភាពនៃដំណើរការបោះឆ្នោតដើម្បីធ្វើឱ្យដំណើរការបោះឆ្នោតកាន់តែទទួលបានភាពជោគជ័យ។ «ជំនួបជាមួយឯកអគ្គរដ្ឋទូតសហគមន៍អឺរ៉ុបហ្នឹងលោកបានមានប្រសាសន៍ថា នៅក្នុ្ងការបោះឆ្នោតជ្រើសរើសក្រុមប្រឹក្សាឃុំ សង្កាត់ ហ្នឹង គឺមានចំនួនតិចតួច ទេបានន័យថាតែប៉ុន្មាននាក់ទេដើម្បីឃ្លាំមើលសភាពការណ៍ទាំងមូលតែម្តងប៉ុន្តែដោយទ្បែកអាចជាទ្រង់ទ្រាយធំសម្រាប់ការបោះឆ្នោត២០១៨ ថ្នាក់ជាតិ»។
ទោះបីជាយ៉ាងនេះក្តីលោកមិនទាន់អាចបញ្ជាក់បាននៅទ្បើយទេ ថាសហភាពអឺរ៉ុបនឹងបញ្ជូនអ្នកសង្កេតការណ៍របស់ខ្លួនប៉ុន្មានរូបមកសង្កេតការណ៍នោះទេ។
បើតាមសេចក្តីប្រកាសព័ត៌មានរបស់ គ.ជ.ប ចុះថ្ងៃទី ២៤ ខែកុម្ភៈ ឆ្នាំ២០១៧ ឱ្យដឹងថា គ.ជ.ប បានបានជួបពិភាក្សាការងារជាមួយ ឯកអគ្គរដ្ឋទូតសហភាពអ៊ឺរ៉ុបប្រចាំនៅកម្ពុជា លោក ចច អេដហ្គឺ និងឯក អគ្គរដ្ឋទូតជប៉ុនប្រចាំកម្ពុជា លោក ហៃដឺហ៊ីសា ហូរីនូឈី ពាក់ព័ន្ធនឹងការរៀបចំបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០១៧។
លោក ចច អេដហ្គឺ បានឱ្យដឹងតាមរយៈសេចក្តីប្រកាសព័ត៌មាននេះថា សហភាពអ៊ឺរ៉ុបនឹងបន្តទំនាក់ទំនងការងារ និងផ្តល់ជំនួយបន្ថែមទៀតប្រសិនបើ គ.ជ.ប ត្រូវការ ដើម្បីឱ្យការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ខាងមុខនេះ ទទួលបានជោគជ័យ។ បន្ថែមពីនេះទៀតលោកថា សហភាពអឺរ៉ុបនឹងបញ្ជូនអ្នកសង្កេតការណ៍មួយចំនួនមកឃ្លាំមើលការបោះឆ្នោតជ្រើសរើសក្រុមប្រឹក្សាឃុំ សង្កាត់នៅកម្ពុជា។ចំណែក លោក ហៃដឺហ៊ីសា ហូរីនូឈី មានប្រសាសន៍ដែរថា ជប៉ុនពេញចិត្តការសន្យារបស់ គ.ជ.ប នឹងរៀបចំការបោះឆ្នោតមួយប្រកបដោយ សេរី ត្រឹមត្រូវ យុត្តិធម៌ និងតម្លាភាព។
ជុំវិញនឹងការលើកទ្បើងនេះ នាយកប្រតិបត្តិអង្គការខុមហ្វ្រែល លោក គល់ បញ្ញា គាំទ្រចំពោះវត្តមានអន្តរជាតិដែលធ្វើជាអ្នកសង្កេតការណ៍បោះឆ្នោតនៅកម្ពុជា។ លោកបន្តថា យ៉ាងហោចណាស់ក្នុងមួយស្រុកមានមួយក្រុមដើម្បីចូលរួមឃ្លាំមើលការបោះឆ្នោត។ លោក គល់ បញ្ញា គូសបញ្ជាក់ថាការចូលរួមរបស់សហគមន៍អន្តរជាតិ គឺសាក្សីសំខាន់ក្នុងបោះឆ្នោតនៅកម្ពុជា។«ក្នុងន័យនយោបាយវាអាចពង្រឹងទំនុកចិត្តរបស់ប្រជាពលរដ្ឋក្នុងការបោះឆ្នោត ទី២ គេជាអ្នកសាក្សីអន្តរជាតិគេមានតួនាទីសំខាន់ណាស់ដើម្បីផ្តល់ជាមតិ ឬក៏ត្រូវវាយតម្លៃមួយថាតើការបោះឆ្នោតយើងវាស្របច្បាប់ត្រឹមត្រូវអត់គេមានបច្ចេក ទេស គេមានធនធានដើម្បីពិនិត្យស៊ីជម្រៅទៅលើដំណើរការចាត់ចែងការបោះឆ្នោតនៅកម្ពុជា»។
អ្នកនាំពាក្យ គ.ជ.ប លោក ហង្ស ពុទ្ធា ឱ្យដឹងថា រហូតមកដល់ពេលនេះគណបក្សនយោបាយដែលបានចុះបញ្ជីនៅក្រសួងមហាផ្ទៃមានចំនួន ៧១គណបក្ស។ កម្ពុជានឹងមានការបោះឆ្នោតក្រុមប្រឹក្សាឃុំសង្កាត់នៅថ្ងៃទី៤មិថុនា ២០១៧ នេះ និងឈានទៅការបោះឆ្នោតសភាអាណត្តិទី៦នៅ ២០១៨៕
