ភ្នំពេញ៖សម្ដេចនាយករដ្ឋមន្ដ្រី ហ៊ុន សែន បាននិយាយថា កម្ពុជាត្រូវការប្រាក់ជំនួយជាង ៤០០លានដុល្លាអាមេរិករហូតដល់ឆ្នាំ២០២៥ ក្នុងការបោសសម្អាតមីននៅកម្ពុជា ដែលជាកេរ្ដិ៍មរតកនៃសង្គ្រាមស៊ីវិល។
ការបង្ហើបព័ត៌មានរបស់ប្រមុខរាជរដ្ឋាភិបាលកម្ពុជា ធ្វើឡើងក្នុងទិវាបោសសម្អាតមីនកាលពីសប្ដាហ៍មុន។ សេចក្ដីថ្លែងការណ៍របស់នាយករដ្ឋមន្ដ្រីបានបញ្ជាក់ថា មួយឆ្នាំៗគ្រាប់មីនសម្លាប់មនុស្សជិត ១០០នាក់ ហើយវាជាសោកនាដកម្មធ្វើឲ្យគ្រួសាររបស់ជនរងគ្រោះរងទុក្ខវេទនា។ រហូតមកដល់ពេលនេះកម្ពុជាបានបោសសម្អាតដីដែលសង្ស័យថា មានគ្រាប់មីនគឺបាន១៥០០គីឡូម៉ែត្រការ៉េ ប៉ុន្ដែដីប្រមាណជា ២០០គីឡូម៉ែត្រការ៉េទៀតនៅតែសង្ស័យថា មានគ្រាប់មីនបង្គាប់នៅឡើយ។
ចាប់តាំងពីកម្ពុជាបញ្ចប់សង្គ្រាមស៊ីវិលមក គឺពលរដ្ឋខ្មែរប្រមាណជា ៦ម៉ឺននាក់ ក្លាយជាជនរងគ្រោះដោយសារគ្រាប់មីន។ ហើយនៅខណៈនេះគេរកឃើញគ្រាប់មីនប្រមាណជាង ១លានគ្រាប់រួចហើយ៕
