ភ្នំពេញ ៖ នាយករដ្ឋមន្ដ្រីហ៊ុន សែន បន្ដថ្លែងសារនយោបាយជាថ្មីទៀត ដោយរំលឹកពលរដ្ឋ ប្រយ័ត្នទាញប្រទេសឱ្យធ្លាក់ចូលទៅក្នុងសង្គ្រាម បើសម្ដេចត្រូវបានទម្លាក់ចេញពីតំណែង ដែលសម្ដេចថា« បើដូរហ៊ុន សែន នឹងមានអ្វីកើតឡើង» ។
ការថ្លែងរបស់សម្ដេច ហ៊ុន សែន ដូចនេះ ធ្វើឡើងនៅក្នុងពិធីសម្ពោធ អនុវិទ្យាល័យហ៊ុនសែន បឹងកុក ខេត្តកំពង់ចាម។
ក្នុងឱកាសនេះ សម្ដេចបានបញ្ជាក់ថា បើអត់លោក គឺ គ្មាននរណាមកជួយបញ្ជប់បានទេ ដែលសម្ដេចថា ប្រយ័ត្តរឿងនេះកើតឡើង បើចង់សាករសជាតិទទួលយកទៅ។
ដោយរំលឹកពីសង្គ្រាម នៅមជ្ឈឹមបូព៌ា ដោយសារការផ្ដួលរំលំ សាដាមហូសេននៃប្រទេសអ៊ីរ៉ាក់ ការដួលរំលំកាដាហ្វីនៃប្រទេសលីពីន និង សង្គ្រាមនៅស៊ីរី គឺ ជាអំពើគ្រោះថ្នាក់ ខ្លាំងណាស់ ដែលសម្ដេច ប្រៀបធៀបខ្លួនឯងថា «បើចង់សម្លាប់ហ៊ុនសែន ចង់ដូរហ៊ុនសែន មានអ្វីកើតឡើង»។
ក្រោយពីព្រមានដូចនេះ សម្ដេចបានបន្តព្រមានទៀតថា បើបក្សប្រឆាំងឈ្នះឆ្នោត អាចមានការរឹបអូសទ្រព្យសម្បត្តិរបស់ពួកអ្នកមាន ដែលសម្ដេច ថា«អាពត កើតមានទៀត»។
យោងតាមច្បាប់រដ្ឋធម្មនុញ្ញរបស់កម្ពុជា មាត្រា៥១ បានចែងថា ព្រះរាជាណាចក្រកម្ពុជាអនុវត្តន៍នយោបាយប្រជាធិបតេយ្យពហុបក្ស។ប្រជាពលរដ្ឋខ្មែរជាម្ចាស់វាសនានៃប្រទេសជាតិរបស់ខ្លួន។ អំណាចទាំងអស់ជារបស់ពលរដ្ឋ។
កម្ពុជា នឹងមានការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី៤មិថុនា ឆ្នាំ២០១៧ និង ការបោះឆ្នោតសភាអាណត្តិទី៦ នៅឆ្នាំ២០១៨៕
