ភ្នំពេញ៖បន្ទាប់ពីរដ្ឋាភិបាល តម្រូវឱ្យធនាគារអេស៊ីលីដា និង គ្រឹះស្ថានមីក្រូហិរញ្ញវត្ថុ ផ្លាស់ប្តូរនិមិត្ត សញ្ញា(Logo) ដើម្បីកុំឱ្យមានការភ័ន្តច្រលំ ធនាគារស្ថាបនា ភីអិលស៊ី ក៏នឹងគ្រោងផ្លាស់ប្តូរនិមិត្តរបស់ខ្លួនផងដែរ។ អ្នកជំនាញសេដ្ឋកិច្ច យល់ថា ការតម្រូវឱ្យគ្រឹះស្ថានមីក្រូហិរញ្ញវត្ថុឯកជនទាំងនោះប្តូរនិមិត្ត គឺជាការខាតបង់ ហើយរដ្ឋាភិបាលគួរបង្វែរមកពន្យល់ឱ្យប្រជាជនយល់ច្បាស់ជាងមុនទើបល្អ។
ធនាគារស្ថាបនា ភីអិលស៊ី គ្រោងនឹងផ្លាស់ប្ដូរ និមិត្តសញ្ញាពាណិជ្ជកម្មរបស់ខ្លួន ដែលមានរូបសឹង្ហ នាពេលខាងមុខនេះ។ គម្រោងប្តូរនិមិត្តសញ្ញានេះធ្វើឡើង បន្ទាប់ពីរដ្ឋាភិបាលបានព្រមានចាត់វិធានការទៅលើធនាគារ និងគ្រឹះស្ថានមីក្រូហិរញ្ញវត្ថុមួយចំនួន ដែលមាននិមិត្តសញ្ញាដូចស្ថាប័នរដ្ឋ។
សេចក្ដីប្រកាសព័ត៌មានរបស់ធនាគារស្ថាបនា បានបញ្ជាក់ថា ធនាគារស្ថាបនា ភីអិលស៊ី គឺជាគ្រឹះស្ថានឯកជន ដែលត្រូវជាបុត្រសម្ព័ន្ធរបស់ ធនាគារជប៉ុន MARUHAN Japan Group។ ដើម្បីបង្កើនភាពច្បាស់ លាស់ នៃការប្រើប្រាស់និមិត្តសញ្ញា និងបង្កើនទំនុកចិត្តពីសំណាក់អតិថិជន និងសាធារណៈជន ធនា គារស្ថាបនា ភីអិលស៊ី កំពុងពិភាក្សា និងសិក្សាលើការផ្លាស់ប្តូរនិមិត្តសញ្ញា របស់ខ្លួននាពេលខាងមុខនេះ។
គម្រោងកែប្រែស្លាកសញ្ញារបស់ធនាគារមួយនេះ ត្រូវបានធ្វើឡើងបន្ទាប់ពីធនាគារអេស៊ីលីដា និងគ្រឹះស្ថានមីក្រូហិរញ្ញវត្ថុប្រាសាក់ ត្រូវបានសម្តេចនាយករដ្ឋមន្ត្រី ហ៊ុន សែន បង្គាប់ឲ្យផ្លាស់ប្ដូរនិមិត្ត សញ្ញា ដើម្បីកុំឱ្យប្រជាពលរដ្ឋភាន់ច្រឡំថា ធនាគារ ឬ គ្រឹះស្ថានមីក្រូហិរញ្ញវត្ថុទាំងនេះ គឺជាស្ថាប័នផ្ដល់កម្ចីរបស់រដ្ឋ ដោយសម្តេចសង្កេតឃើញថា មានបក្សប្រឆាំងខ្លះបានដើរឃោសនាបោកប្រជា ពលរដ្ឋថា នៅពេលដែលខ្លួនឈ្នះឆ្នោតនឹងជួយលុបបំណុលជួនពលរដ្ឋ។
ជុំវិញការបង្គាប់ឱ្យផ្លាស់និមិត្តសញ្ញារបស់ស្ថាប័នហិរញ្ញុវត្ថុនេះ លោក ឃឹម ចិន្ត្រា ប្រធានផ្នែកលក់នៃអង្គការបន្ទាយព្រាប និងជាអ្នកជំនាញសេដ្ឋកិច្ចយល់ថា ការសម្រេចឱ្យគ្រឹះស្ថានហិរញ្ញវត្ថុឯកជនទាំង នោះផ្លាស់ប្តូរផ្លាស់និមិត្តសញ្ញា មិនត្រូវត្រឹមនោះទេ។ លោកបន្តថា មុននឹងធនាគារ ឬគ្រឹះស្ថានមីក្រូ ហិរញ្ញវត្ថុទាំងនោះទៅសុំចុះបញ្ជី គ្រឹះស្ថានទាំងនោះបានចំនាយពេល និងចំណាយលុយអស់យ៉ាងច្រើន រដ្ឋាភិបាលគួរតែបង្ឃាំងតាំងពីដំបូង មិនគួរទើបតែបង្ឃាំងនៅពេលនេះទេ។ លោកបន្ថែមថា រដ្ឋា ភិបាលគួតែព្យាយាមពន្យល់ដល់ពលរដ្ឋឱ្យកាន់តែច្បាស់ជាមុន។ អ្នកជំនាញសេដ្ឋកិច្ចរូបនេះ បានឱ្យដឹងបន្តថា ការណ៍ដែលរដ្ឋាភិបាលតម្រូវឱ្យធនាគារ ឬគ្រឹស្ថានមីក្រូហិរញ្ញវត្ថុទាំងនោះប្តូរ និមិត្តសញ្ញា បានធ្វើឱ្យពួកគេខាតបង់យ៉ាងច្រើន។
សេចក្តីប្រកាសព័ត៌មានរួម រវាងក្រសួងសេដ្ឋកិច្ច និងធនាគារជាតិ កាលពីថ្ងៃទី១៦ ខែកុម្ភៈបានឱ្យដឹងថា នាពេលកន្លងមក រដ្ឋាភិបាលសង្កេតឃើញថា ប្រជាពលរដ្ឋមួយចំនួន ជាពិសេសពលរដ្ឋនៅទីជនបទ តែងតែមានការយល់ច្រឡំថា គ្រឹះស្ថានមីក្រូហិរញ្ញវត្ថុ រួមមានធនាគារពាណិជ្ជ ធនាគារឯកទេស គ្រឹះ ស្ថានមីក្រូហិរញ្ញវត្ថុទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ និងប្រតិបត្តិករឥណទានជនបទ ថាជាគ្រឹះស្ថានរបស់រដ្ឋ៕
